រាជធានីភ្នំពេញ៖ រដ្ឋសភាតាមរយៈអគ្គលេខាធិការ ឯកឧត្តម ឡេង ប៉េងឡុង បានស្នើសុំរដ្ឋមន្ត្រីក្រសួងសុខាភិបាល មានវិធានការចំពោះតំណាងរាស្ត្រ និងមន្ត្រីរាជការរដ្ឋសភា ដែលមានហានិភ័យធម្យម ក្នុងការឆ្លងជំងឺកូវីដ១៩…
រាជធានីភ្នំពេញ៖ រដ្ឋសភាតាមរយៈអគ្គលេខាធិការ ឯកឧត្តម ឡេង ប៉េងឡុង បានស្នើសុំរដ្ឋមន្ត្រីក្រសួងសុខាភិបាល មានវិធានការចំពោះតំណាងរាស្ត្រ និងមន្ត្រីរាជការរដ្ឋសភា ដែលមានហានិភ័យធម្យម ក្នុងការឆ្លងជំងឺកូវីដ១៩ ដោយសារតែពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ។ ដែលក្នុងនោះ គឺតំណាងរាស្ត្រ និងមន្ត្រីរាជការរដ្ឋសភាមួយចំនួនធំ បានពាក់ព័ន្ធនឹងឯកឧត្តម ឡូយ សុផាត ដែលបានជាប់ពាក់ព័ន្ធផ្ទាល់ជាមួយលោក ឆែម សាវុធ អគ្គនាយកពន្ធគារ ដែលពិនិត្យឃើញថាមានកើតកូវីដ១៩ កាលពីពេលថ្មីៗកន្លងទៅនេះ ។
យោងតាមលិខិតមួយច្បាប់ ចុះថ្ងៃទី ៣០ ខែវិច្ឆិកា និងចុះហត្ថលេខាដោយឯកឧត្តម ឡេង ប៉េងឡុងបានជម្រាបជូនឯកឧត្តម ម៉ម ប៊ុនហេង រដ្ឋមន្ត្រីក្រសួងសុខាភិបាល ក្នុងកម្មវត្ថុ ស្នើសូមឯកឧត្តមរដ្ឋមន្ត្រី ពិចារណា និងមានវិធានការដល់តំណាងរាស្ត្រនិងមន្ត្រីរាជការនៅរដ្ឋសភា ព្រោះថាកាលពីថ្ងៃទី ២៥ ខែវិច្ឆិកា កន្លងទៅ ឯកឧត្តម ឡូយ សុផាតបានចូលរួមសម័យប្រជុំពេញអង្គដែលមានអ្នកចូលរួមចំនួន ១១៦ រូបនិងមន្ត្រីរាជការរដ្ឋសភានិងតំណាងរាជរដ្ឋាភិបាលមកការបារច្បាប់មួយចំនួនទៀត ។
ឯកឧត្តម ឡេង ប៉េងឡុង អគ្គលេខាធិការរដ្ឋសភា បានបញ្ជូនបញ្ជីឥស្សរជន និងមន្ត្រីរាជការ ដែលបានប្រាស្រ័យផ្ទាល់ជាមួយឯកឧត្តមអ្នកតំណាងរាស្ត្រ ឡូយ សុផាត ជូនទៅឯកឧត្តមរដ្ឋមន្ត្រីសុខាភិបាល ម៉ម ប៊ុនហេង ផងដែរ។ ឥស្សរជន និងមន្ត្រីរាជការទាំងនោះ បានប្រាស្រ័យផ្ទាល់ និងដែលបានហូបបាយក្នុងបន្ទប់ជាមួយគ្នា ព្រមទាំងបានចូលរួមប្រជុំពេញអង្គរដ្ឋសភា នៅថ្ងៃទី២៥ ខែវិច្ឆិកា ឆ្នាំ២០២០ ព្រមទាំងប្រជុំត្រៀមរៀបចំប្រជុំអនឡាញជាមួយចិន ក្នុងបន្ទប់ជាមួយគ្នា ដែលបានជួបប្រាស្រ័យជាមួយឯកឧត្តម ឡូយ សុផាត។
ក្នុងលិខិតឯកឧត្តម ឡេង ប៉េងឡុង ក៏បានលើកឡើងពីឈ្មោះឥស្សរជន និងមន្ត្រីរាជការ ដែលមានហានិភ័យមធ្យម ក្នុងការចម្លងវីរុសកូវីដ១៩ មាន ៣១រូប ដែលមានទាំងសម្តេចប្រធាន អនុប្រធានរដ្ឋសភា ឧបនាយករដ្ឋមន្ត្រី ៣រូប តំណាងរាស្ត្រ និងមន្ត្រីរាជការផ្សេងទៀត។ រីឯមន្ត្រី ដែលមានហានិភ័យទាប មាន ៣៥រូប។ ជាមួយគ្នានោះ ឯកឧត្តម ឡេង ប៉េងឡុង ក៏បានស្នើសុំឲ្យក្រសួងសុខាភិបាល រៀបចំក្រុមគ្រូពេទ្យ ដើម្បីចុះទៅធ្វើតេស្តរកមេរោគកូវីដ១៩ នៅរដ្ឋសភា ក្នុងពេលឆាប់ៗផងដែរ ។
សូមបញ្ជាក់ថា សម័យប្រជុំរដ្ឋសភាពេញអង្គ នាព្រឹកថ្ងៃទី២៥ ខែវិច្ឆិកា ឆ្នាំ២០២០ គឺជាកិច្ចពិភាក្សាលើសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២១ ៕
ចែករំលែកព័តមាននេះ