ខេត្តបាត់ដំបង ៖ គេសង្កេតឃើញនៅលើបណ្ដាញសង្គមនានា រួមទាំងផេករបស់រដ្ឋបាលខេត្តផង នៅព្រឹកថ្ងៃទី៣០ វិច្ឆិកា បានផ្សព្វផ្សាយព្រោងព្រាតយ៉ាងចំហនូវសេចក្ដី
«ប្រកាសព័ត៌មាន» ស្ដីអំពីការឆ្លងរាលដាលជាថ្មីនៃជំងឺ«កូវីដ១៩» ដោយយោងលើសេចក្ដីប្រកាសព័ត៌មានរបស់ក្រសួងសុខាភិបាលដែលថា មេរោគដ៏កាចសាហាវនេះ បាននិងកំពុង«ឆ្លងដល់សហគមន៍» ដែលដំណឹងនេះ បានធ្វើឲ្យពលរដ្ឋនៅក្នុងខេត្តនេះ កំពុងមានការព្រួយបារម្ភយ៉ាងខ្លាំង ខណៈមនុស្សពាក់ព័ន្ធមួយចំនួន ត្រូវបានទៅកាន់មន្ទីរពេទ្យជាបន្តបន្ទាប់ ដើម្បីពិនិត្យសំណាក។
រដ្ឋបាលខេត្តបាត់ដំបងបានចេញសេចក្ដីប្រកាសព័ត៌មានស្ដីពីការ«ឆ្លងជំងឺកូវិដ១៩» ជាថ្មីនេះ កាលពីថ្ងៃទី២៩ វិច្ឆិកា ហើយត្រូវបានប្រព័ន្ធផ្សព្វផ្សាយ និងបណ្ដាសង្គមនានាយកទៅផ្សព្វផ្សាយបន្តយ៉ាងព្រោងព្រាត ដែលជាការជួនដំណឹងដល់ប្រជាពលរដ្ឋទូទាំងខេត្ត ឲ្យមានការប្រុងប្រយ័ត្ន ចំពោះជំងឺដ៏កាចសាហាវនេះ ដែលក្រសួងសុខាភិបាលប្រកាសអាសន្នថា «ជំងឺនេះបាននិងកំពុងផ្ទុះឡើងជាថ្មី និង បានរីករាលដាលដល់សហគមន៍ទៀតផង»។
សេចក្ដីប្រកាសព័ត៌មានរបស់រដ្ឋបាលខេត្តបាត់ដំបងនេះ ធ្វើឡើងដោយយោងតាមសេចក្ដីប្រកាសព័ត៌មានរបស់ក្រសួងសុខាភិបាល ដែលក្រសួងនេះ បានប្រកាសថា «មានករណីវិជ្ជមានវីរុស កូវីដ១៩ ថ្មីជាការឆ្លងចូលសហគមន៍ ហើយត្រូវបានរកឃើញនៅថ្ងៃទី២៨ និង ២៩ វិច្ឆិកា ២០២០ នេះ»។ ស្ថិតក្នុងស្ថានភាពនេះ រដ្ឋបាលខេត្ត បានធ្វើការអំពាវនាវដល់ប្រជាពលរដ្ឋ និងបានណែនាំអំពីវិធានការការពារនានារបស់ក្រសួងសុខាភិបាល ដើម្បីចៀវវាងការឆ្លងរាលដាល នៃមេរោគកំណាចនេះដល់សហគមន៍។
ប៉ុន្តែអ្វីធ្វើឲ្យពលរដ្ឋនៅក្នុងខេត្តបាត់ដំបង កំពុងភ័យស្ទើរសភ្នែកលាយឡំនិងក្ដីបារម្ភកាន់តែខ្លាំងនោះ បន្ទប់ពីលេចឮដំណឹងថា ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៏ និងសមាជិកគ្រួសារមួយចំនួន ដែលបានប៉ះពាល់ផ្ទាល់ជាមួយអ្នកជំងឺកូវីដ១៩ នេះ នៅរាជធានីភ្នំពេញ បានមកចូលរួមពិធីមង្គលការដ៏អធិកអធ័មកាលពីប៉ុន្មានថ្ងៃមុននេះ នៅក្នុងខេត្តបាត់ដំបង។ ព័ត៌មាននេះ ត្រូវបានគេបង្ហោះព្រោតព្រាត នៅព្រឹកថ្ងៃទី៣០ វិច្ឆិកា តាមប្រព័ន្ធផ្សព្វផ្សាយ និងតាមបណ្ដាញសង្គមផង ហើយថែមទាំងបានភ្ជាប់ជាមួយ នូវរូបថតសែលហ្វីជាមួយមន្ត្រី និង មនុស្សមួយចំនួនដែលគេសង្ស័យកំពុងមាន«វិជ្ជមានកូវីដ១៩»នោះទៀតផង។
ពាក់ព័ន្ធនឹងការផ្ទុះកក្រើកឡើងវិញ នូវវីរុសកូវីដ១៩ជាថ្មី រហូតឈានចូលដល់សហ
គមន៍នេះ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាប៉ុន្មានថ្ងៃចុងក្រោយនេះ ហាក់បានប្រកាសអាសន្នស្ទើរទូទាំងប្រទេសទៅហើយ ឲ្យអាជ្ញាធរខេត្ត រាជធានី និង ស្ថានប័នរដ្ឋនានា ត្រូវមានវិធានការទប់ស្គាត់ ការពារ ហើយថែមទាំងចេញបំរាមបិតផ្សារទំនើប បិទសាលារដ្ឋ និងឯកជនមួយចំនួនទៀតផង។ ដោយឡែក សម្រាប់ខេត្តបាត់ដំបង ដែលពាក់ព័ន្ធនឹងកូវីដ១៩នេះ បើយោងលើសារជាសំឡេងរបស់សម្ដេច
