រាល់កិច្ចទាំងអស់របស់ព្រះសង្ឃពុទ្ធសាសនាត្រូវប្រព្រឹត្តទៅតាមព្រះពុទ្ធវិន័យជាដាច់ខាត បើធ្វើខុសវិន័យនឹងមានទោស ធ្វើត្រឹមត្រូវតាមវិន័យនឹងរួចទោស មិនមានសីលវិបត្តិ តែសម័យបច្ចុប្បន្នឃើញមានការគង់ឬអង្គុយរបស់ព្រះសង្ឃពុទ្ធសាសនានៅមិនទាន់ប្រតិបត្តិឱ្យបានត្រឹមត្រូវនៅឡើយទេ ខាងក្រោមនេះជាចំណុចគួរពិចារណាចំនួនបីដូចតទៅ៖
១- ការរៀបចំតាមក្បួនពុទ្ធវិន័យតម្រូវឱ្យព្រះសង្ឃគង់អង្គុយតាមលំដាប់ចាស់ និងខ្ចីវស្សានៅក្នុងផ្នួស គឺថាមិនរាប់យកអាយុចាស់ក្មេងនៃវ័យការកើត ឬការចាប់កំណើតឡើយ ។ សម័យបច្ចុប្បន្នចំណុចទី១ មិនសូវឃើញមានប្រតិបត្តិជាទូទៅទាំងស្រុងទេ ។
២- ការរៀបចំតាមក្បួនពិធីសារនៅក្នុងព្រះរាជពិធីតម្រូវឱ្យព្រះសង្ឃគង់អង្គុយអនុលោមទៅតាមឋានានុក្រម មុខតំណែងខ្ពស់ទាបនៅក្នុងជួរព្រះមន្ត្រីសង្ឃ ។
៣- ការគង់អង្គុយរបស់ព្រះសង្ឃពុទ្ធសាសានាត្រូវតែរៀបចំឡើងដោយអនុលោមទាំងស្រុង និងដាច់ខាតឱ្យស្របតាមបទដ្ឋាននៃក្បួនខ្នាតពុទ្ធវិន័យ ឯការរៀបចំអាសនៈសម្រាប់ព្រះសង្ឃដោយអនុលោមតាមកម្រិតខ្ពស់ទាបនៃមុខតំណែង ឋានានុក្រម តួនាទី នៅក្នុងជួរមន្ត្រីសង្ឃជាការប្រតិបត្ដិខុស ផ្ទុយទាំងស្រុងទៅនឹងបទដ្ឋាននៃក្បួនខ្នាតពុទ្ធវិន័យ ។
ចំណុចចុងក្រោយនេះជាយោបល់លើកឡើងដោយមានបំណងចង់ឱ្យព្រះសង្ឃនៅក្នុងសកលពុទ្ធសាសនមណ្ឌលប្រតិបត្តិតាមលំអានពិតប្រាកដនៃពុទ្ធវិន័យ ។ សាន សារិន
ចែករំលែកព័តមាននេះ