ស្ត្រីមានផ្ទៃពោះ ឬស្ត្រីទើបតែមានផ្ទៃពោះថ្មីៗ ដែលមានវ័យចំណាស់ លើសទម្ងន់ និងមានបញ្ហាសុខភាពប្រចាំកាយដូចជា ជំងឺលើសឈាម និងទឹកនោមផ្អែម ហាក់ដូចជាមានការកើនឡើងហានិភ័យនៃការវិវត្តទៅជាជំងឺកូវីដធ្ងន់ធ្ងរ ។ នេះបើយោងតាមការលើកឡើងរបស់គេហទំព័រផ្លូវការរបស់អង្គការសុខភាពពិភពលោក WHO ។ ម្យ៉ាងវិញទៀត នៅពេលដែលស្ត្រីមានផ្ទៃពោះកើតកូវីដ ពួកគេប្រឈមនឹងការទៅសម្រាកនៅកន្លែងសង្គ្រោះជំងឺធ្ងន់ជាងអ្នកដែលគ្មានផ្ទៃពោះ ។
ដោយសារតែការប្រែប្រួលក្នុងរាងកាយ និងប្រព័ន្ធភាពស៊ាំរបស់ស្ត្រីមានផ្ទៃពោះ ពួកគេអាចរងផលប៉ះពាល់យ៉ាងធ្ងន់ធ្ងរដោយការឆ្លងមេរោគផ្លូវដង្ហើមមួយចំនួន ។ ដូចនេះវាសំខាន់ណាស់ដែលពួកគេត្រូវប្រុងប្រយ័ត្នដើម្បីការពារខ្លួនពីជំងឺកូវីដ-១៩ ហើយរាយការណ៍អំពីរោគសញ្ញាអាចកើតមាន (រាប់បញ្ចូលទាំងគ្រុនក្តៅ ក្អក ឬពិបាកដកដង្ហើម) ទៅកាន់អ្នកផ្តល់សេវាថែទាំសុខភាព ។
ស្ត្រីមានផ្ទៃពោះ គួរតែមានការប្រុងប្រយ័ត្នដោយការពារខ្លួនដោយអនុវត្តវិធីដូចខាងក្រោម ៖
-លាងដៃរបស់អ្នកឱ្យបានញឹកញាប់ជាមួយនឹងទឹកអាល់កុល សាប៊ូ និង ទឹក ។
-រក្សាគម្លាតសង្គម និងចៀសវាងពីកន្លែងដែលមានមនុស្សច្រើន ។
-ពាក់ម៉ាស់នៅពេលចេញទៅក្រៅ ។
-ចៀសវាងការប៉ះភ្នែកច្រមុះ និងមាត់របស់អ្នក ។
-អនុវត្តអនាម័យផ្លូវដង្ហើម ។ នេះមានន័យថា គ្របមាត់ និងច្រមុះរបស់អ្នកដោយកែងដៃ ឬក្រដាសជូតមាត់នៅពេលអ្នកក្អក ឬកណ្តាស់ ។ បន្ទាប់មកបោះចោលក្រដាសដែលបានប្រើភ្លាមៗ ។
ប្រសិនបើស្ត្រីមានផ្ទៃពោះមានអាការៈក្តៅខ្លួន ក្អក ឬពិបាកដកដង្ហើម ត្រូវស្វែងរកការព្យាបាលភ្លាមៗ ។ ទូរស័ព្ទមុនពេលទៅមណ្ឌលសុខភាព ហើយធ្វើតាមការណែនាំរបស់អាជ្ញាធរសុខាភិបាលក្នុងតំបន់ ។
ជាមួយនឹងការការពារនេះផងដែរ ស្ត្រីមានផ្ទៃពោះគួរគប្បីរក្សាអារម្មណ៍របស់ខ្លួនកុំឱ្យភ័យខ្លាចជ្រុល ហើយអនុវត្តការពារដូចការរៀបរាប់ខាងលើ ក៏ដូចជាបន្តការថែទាំគភ៌ឱ្យមានសុខភាពល្អ ដែលរួមមានការប្រើប្រាស់វីតាមីនមុនពេលមានផ្ទៃពោះ (Prenatal Vitamin) ការធ្វើលំហាត់ប្រាណ ការឈប់ប្រើប្រាស់គ្រឿងប៉ះពាល់ដល់សុខភាព ការប្រុងប្រយ័ត្ននឹងថ្នាំដែលលេប និងជាពិសេសត្រូវផឹកទឹកឱ្យបានច្រើនជាមួយនឹងទឹកពិសាគុណភាពខ្ពស់ ៕ ប្រភព ៖ who.int
ចែករំលែកព័តមាននេះ