កសិករ​នាំ​គ្នា​សម្រុក​ដាំ​ស្រូវ​ឡើង​វិញ តែ​ព្រួយបារម្ភ​ខ្លាច​ទឹក​មិន​គ្រប់គ្រាន់ – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

កសិករ​នាំ​គ្នា​សម្រុក​ដាំ​ស្រូវ​ឡើង​វិញ តែ​ព្រួយបារម្ភ​ខ្លាច​ទឹក​មិន​គ្រប់គ្រាន់

1 ខែ មុន
  • Banteay Meanchey

ខេត្តបន្ទាយមានជ័យ ៖ ក្រោយ​ពេល​ទឹកជំនន់​ស្រក​ប្រជា​កសិករ​បាន​សម្រុក​បង្កបង្កើន​ផល​ស្រូវ​មិន​ប្រកាន់​រដូវ​រយៈ​២​ខែ​កន្លះ​ទៅ​៣​ខែ ប៉ុន្តែ​នៅ​តែ​ព្រួយបារម្ភ​ទឹក​មិន​គ្រប់​ដាក់​ស្រូវ​ក្នុងស្រុក​មង្គល​បូ​រី​។ ជាក់ស្តែង​នៅ​អំឡុង​ខែ​មិគសិរ ត្រូវជា​ខែវិច្ឆិកា ឆ្នាំ​២០២០​នេះ នៅ​ពេល​ដែល​ទឹកជំនន់​ត្រូវ​បាន​ស្រក​ឃើញ​ថា ប្រជា​កសិករ​នៅ​ផ្នែក​ខាងលិច និង​ខាងកើត…

ខេត្តបន្ទាយមានជ័យ ៖ ក្រោយ​ពេល​ទឹកជំនន់​ស្រក​ប្រជា​កសិករ​បាន​សម្រុក​បង្កបង្កើន​ផល​ស្រូវ​មិន​ប្រកាន់​រដូវ​រយៈ​២​ខែ​កន្លះ​ទៅ​៣​ខែ ប៉ុន្តែ​នៅ​តែ​ព្រួយបារម្ភ​ទឹក​មិន​គ្រប់​ដាក់​ស្រូវ​ក្នុងស្រុក​មង្គល​បូ​រី​។

ជាក់ស្តែង​នៅ​អំឡុង​ខែ​មិគសិរ ត្រូវជា​ខែវិច្ឆិកា ឆ្នាំ​២០២០​នេះ នៅ​ពេល​ដែល​ទឹកជំនន់​ត្រូវ​បាន​ស្រក​ឃើញ​ថា ប្រជា​កសិករ​នៅ​ផ្នែក​ខាងលិច និង​ខាងកើត ផ្លូវជាតិ​លេខ​៥ ស្ថិត​ក្នុងស្រុក​មង្គល​បូ​រី បាន​នាំ​គ្នា​សម្រុក​បង្កបង្កើន​ផល​ស្រូវ​មិន​ប្រកាន់​រដូវ​ដូច​ជា​ស្រូវ​សែន​ក្រអូប ដែល​មាន​អាយុ​កាល​៣​ខែ និង​ស្រូវ​អ៊ី​អ៊ា ដែល​អាយុ​២​ខែ​កន្លះ ទទួល​បាន​ផល ដែល​ជា​អំណោយ​ស្រូវពូជ​ន៍​របស់​សម្តេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី នៃ​ព្រះរាជាណាចក្រ​កម្ពុជា​។

ស្រប​ពេល​នោះ ប្រជា​កសិករ​ក៏​បាន​ថ្លែង​អំណ​គុណ​យ៉ាង​ជ្រាលជ្រៅ​ចំពោះ​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុ​ន រ៉ា​នី ហ៊ុន សែន ដែល​បាន​ផ្តល់​ស្រូវពូជ​ន៍​ជូន​ប្រជា​កសិករ​ដែល​រង​គ្រោះ​ដោយសារ​តែ​ទឹកជំនន់​លិច​ផ្ទះសម្បែង និង​ដំណាំ​កសិកម្ម ក្រោយ​ទទួល​បាន​ស្រូវពូជ​ន៍​នេះ​ហើយ ប្រជា​កសិករ​ក៏​បាន​ស្តារ​ឡើង​វិញ​ជា​បណ្តើរ​ៗ​ហើយ​។

