រាជធានីភ្នំពេញ ៖ បុរសជាកម្មករសំណង់២នាក់អង្គុយចុចទូរស័ព្ទលេងនៅខាងមុខការដ្ឋានសំណង់ ក្រោយពេលចប់ម៉ោងធ្វើការ ស្រាប់តែត្រូវក្រុមជនសង្ស័យធ្វើសកម្មភាពឆក់យកទូរស័ព្ទដៃបានសម្រេច កាលពីវេលាម៉ោង១១និង១០នាទីយប់ថ្ងៃទី២៧ ខែវិច្ឆិកា ឆ្នាំ២០២០ ត្រង់ចំណុចខាងមុខការដ្ឋានសំណង់មួយកន្លែង តាមបណ្ដោយផ្លូវ៣២០…
រាជធានីភ្នំពេញ ៖ បុរសជាកម្មករសំណង់២នាក់អង្គុយចុចទូរស័ព្ទលេងនៅខាងមុខការដ្ឋានសំណង់ ក្រោយពេលចប់ម៉ោងធ្វើការ ស្រាប់តែត្រូវក្រុមជនសង្ស័យធ្វើសកម្មភាពឆក់យកទូរស័ព្ទដៃបានសម្រេច កាលពីវេលាម៉ោង១១និង១០នាទីយប់ថ្ងៃទី២៧ ខែវិច្ឆិកា ឆ្នាំ២០២០ ត្រង់ចំណុចខាងមុខការដ្ឋានសំណង់មួយកន្លែង តាមបណ្ដោយផ្លូវ៣២០ ស្ថិតក្នុងសង្កាត់បឹងកេងកងទី៣ ខណ្ឌបឹងកេងកង រាជធានីភ្នំពេញ ។
តាមសម្តីពីបុរសម្នាក់ដែលជាជនរងគ្រោះឈ្មោះ ភ័ក្តិ អាយុ២២ឆ្នាំ ជាកម្មករសំណង់ ស្នាក់នៅក្នុងការដ្ឋានសំណង់កើតហេតុខាងលើបានរៀបរាប់ប្រាប់ឲ្យដឹងថា ក្រោយពីចប់ម៉ោងការងារហើយ ដោយមិនទាន់ងងុយដេក គាត់និងជនរងគ្រោះម្នាក់ទៀតដែលជាអ្នកធ្វើការជាមួយគ្នា បាននាំគ្នាចេញទៅអង្គុយលេងយកខ្យល់អាកាសនៅខាងមុខការដ្ឋាន។
តាមប្រភពដដែលបានបន្តថា ពេលនោះពួកគាត់ទាំងពីរនាក់បានយកទូរស័ព្ទម្នាក់មួយគ្រឿងមកចុចលេង លុះដល់វេលាម៉ោងកើតហេតុ ក៏ស្រាប់តែមានជនសង្ស័យម្នាក់បានធ្វើដំណើរដោយថ្មើរជើង តាមបណ្ដោយផ្លូវ៣២០ ក្នុងទិសដៅពីកើតទៅលិចបានធ្វើសកម្មភាពឆក់យកទូរស័ព្ទដៃទាំងពីរគ្រឿងពីពួកគាត់បានសម្រេច ហើយជនសង្ស័យក៏ព្យាយាមរត់ឡើងជិះម៉ូតូកង់បីមួយគ្រឿងរបស់បក្ខពួកពីរនាក់ទៀតដែលឈប់ចាំនៅកែងផ្លូវ៦៣ រួចក៏នាំគ្នាជិះគេចខ្លួន ។
តាមប្រភពដដែលបានបន្តទៀតថា ភ្លាមៗនោះពួកគាត់ក៏ស្រែក«ចោរៗ» រត់ដេញតាមពីក្រោយ ស្របពេលនោះដែលក៏មានបុរសបីនាក់ជិះម៉ូតូពីរគ្រឿងបានឃើញហេតុការណ៍បែបនេះ ក៏បានជួយដឹកពួកគាត់ទាំងពីរនាក់ជិះដេញតាមពីក្រោយក្រុមជនសង្ស័យ រហូតទៅដល់ចំណុចខាងក្រោយសាលាបឋមសិក្សាជ័យជំនះ តាមបណ្ដោយផ្លូវ៣៨៦ ស្ថិតក្នុងសង្កាត់បឹងកេងកងទី២ ខណ្ឌបឹងកេងកង ហើយពួកគាត់ក៏បានតាមទាន់ជនសង្ស័យ និងមានការប្រតាយប្រតប់គ្នា បណ្តាលឲ្យជនសង្ស័យម្នាក់បានដាច់ខ្សែកជ្រុះនៅកន្លែងកើតហេតុ និងបណ្តាលឲ្យបុរសម្នាក់រងរបួសកែងដៃខាងឆ្វេង។ ចំណែកជនសង្ស័យក៏បាននាំគ្នាគេចខ្លួនបាត់ស្រមោលតែម្តង។
ក្រោយពេលកើតហេតុ សមត្ថកិច្ចមូលដ្ឋានក៏បានចុះមកធ្វើការអន្តរាគមន៍បាននាំជនរងគ្រោះ រួមទាំងវត្ថុតាងរបស់ជនសង្ស័យដែលបន្សល់ទុកទៅកាន់ប៉ុស្តិ៍នគរបាលរដ្ឋបាលបឹងកេងកងទី៣ដាក់ពាក្យបណ្ដឹងនិងស្រាវជ្រាវតាមចាប់ក្រុមជនសង្ស័យយកមកផ្តន្ទាទោសទៅតាមផ្លូវច្បាប់ជាបន្តទៀត៕ (កែសម្រួលដោយ ៖ ធីតា)
ចែករំលែកព័តមាននេះ