រាជធានីភ្នំពេញ៖ ភ្លាមៗក្រោយពីស្ថានទូតអាមេរិកប្រចាំនៅកម្ពុជាចាប់ផ្តើមយុទ្ធនាការ «បញ្ចេញសម្លេងលើផ្នែកលទ្ធិប្រជាធិបតេយ្យ និងសិទ្ធិមនុស្ស» នាថ្ងៃទី ១ ខែធ្នូ ឆ្នាំ ២០២០ នេះ ស្រាប់តែអ្នកនាំពាក្យក្រសួងយុត្តិធម៌ លោក ជិន ម៉ាលីន បានធ្វើការបកស្រាយបញ្ជាក់ថា នេះគឺជាយុទ្ធនាការល្អមួយ តែវាមិនគួររៀបចំក្នុងកាលៈទេសៈដែលកម្ពុជាកំពុងតែប្រយុទ្ធប្រឆាំងយ៉ាងខ្លាំងក្លាជាមួយនឹងជំងឺកូវីដ ១៩ ដែលឆ្លងចូលសហគមន៍ជាលើកដំបូងនៅកម្ពុជានោះ ។
លោក ជិន ម៉ាលីន ដែលកំពុងស្ថិតក្នុងការធ្វើចត្តាឡីស័ក ១៤ ថ្ងៃដោយសារតែព្រឹត្តិការណ៍សហគមន៍២៩ វិច្ឆិកា បានឆ្លើយតបទៅនឹងយុទ្ធនាការរបស់ស្ថានទូតអាមេរិក តាមរយៈបណ្តាញសង្គមរបស់ខ្លួនយ៉ាងដូច្នេះថា «ជាទស្សនៈផ្ទាល់ខ្លួន ក្នុងកាលៈទេសៈដ៏លំបាកដែលកម្ពុជាកំពុងទទួលរងការវាយប្រហារពី COVID-19 នាពេលនេះ ស្ថានទូតអាមេរិករួមទាំងអង្គការសិទ្ធិមនុស្សជាតិនិងអន្តរជាតិផ្សេងទៀត គួរតែរួមគ្នាចូលរួមជាមួយរដ្ឋាភិបាលក្នុងការធ្វើសកម្មភាពទប់ស្កាត់ការរីករាលដាលនៃការឆ្លង COVID-19 នេះ ចូលដល់សហគមន៍ ដើម្បីទទួលបានការគាំទ្រនិងស្វាគមន៍ពីប្រជាជាតិខ្មែរទូទាំងប្រទេស» ។
អ្នកនាំពាក្យក្រសួងយុត្តិធម៌រូបនេះបានបន្តថា «វិធានការទប់ស្កាត់ការរីករាលដាលនៃការឆ្លង COVID-19 ចូលដល់សហគមន៍នាពេលនេះ គឺដើម្បីការពារនិងសង្គ្រោះអាយុជីវិតរបស់ពលរដ្ឋ ដែលជាការធានាបាននូវសិទ្ធិជាមូលដ្ឋានមួយរបស់ពលរដ្ឋ គឺសិទ្ធិរស់រានមានជីវិត ដែលសិទ្ធិនេះមានអាទិភាជាងសិទ្ធិណាៗទាំងអស់ ហើយប្រសិនបើសិទ្ធិនេះមិនត្រូវបានធានានិងការពារនោះទេ សិទ្ធិផ្សេងៗទៀតក៏នឹងពុំមានអត្ថិភាពនិងតម្លៃអ្វីដែរ » ។
សូមបញ្ជាក់ថា ស្ថានទូតអាមេរិក បានប្រកាសចាប់ផ្តើមយុទ្ធនាការ «បញ្ចេញសម្លេងលើផ្នែកលទ្ធិប្រជាធិបតេយ្យ និងសិទ្ធិមនុស្ស» តាមរយៈការសរសេរសារអំពីយុទ្ធនាការនេះលើផេកផ្លូវការរបស់ខ្លួន ស្ថានទូតអាមេរិកប្រចាំកម្ពុជា អំពីការចាប់ផ្តើមធ្វើយុទ្ធនាការ ក្រោមប្រធានបទ «ក្តីសង្ឃឹមសម្រាប់ប្រជាជន កម្ពុជា ក្នុងការបញ្ចេញសម្លេងលើផ្នែកលទ្ធិប្រជាធិបតេយ្យ» ដោយមានផលិតជាផ្ទាំងរូបភាពឃោសនា និងផលិតជាវីដេអូ ទស្សនៈកម្មករ និងយុវជន។
ក្នុងនោះស្ថានទូតអាមេរិកបាននិយាយថា «ពេលនេះខែធ្នូហើយយើងកំពុងប្រារព្វពិធីទំនាក់ទំនងរបស់យើងនៅក្នុងវិស័យប្រជាធិបតេយ្យនិងសិទ្ធិមនុស្ស ដែលជាផ្នែកមួយនៃការរំលឹកខួបលើកទី៧០ នៃការបង្កើតទំនាក់ទំនងការទូតរវាងសហរដ្ឋអាមេរិកនិងប្រទេសកម្ពុជា»។
សូមរម្លឹកផងដែរថា កាលពី២ថ្ងៃមុន ឯកអគ្គរដ្ឋទូតអាមេរិក W. Patrick Murphy ក៏បានជួបពិភាក្សាការងារជាមួយ ការិយាល័យផ្នែកសិទ្ធិមនុស្សអង្គការសហប្រជាជាតិនៅកម្ពុជា និងអ្នក សម្របសម្រួលប្រចាំប្រទេសនៃអង្គការសហប្រជាជាតិនៅកម្ពុជា អ្នកស្រី Pauline Tamesis ។
អ្នកទាំងពីរបានពិភាក្សាអំពី កិច្ច សហប្រតិបត្តិការលើផ្នែកអប់រំ អាហារូបត្ថម្ភ ការឆ្លើយតបនឹងគ្រោះមហន្តរាយ និង ក្តីសង្ឃឹមសម្រាប់ប្រជាជន កម្ពុជា ក្នុងការបញ្ចេញសម្លេងលើផ្នែកលទ្ធិប្រជាធិបតេយ្យទៅអនាគត៕
ចែករំលែកព័តមាននេះ