តេជោ ហ៊ុន សែន សម្ដេចបានជម្រុញឲ្យអាជ្ញាធរខេត្តនេះ ត្រូវស្វែងរកឲ្យឃើញអ្នកដែលពាក់ព័ន្ធទាំងអស់ នៅក្នុងថ្ងៃដែលឯកឧត្តម កើត រិទ្ធ អញ្ជើញទៅចូលរួមពិធីមង្គលការនៅក្នុងខេត្តនេះ កាលពីប៉ុន្មានថ្ងៃមុន។
នៅក្នុងសារជាសំឡេងនោះ សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ខ្ញុំសូមអំពាវនាវចំពោះខេត្តបាត់ដំបង ដោយសារតែ ឯកឧត្តម កើត រិទ្ធ បានទៅចូលរូមពីធីមង្គលការនៅទីនោះ..។ ប៉ុន្តែថ្ងៃនេះ ខ្ញុំពិនិត្យឃើញថា បាត់ដំបង ទើបយកសំណាកបានត្រិមតែ០៦នាក់ប៉ុណ្ណោះ បើប្រៀបធៀបជាមួយខេត្តបន្ទាយមានជ័យ ដែលយកបានរាប់រយសំណាកឯណោះ។ ដូច្នេះ នេះជាមួយតិចណាស់»។ សម្ដេចបានដាស់តឿនឲ្យអាជ្ញាធរខេត្តបាត់ដំបង និង ខេត្តដទៃទៀត ដែលពាក់ព័ន្ធ ត្រូវធ្វើការប្រុងប្រយ័ត្ន និង បានជម្រុញឲ្យស្វែងរកឲ្យឃើញជាមួយអ្នកពាក់ព័ន្ធ។ ជាមួយគ្នានេះ សម្ដេចតេជោ ក៏បានអំពាវជាពិសេស ចំពោះប្រជាពលរដ្ឋដែលពាក់ព័ន្ធ ឲ្យប្រញ៉ាប់ប្រញ៉ាលទៅធ្វើតេស្ដ នៅមន្ទីរពេទ្យនានា ដោយមិនបង់ប្រាក់ឡើយ។
កោះសន្តិភាពមិនអាចសុំការបំភ្លឺពីលោក វឿង ប៊ុនរ៉េត ប្រធានមន្ទីរសុខាភិបាលខេត្តបានទេ នៅព្រឹកថ្ងៃទី៣០ វិច្ឆិកា ជុំវិញស្ថានភាពជំងឺ«កូវីដ១៩» នៅក្នុងខេត្តបាត់ដំបង ដោយសារទូរស័ព្ទរបស់លោកគ្មានអ្នកទទូល ។ ប៉ុន្តែបើតាមប្រភពពីមន្ត្រីពេទ្យបានប្រាប់ថា នៅព្រឹកថ្ងៃទី៣០ វិច្ឆិកា នេះ មន្ត្រីពេទ្យជំនាញ បាននិងកំពុងធ្វើតេស្ដលើមនុស្សជាច្រើន ក្នុងនោះ ក៏មានមន្ត្រីរាជការដែលពាក់ព័ន្ធផងដែរ ហើយលោកប្រធានមន្ទីរសុខាភិបាល ក៏កំពុងមមាញឹកខ្លាំងណាស់ដែរអំពីដំណើរការធ្វើតេស្ដលើអ្នកពាក់ព័ន្ធនេះ។
មន្ត្រីដដែលបានបញ្ជាក់ថា គេមិនទាន់ដឹងពីចំនួនអ្នកបានធ្វើតេស្ដនៅឡើយទេ ព្រោះពេលនេះ បុគ្គលិកពេទ្យកំពុងបន្តនីតិវិធីយ៉ាងមមាញឹកនៅឡើយ។ យ៉ាងណាក៏ដោយ តាមរយៈសេចក្ដីប្រកាសព័ត៌មានរបស់រដ្ឋបាលខេត្ត អាជ្ញាធរខេត្ត បានណែនាំដល់ប្រជាពលរដ្ឋត្រូវធ្វើអនាម័យជាប្រចាំ ត្រូវពាក់ម៉ាស់ ត្រូវរក្សាគម្លាតសុវត្ថិភាពសង្គម និង គម្លាតសុវត្ថិភាពបុគ្គល ហើយមិនត្រូវចេញទៅជួបជុំកម្មវិធីអ្វីឡើយ បើគ្មានការចាំបាច់។
ហើយបើមានការសង្ស័យទៅលើជំងឺនេះ សូមមកកាន់មន្ទីរពេទ្យបង្អែកខេត្តបាតដំបង និង មកកាន់ផ្នែកបណ្ដុះបណ្ដាលបន្ត មន្ទីរសុខាភិបាល នៃរដ្ឋបាលខេត្ត ជាបន្ទាន់ ដើម្បីយកសំណាកទៅពិនិត្យនៅវិទ្យាស្ថានប៉ាស្ទ័រ ហើយរដ្ឋាភិបាលមិនតម្រូវឲ្យបង់ថវិកាអ្វីទាំងអស់។ ពោល គឺយកសំណាកទៅពិនិត្យដោយឥតបង់ថ្លៃឡើយ៕
ចែករំលែកព័តមាននេះ