ប្រជា​កសិករ​បាន​បញ្ជាក់​ថា ក្រោយ​ពេល​ទឹក​ស្រក​ផុត​ភ្លឺស្រែ​បាន​បូម​ចេញ​បញ្ចេញ​ពី​ស្រែ ហើយ​ឱ្យ​ត្រាក់ទ័រ ឬ​គោ​យន្ត​ភ្ជួរ​ដី រួច​បូម​សម្រិតទឹក​ឱ្យ​អស់ ហើយ​ត្រាំ​ស្រូវពូជ​ន៍​ក្នុង​ទឹក​រយៈ​១​ថ្ងៃ​១​យប់ រួច​ស្រង់​ដាក់​លើគោក​ទុក​រយៈពេល​២​ទៅ​៣​ថ្ងៃ រហូត​ដល់​ស្រូវ​ដុះ​ពន្លក​ហើយ ទើប​យក​ទៅ​ព្រោះ​តែ​ម្តង​។

ប្រជា​កសិករ​បាន​បញ្ជាក់​ថា ការ​បង្កបង្កើន​ផល​ស្រូវ​ពិតជា​លំបាក និង​ហត់នឿយ​ណាស់ ក្រោយ​ពីព្រោះ​ហើយ ឃើញ​ស្រូវ​ដុះ​ដើម​មាន​២​ទៅ​៣​ស្លឹក ហើយ​ត្រូវ​បូមទឹក​បញ្ចូល និង​បាញ់ថ្នាំ​ស​ម្លា​.​ប់​សត្វល្អិត​បាន​២​ទៅ​៣​ថ្ងៃ ទើប​ព្រោះ​ជីគីមី​ប្រភេទ​ជី ស​.​លាយ​ជាមួយ​ជី​ពៅ​ដើម ហើយ​ត្រូវ​មើល​ថែ និង​ដាក់​ទឹក បាញ់ថ្នាំ ដាក់​ជី រហូត​ដល់​ទទួល​បាន​ផល បើ​ស្រូវ​អ៊ី​អ៊ា គឺ​ប្រើ​រយៈពេល​២​ខែ​កន្លះ ចំណែក​ស្រូវ​សែន​ក្រអូប​វិញ គឹ​ប្រើ​រយៈពេល​៣​ខែ ទើប​ប្រមូល​ផល​បាន​។

ក្នុង​ពេល​នោះ​ផង​ដែរ ប្រជា​កសិករ​ក៏​មានការ​ព្រួយ​បា​ម្ភ ព្រោះ​នៅ​ពេល​ដែល​ស្រូវ​មាន​ដើមដង ឬ​ជិត​បាន​ទទួលផល​ហើយ គឺ​ខ្លាច​ខ្វះ​ទឹក​បូម​បញ្ចូល​ស្រែ ដូច្នេះ​ប្រជា​កសិករ​មាន​តែ​ទទូច​សុំ​ឱ្យ​មន្ទីរ​ជំនាញ​មាន មន្ទីរ​ធនធានទឹក និង​ឧតុនិយម​ខេត្ត និង​មន្ទីរ​កសិកម្ម រុក្ខា​ប្រមាញ់ និង​នេសាទ​ខេត្ត អាជ្ញាធរ​ខេត្ត​-​ស្រុក​/​ក្រុង ជួយ ដើម្បី​បង្កា​កុំឱ្យ​ខ្វះខាត​ទឹក​បង្កបង្កើន​ផល​ស្រូវ​។

បើ​តាម​លោក ប៉ា​ង វ​ណ្ណា​សេដ្ឋ ប្រធាន​មន្ទីរ​កសិកម្ម រុក្ខា​ប្រមាញ់ និង​នេសាទ​ខេត្ត បាន​ប្រាប់​ថា នៅ​ឆ្នាំ​២០២០​នេះ ខេត្តបន្ទាយមានជ័យ​រង​គ្រោះ​ដោយសារ​តែ​ទឹកជំនន់​លិច​ស្រូវ​ប្រជា​កសិករ​ធ្វើ​ឱ្យ​ខូចខាត​ទាំង​ស្រុក​អស់​ជាង​២​ម៉ឺន​ហិ​កតា ក្រោយមក​ទទួល​បាន​ពូជស្រូវ​ពី​សម្តេច​តេ​ជោ ហ៊ុន សែន និង​សម្តេច​កិត្តិ​ព្រឹទ្ធ​បណ្ឌិត ប៊ុ​ន រ៉ា​នី ហ៊ុន សែន ។ លុះ​ពេល​ទឹកជំនន់​ស្រក​វិញ ប្រជា​កសិ​ករ​ក៏​បាន​ស្តារ និង​បង្កបង្កើន​ផល​ឡើង​វិញ រហូត​មក​ដល់​ពេល​នេះ​បាន​ជាង​១​ម៉ឺន​ហិ​កតា​ហើយ​ជា​ប្រភេទ​ស្រូវ​មិន​ប្រកាន់​រដូវ មាន​ស្រូវ​សែន​ក្រអូប និង​ស្រូវ​អ៊ី​អ៊ា​ជាដើម​៕