ខេត្តសៀមរាប៖ អាជ្ញាធរក្រុងសៀមរាប បានណែនាំឱ្យអាជ្ញាធរភូមិ/ សង្កាត់ទាំង១២ បន្តត្រួតពិនិត្យនូវការអនុវត្តន៍វិធានការណែនាំរបស់ក្រសួងសុខាភិបាល នៅតាមទីកន្លែងប្រជុំជន ដូចជា ទីផ្សារ និងទីអារាម ដោយហាមដាច់ខាត មិនអនុញ្ញាតអោយមានការរៀបចំពិធីផ្សេងៗ ដែលមានការជួបជុំមនុស្សច្រើនឡើយ។ ការហាមឃាត់នេះ ត្រូវធ្វើឡើង ចាប់ពីពេលនេះ រហូតដល់មានការណែនាំថ្មីពីរាជរដ្ឋាភិបាល និងក្រសួងសុខាភិបាល។
អាជ្ញាធរក្រុងសៀមរាប បានបញ្ជាក់ថា ខណៈពេលនេះ មិនមែនជាពេលទម្លាក់កំហុស ឬបន្ទោសគ្នានោះទេ! តែជាពេល ដែលយើងត្រូវរួមគ្នា ដើម្បីប្រយុទ្ធប្រឆាំងយកឈ្នះជំងឺកូវីដ-១៩។
វិធានការខាងលើនេះ ត្រូវបានប្រកាស កាលពីថ្ងៃទី៣០ ខែវិច្ឆិកា ឆ្នាំ២០២០។ ក្នុងនោះ ដើម្បីរួមចំណែកទប់ស្កាត់ ការរីករាលដាល នៃមេរោគកូវីដ-១៩ នៅក្នុងសហគមន៍ លោក នួន ពុទ្ធារ៉ា អភិបាលក្រុងសៀមរាប បានចាត់តាំងឱ្យក្រុមការងារ នាំម៉ាស និងជែលលាងសម្អាតដៃ ចែកជូនដល់បងប្អូនមន្ត្រី នៅតាមការិយាល័យ នៃរដ្ឋបាលក្រុងសៀមរាប ព្រមទាំងកម្លាំងទាំងបីប្រភេទ ចំណុះឱ្យគណៈបញ្ជាការឯកភាពនៃរដ្ឋបាលក្រុងសៀមរាប។
ជាការកត់សម្គាល់ ទីរួមខេត្តសៀមរាប ក៏ជាកន្លែងដែលមានហានិភ័យ ដោយការឆ្លងជំងឺកូវីដ១៩ ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកាផងដែរ៕ ដោយ៖ ច័ន្ទ រស្មី
ចែករំលែកព័តមាននេះ