កាវ៉ាន់ ដំរីដ៏ឯកាបំផុតលើលោក ជិះយន្តហោះពីប៉ាគីស្ថាន មកដល់សៀមរាបហើយ
ខេត្តសៀមរាប ៖ នៅមុននេះបន្តិច ដំរីឈ្មោះ កាវ៉ាន់ (Kaavan) បានជិះយន្តហោះ ពីប្រទេសប៉ាគីស្ថាន មកដល់ទីរួមខេត្តសៀមរាបហើយ នៅថ្ងៃទី៣០…
ខេត្តសៀមរាប ៖ នៅមុននេះបន្តិច ដំរីឈ្មោះ កាវ៉ាន់ (Kaavan) បានជិះយន្តហោះ ពីប្រទេសប៉ាគីស្ថាន មកដល់ទីរួមខេត្តសៀមរាបហើយ នៅថ្ងៃទី៣០ វិច្ឆិកា ២០២០នេះ ជាកន្លែងដែលវានឹងរស់នៅអស់មួយជីវិតរបស់វា ។
តារាចម្រៀងប៉ុបអាមេរិក Cher ដែលជាអ្នកផ្ដើមធ្វើយុទ្ធនាការ ដើម្បីសេរីភាពរបស់សត្វដំរីដ៏ឯកាបំផុតលើលោក ១ក្បាលនេះ ក៏កំពុងអមដំណើរមកផ្ទះថ្មីរបស់វាដែរ ។ សូមស្វាគមន៍«កាវ៉ាន់»មកកាន់ផ្ទះថ្មី នៃទឹកដីកម្ពុជា ។
យោងតាមក្រសួងបរិស្ថាន ដំរីឈ្មោលមួយក្បាល ដែលបញ្ជូនមកពីប្រទេសប៉ាគីស្ថាននេះ មានឈ្មោះថា កាវ៉ាន់ (Kaavan) មានអាយុ ៣៥ឆ្នាំ ។ នៅពេលមកដល់កម្ពុជា ដំរីនេះនឹងយកទៅឲ្យរស់នៅក្នុងតំបន់ព្រៃការពារកូលេនព្រំទេព្ធ ក្នុងភូមិសាស្ត្រខេត្តឧត្តរមានជ័យ ។
តាមរយៈរបាយការណ៍របស់អង្គការ Four Paws International បានរៀបរាប់ពីប្រវត្តិដំរីដ៏កម្សត់ Kaavan ដូច្នេះថា «កាវ៉ាន់ ត្រូវគេនាំមកក្នុងប្រទេសប៉ាគីស្ថាន ដែលពេលនោះ កាវ៉ាន់មានអាយុត្រឹមតែ១ឆ្នាំប៉ុណ្ណោះ ។ ហើយក្នុងការនាំយកដំរីមួយនេះ ទៅក្នុងប្រទេសប៉ាគីស្ថាន គឺក្នុងគោលបំណងជូនជា ការដូរមួយ ពីប្រទេសស្រីលង្កា» ។
ដំរីកាវ៉ាន់ បានចំណាយជីវិតរបស់វា ក្នុងភាពអត់ឃ្លាន ឬភាពមិនមានអាហារគ្រប់គ្រាន់ នៅក្នុងទីកន្លែងមួយ ដែលហ៊ុំព័ទ្ធដោយរបង ក្នុងសួនសត្វ the Islamabad ZOO ។ វាត្រូវបានទទួលរងពីការខ្វះការថែទាំ ពីពេទ្យសត្វ និងត្រូវបានគេដាក់ច្រវាក់អស់រយៈពេលជាច្រើនឆ្នាំ ហើយត្រូវបានបង្ខំ ឲ្យសម្តែងនៅចំពោះមុខភ្ញៀវ ជាច្រើនលើកផងដែរ ។
នៅឆ្នាំ២០១២ កាវ៉ាន់បានបាត់បង់ដៃគូ ដ៏ល្អតែមួយគត់របស់វា គឺដំរីញី ដែលមានឈ្មោះថា សាហេលី Saheli ដោយដំរីញីនោះបានស្លាប់ក្រោយឆ្លងមេរោគ ពីច្រវ៉ាក់ដែលគេបានដាក់នៅជាប់ជើង ។ រូបភាពខូចចិត្តរបស់កាវ៉ាន់ នៃការស្លាប់របស់ដំរីញី Saheli ដោយកាវ៉ាន់ បានឈរនៅពីលើដងខ្លួនរបស់ Saheli បានធ្វើឲ្យពិភពលោក មានការភ្ញាក់ផ្អើលយ៉ាងខ្លាំង ។
