រាជធានីភ្នំពេញ ៖ អគ្គិភ័យមួយដែលសង្ស័យបណ្ដាលមកពីទុស្សេចរន្តអគ្គិសនីបង្កឲ្យមានការឆាបឆេះឡើងនៅក្នុងផ្ទះល្វែងមួយកន្លែង ហើយជាប់ស្ត្រីម្នាក់នៅក្នុងនោះ ប៉ុន្តែពុំបណ្ដាលឲ្យរងគ្រោះថ្នាក់ដល់អាយុជីវិតនោះឡើយ ដោយត្រូវបានអ្នកភូមិរួមជាមួយសមត្ថកិច្ចជួយសង្គ្រោះទាន់ពេលវេលា ។
ហេតុការណ៍ខាងលើនេះបានកើតឡើងកាលពីវេលាម៉ោង១និង៣០នាទីរសៀលថ្ងៃទី៣០ ខែវិច្ឆិកា ឆ្នាំ២០២០ នៅផ្ទះល្វែងជាប់របងវត្តជើងឯក ស្ថិតក្នុងសង្កាត់ជើងឯក ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា ផ្ទះកើតហេតុខាងលើនេះគឺមានម្ចាស់ផ្ទះជាមន្ត្រីរាជការ ហើយគាត់មិនសូវបាននៅផ្ទះឡើយ ដោយបានចេញទៅធ្វើការបាត់ៗ ប៉ុន្តែមានក្មួយស្រីរបស់គាត់ម្នាក់នៅចាំផ្ទះ ដោយឡែកក្មួយស្រីក៏តែងតែបានចាក់សោរពីខាងក្នុងផ្ទះដើម្បីសម្រាកផងដែរ។
តាមប្រភពព័ត៌មានបានបន្តថា លុះដល់ពេលកើតហេតុ ស្រាប់តែមានអគ្គិភ័យឆាបឆេះឡើងបង្កឲ្យមានផ្សែងហុយយ៉ាងខ្លាំង ហើយនាងពុំបានដឹងឡើយ តែត្រូវបានអ្នកជិតខាងបានឃើញ ក៏មានការភ្ញាក់ផ្អើលឆោឡោទាំងថ្ងៃ ហើយអ្នកជិតខាងបានរត់ទៅកាន់កន្លែងកើតហេតុ។
តាមប្រភពដដែលបានបន្តទៀតថា លុះពេលទៅដល់បានឮសម្លេងស្ត្រីដែលជាក្មួយម្ចាស់ផ្ទះស្រែកឲ្យគេឯងជួយផងៗ ទើបអ្នកភូមិបានយកម៉ូទ័រកាត់សោទ្វារចូលទៅជួយសង្គ្រោះយកចេញដោយសុវត្ថិភាព បន្ទាប់បានយកបំពង់ពន្លត់អគ្គិភ័យ និងតទុយោទឹកបាញ់ពន្លត់រហូតរលត់ទៅវិញភ្លាមៗ។ ចំណែករថយន្តពន្លត់អគ្គិភ័យក៏បានចេញមកជួយអន្តរាគមន៍ដែរ ប៉ុន្តមិនបានបាញ់ទឹកពន្លត់នោះទេ ព្រោះអ្នកភូមិបានពន្លត់រលត់ទៅហើយ ចំណែកឯសម្ភារៈមួយចំនួនដូចជាពូក កង្ហា និងសម្ភារៈមួយចំនួនទៀតក្នុងផ្ទះត្រូវបានភ្លើងឆេះ និងរោល បណ្តាលឲ្យរងការខូចខាតយ៉ាងដំណំ៕ (កែសម្រួលដោយ ៖ ធីតា)
ចែករំលែកព័តមាននេះ