ខេត្តស្វាយរៀង ៖ ស្ត្រីមេម៉ាយម្នាក់បានចាកចេញពីស្រុកកំណើតទៅធ្វើជាពលករបម្រើការងារតាមផ្ទះនៅប្រទេសម៉ាឡេស៊ី ដើម្បីរកប្រាក់ចំណូលចិញ្ចឹមកូនស្រីម្នាក់នៅឯស្រុកកំណើតក្នុងភូមិស្វាយ សង្កាត់ចេក ក្រុងស្វាយរៀង ខេត្តស្វាយរៀង មិនដឹងថាកូនស្រីមានបញ្ហាអ្វីនោះទេ ស្រាប់តែចេញពីផ្ទះ ហើយបាត់ខ្លួនមិនដឹងទៅទីណាអស់រយៈពេលជិតមួយសប្តាហ៍មកហើយ ទើបដំណឹងនេះបានដឹងដល់ម្តាយអំពាវនាវពីក្រៅប្រទេសដើម្បីសុំឲ្យសមត្ថកិច្ចជួយតាមរកកូនស្រី ។
ស្ត្រីជាម្តាយខាងលើឈ្មោះម៉ៅ សាវ៉េត អាយុជាង៤០ឆ្នាំ បានរៀបរាប់ឲ្យអ្នកសារព័ត៌មានប្រចាំខេត្តស្វាយរៀង ពីប្រទេសម៉ាឡេស៊ីថា កូនស្រីដែលបាត់ខ្លួនខាងលើឈ្មោះម៉ៅ គន្ធា អាយុ២០ឆ្នាំ រស់នៅភូមិស្វាយ សង្កាត់ចេក ក្រុងស្វាយរៀង ខេត្តស្វាយរៀង ។ ដោយសារផ្ទុះជំងឺកូវីដ-១៩ ទើបពុំអាចមកលេងកូនស្រីជាទីស្រលាញ់បាននោះទេ តែអ្វីដែលស្ត្រីជាម្តាយរូបនេះកំពុងតែសម្រក់ទឹកភ្នែក កឺដោយសារកូនស្រីម្នាក់ដែលស្រឡាញ់ស្មើជីវិត បានចាកចេញពីផ្ទះអស់រយៈពេលជិតមួយសប្តាហ៍ទៅហើយ ដោយមិនបានផ្ដល់ដំណឹងដល់សាច់ញាតិឱ្យបានដឹងឡើយ ទើបធ្វើឲ្យគាត់ចេញមកអំពាវនាវដល់អ្នកសារព័ត៌មានឱ្យជួយផ្សព្វផ្សាយ ដើម្បីឱ្យកូនស្រីបានដឹងនិងវិលមកផ្ទះវិញ។
ស្ត្រីខាងលើបានបន្តថា គាត់ជាស្ត្រីមេម៉ាយបានទៅធ្វើការនៅប្រទេសម៉ាឡេស៊ីជាង១០ឆ្នាំមកហើយ ដោយបានទុកកូនស្រីជាទីស្រឡាញ់ផ្ញើជាមួយយាយតាឱ្យមើលថែនៅស្រុកកំណើត ហើយបានផ្ញើថវិកាឱ្យកូនរៀនរហូតចប់ថ្នាក់បរិញ្ញាបត្រនៅសាកលវិទ្យាល័យស្វាយរៀង។
ស្ត្រីខាងលើបានបន្តថា គាត់បានបែកពីស្វាមីតាំងតែពីកូននៅក្នុងផ្ទៃពោះមកម្ល៉េះ ហើយបានតស៊ូចិញ្ចឹមកូន រហូតបានចូលរៀនតាំងពីសាលាបឋមសិក្សា រហូតដល់ថ្នាក់សាកលវិទ្យាល័យ ។ នៅពេលថ្មីៗនេះ កូនស្រីរបស់កាត់បានធ្វើការនៅឲ្យក្រុមហ៊ុនមួយ ហើយក៏មានគូដណ្ដឹងផងដែរ។ ដោយក្តីស្រឡាញ់កូន គាត់តែងតែទូរស័ព្ទជួបកូនជារៀងរាល់ថ្ងៃ ព្រោះគាត់មិនអាចវិលមកស្រុកខ្មែរបានទេ ដោយសារផ្ទុះជំងឺកូវីដ-១៩ ហើយមានការនឹករឭកដល់កូនជាពន់ពេក។
ស្ត្រីខាងលើបានបញ្ជាក់ថា កាលពីថ្ងៃទី២៥ ខែវិច្ឆិកា ឆ្នាំ២០២០ កូនស្រីបានចាកចេញពីផ្ទះដោយ មិនដឹងមូលហេតុ និងមិនឃើញវិលត្រឡប់មកផ្ទះវិញនោះទេ ធ្វើឲ្យសាច់ញាតិ យាយតា ក៏ដូចជា រូបគាត់ផ្ទាល់មានការបារម្ភជាខ្លាំង ខ្លាចកូនមានគ្រោះថ្នាក់ដោយប្រការណាមួយ។
តាមរយៈសារព័ត៌មានកោះសន្តិភាព អ្នកស្រីសូមអំពាវនាវដល់សមត្ថកិច្ច និងបងប្អូនប្រជាពលរដ្ឋទាំងអស់ ដែលបានឃើញរូបកូនស្រីមានភិនភាគដូចក្នុងរូបថតនេះ សូមជួយប្រាប់នាងឲ្យវិលត្រឡប់មកផ្ទះវិញផង ព្រោះម្ដាយមានការព្រួយបារម្ភយ៉ាងខ្លាំង និងសូមទំនាក់ទំនងមកលេខទូរស័ព្ទ០៩៧ ៨ ០៧០ ២២៥ និង ០៧១ ៧ ៧៧៥ ១៥២៕ (កែសម្រួលដោយ ៖ ធីតា)
ចែករំលែកព័តមាននេះ