ចាប់តាំងពីពេលនោះមក កាវ៉ាន់ត្រូវបានគេស្គាល់ជាទូទៅថាជា «ដំរីដែលមានភាពឯកាបំផុតក្នុងលោក» (world’s loneliest elephant) ហើយវា ត្រូវបានគេស្គាល់ថា ជាដំរីអាស៊ី ដែលសល់តែមួយក្បាលគត់លើពិភពលោក ។
កាលពី ៤ឆ្នាំមុន អ្នកចម្រៀងប៉ុបដ៏ល្បីល្បាញមួយរូបមានឈ្មោះថា Cher បានសម្រេចចិត្តបើកយុទ្ធនាការសង្គ្រោះកាវ៉ាន់ (SaveKaavan campaign) ។ យុទ្ធនាការនេះ ត្រូវបានចុះហត្ថលេខា ដោយមនុស្សចំនួន ២០០,០០០នាក់ និងអង្គការ Four Paws ហើយពួកគេ បានធ្វើដំណើរទៅទីក្រុង អ៊ីស្លាម៉ាបាដ ក្នុងប្រទេសប៉ាគីស្ថាន ដើម្បីវាយតម្លៃស្ថានភាពសុខភាពរបស់កាវ៉ាន់ ហើយបានដាក់របាយការណ៍ ដែលទាក់ទងនឹងលក្ខខណ្ឌសុខភាព ដែលមិនមានភាពត្រឹមត្រូវ ហើយក៏មិនបានរាយការណ៍តែត្រឹមដំរីកាវ៉ាន់នោះដែរ ប៉ុន្តែសត្វដទៃទៀតដែលរស់នៅក្នុងសួនសត្វដ៏ល្បីល្បាញក៏ត្រូវបានរាយការណ៍ផងដែរ។
កាលពីដើមឆ្នាំខែវិច្ឆិកា ឆ្នាំ២០២០នេះ អង្គការ Four Paws International បានបន្តថា «បន្ទាប់ពីការខិតខំប្រឹងប្រែងតាមផ្លូវច្បាប់ និងសេចក្តីសម្រេចរបស់តុលាការ ជាន់ខ្ពស់របស់ក្នុងទីក្រុងអ៊ីស្លាម៉ាបាដ ទីបំផុតយើងអាចជួយសង្គ្រោះសត្វដំរី ដែលឯកាជាងគេបំផុតនៅលើពិភពលោក ហើយនាំវាទៅកាន់ដែនជម្រកការពារសត្វព្រៃ នៅប្រទេសកម្ពុជា ដែលជាកន្លែងថ្មី និងការចាប់ផ្តើមជីវិតថ្មី រស់នៅជាមួយដំរីដទៃ ទៀតផងដែរ» ។
យើងប្តេជ្ញាបន្តការអនុវត្តជួយសង្គ្រោះ សត្វគ្រប់ប្រភេទណា ដែលមានសភាពធ្ងន់ធ្ងរបំផុត ដែលយើងធ្លាប់បានធ្វើវាជាច្រើនរួចមកហើយ ។ កាវ៉ាន់នឹងត្រូវបានបញ្ជូនតាមយន្តហោះ ដឹកទំនិញធុនធ្ងន់ ដែលជាជិះយន្តហោះឯកជនពិសេសមួយ ។
នៅប្រទេសកម្ពុជា គឺជាកន្លែងមួយ ដែលដំរីមួយនេះ អាចពឹងពាក់ ក្នុងការរស់នៅដោយសេរីភាព និងជាពិសេសទីតាំងនោះ ត្រូវបានសាងសង់ឡើង ដើម្បីឲ្យកាវ៉ាន់ អាចតាំងទីលំនៅ និងអាចស្គាល់ដំរីដទៃទៀត ដែលរស់នៅទីនោះតាមធម្មជាតិផងដែរ ៕
ចែករំលែកព័តមាននេះ