ខេត្តមណ្ឌលគិរី ៖ «គ្មានការទុកឱកាស ឬពន្យារពេល សម្រាប់អ្នករំលោភបំពានយកដីភ្នំដោះក្រមុំទៀតទេ ចាប់ពីពេលនេះតទៅ បើជំនាញរកឃើញនិងចាត់វិធានការបញ្ជូនសំណុំរឿងទៅតុលាការដោយមិនលើកលែង» នេះជាការបញ្ជាក់របស់ឯកឧត្តម ស្វាយ សំអ៊ាង អភិបាលខេត្តមណ្ឌលគិរីថ្លែងប្រាប់កោះសន្តិភាព នារសៀលថ្ងៃទី៣០ វិច្ឆិកា ២០២០ ។
សេចក្តីរាយការណ៏បានឲ្យដឹងថា ដីភ្នំមជ្ឈមណ្ឌលវប្បធម៏ជនជាតិដើមភាគតិចភ្នំដោះក្រមុំ នៅតែរងការទន្ទ្រានពីជនខិលខូចទោះបីជាកន្លងមក ផ្ទៃដីភ្នំនេះ ត្រូវបានកាត់ចេញមួយផ្នែកធំ ទៅអ្នកកាន់កាប់តាមជើងភ្នំដែលទៅរស់នៅជាង១០ឆ្នាំមុន ដើម្បីបញ្ចប់វិវាទនិងងាយស្រួលដល់ក្រុមការងារកំណត់បង្គោលព្រំដីថែរក្សាជាសម្បត្តិសាធារណៈ។
លោក សី ទូច ប្រធានមន្ទីរវប្បធម៌ខេត្តមណ្ឌលគិរី ដែលបានដឹកនាំកម្លាំងអាជ្ញាធរពាក់
ព័ន្ធចុះទៅត្រួតពិនិត្យទីតាំងដីភ្នំដោះក្រមុំ ដែលបានរងការទន្ទ្រានពីសំណាក់ប្រជាពលរដ្ឋរស់នៅជិតខាងនោះជាបន្តបន្ទាប់កាលពីថ្ងៃទី២៨ វិច្ឆិកា ២០២០ ក្រុមការងារបានរកឃើញថា ដីភ្នំវប្បធម៏ប្រមាណជាង១ហិចតា ត្រូវបានគេកាប់រានព្រៃយកដី ហើយតម្រុយបង្គោលព្រំដែលក្រុមការងារអន្តរក្រសួងបានបោះកាលពីពេលកន្លងមកក៏ត្រូវគេបំបាត់ភស្តុតាងដែរ។
ប្រធានមន្ទីរវប្បធម៌បន្តថា បង្គោលតម្រុយដែលក្រុមការងារបោះចំនួន៥៣បង្គោល បានបាត់បង់អស់ចំនួន៤បង្គោល សង្ស័យមានគេដកចេញ ព្រោះក្រុមការងាររកមិនឃើញ ហើយគេបានកាប់ទន្ទ្រានព្រៃ និងកាយឈូសឆាយដីចូលបរិវេណដីភ្នំអភិរក្ស ដែលសរុបជាបទល្មើសមានចំនួន៥ទីតាំង។មន្ត្រីជំនាញកំពុងធ្វើរបាយការណ៍ជូនទៅគណៈអភិបាលខេត្ត។
ជុំវិញរឿងរ៉ាវដីភ្នំដោះក្រមុំនេះ ឯកឧត្តម ស្វាយ សំអ៊ាង អភិបាលខេត្តមណ្ឌលគិរីបានឲ្យដឹងថា កន្លងមកអាជ្ញាធរបានចាត់វិធានការដោះស្រាយទប់ស្កាត់ រុះរើការតាំងទីលំនៅខុសច្បាប់ ដកបង្គោលរបងជាច្រើនដែលមានអ្នករំលោភយក។ ក្រោយពីសម្រេចកំណត់ទំហំដី ក្រុមការងារបានបោះព្រំកំណត់ជិតរួចរាល់ នៅខ្វះចន្លោះបន្តិចបន្តួច។អភិបាលខេត្តបញ្ជាក់ថា ក្នុងករណីនេះ ប្រសិនបើមានជនណានៅតែរំលោភបំពាន អាជ្ញាធរ និងចាត់ការតាមច្បាប់។
ទាក់ទិនករណីនេះ សហគមន៍ជនជាតិដើមភាគតិច ហាក់សម្តែងការមិនពេញចិត្តចំពោះអ្នកគ្រប់គ្រងដីតំបន់នេះ ជាពិសេស មន្ទីរវប្បធម៌ និងក្រសួងវប្បធម៌ ដែលមានការបណ្តែតបណ្តោយឲ្យជនខិលខូចនៅតែអាចបន្តសកម្មភាព រុលចូលទន្ទ្រានយកដីភ្នំយ៉ាងអនាធិបតេយ្យ។តាំងពីដីមានទំហំជាង១០០ហិកតា បច្ចុប្បន្ន សល់មិនដល់១០០ហិកតា ត្រឹមរយៈពេលជាង១០ឆ្នាំប៉ុណ្ណោះ។
គួររំឮកថា អាជ្ញាធរខេត្តមណ្ឌលគិរី បានសម្រេចដកហូតដីនៅតំបន់ជុំវិញជើងភ្នំដោះក្រមុំ មកធ្វើជាសម្បត្តិសាធារណៈវិញ និងត្រូវបោះបង្គោលកំណត់ព្រំដីផងដែរ ។ ការសម្រេចនេះ គឺបន្ទាប់ពីមានកិច្ចប្រជុំបន្ទាន់មួយ រវាងអាជ្ញាធរនិងមន្ត្រីពាក់ព័ន្ធទាំងអស់ តាំងពីវេលាម៉ោងប្រហែល០៨ព្រឹកថ្ងៃទី០១ មីនា ២០១៩។
កាលពីឆ្នាំ២០០៤ ពេលដែលភ្នំដោះក្រមុំត្រូវបានស្នើសុំដាក់បញ្ជូលជាតំបន់មជ្ឈមណ្ឌលវប្បធម៌ជនជាតិ ដែលមានទំហំសរុប១០១ហិកតា ។ តែដោយការគ្រប់គ្រងចន្លោះប្រហោង ទំហំផ្ទៃដីមជ្ឈមណ្ឌលជនជាតិ ឬភ្នំដោះក្រមុំនេះ មានគេចូលកាន់កាប់អស់ នៅសល់ទំហំ៩០ហិកតា នាឆ្នាំ២០១២ នឹងបន្តនៅសល់ត្រឹម៨៥ហិកតា ក្នុងឆ្នាំ២០២០នេះ៕
ចែករំលែកព័តមាននេះ