រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសអំពាវនាវដល់ពលរដ្ឋខ្មែរ ដែល សង្ស័យពាក់ព័ន្ធជាមួយអ្នកកូវីដ-១៩ ឬក៏បានប្រាស្រ័យទាក់ទងជាមួយភរិយា និងក្រុមគ្រួសារលោកអគ្គនាយកនៃអគ្គនាយកដ្ឋានពន្ធនាគារ ដែលរកឃើញកើតកូវីដ-១៩ សូមរួសរាន់ និងស្ម័គ្រចិត្តមកពិនិត្យ យកសំណាកធ្វើតេស្តរកកូវីដ-១៩។
សម្តេចតេជោបានបញ្ជាក់យ៉ាងច្បាស់ៗថា សូមបងប្អូនខ្មែរទាំងអស់ស្ម័គ្រចិត្តមកធ្វើតេស្ត ហើយកុំព្រួយថា មានការយកលុយកាក់ពីពលរដ្ឋនោះ គឺគ្មានការយកលុយកាក់នោះទេ។ ព្រោះរាជរដ្ឋាភិបាលគិតគូរពីសុវត្ថិភាព និងសុខភាពពលរដ្ឋ ដូច្នេះសូមសហការទាំងអស់គ្នា ដើម្បីការពារការឆ្លងបន្តក្នុងសហគមន៍។ ក្នុងសារជាសំឡេងជូនជនរួមជាតិ នៅយប់ថ្ងៃទី២៩ ខែវិច្ឆិកានេះ សម្តេចតេជោ ហ៊ុន សែន បានលើកឡើងថា បន្ទាប់ពីរកឃើញលទ្ធផលវិជ្ជមានភរិយារបស់អគ្គនាយកពន្ធនាគារ ឆ្លងជំងឺកូវីដ-១៩ រួចមក មកដល់ពេលនេះរកឃើញវិជ្ជមានកូវីដ ២ករណីបន្ថែម។
ដូច្នេះសម្តេចតេជោ ហ៊ុន សែន បានប្រកាសអំពាវនាវជាថ្មីឲ្យមន្ត្រី និងប្រជាពលរដ្ឋ ស្ម័គ្រចិត្ត ចូលមកធ្វើតេស្ត និងធ្វើចត្តាឡីស័ក ព្រោះនេះជាវិធីតែមួយគត់ ដែលអាចសង្គ្រោះសាមីខ្លួនមិនឲ្យឆ្លង ហើយមិនយកកូវីដ ទៅចម្លងអ្នកដទៃ។ ក្នុងករណីមន្ត្រីពាក់ព័ន្ធ ឬប្រជាពលរដ្ឋ មិនមានផ្ទះសម្បែង ដើម្បីធ្វើចត្តាឡីស័កឲ្យបានត្រឹមត្រូវ សម្តេចតេជោបានណែនាំដល់អភិបាលរាជធានីខេត្ត សហការជាមួយក្រសួងសុខាភិបាល រកទីកន្លែង ឬជួលសណ្ឋាគារ ធ្វើជាមណ្ឌលចត្តាឡីស័ក។ ទាំងការធ្វើតេស្ត និងស្នាក់នៅធ្វើចត្តាឡីស័ក រយៈពេល១៤ថ្ងៃនេះ គឺមិនគិតថ្លៃអ្វីទាំងអស់។
សម្តេចតេជោក៏បានឲ្យដឹងផងដែរថា នៅថ្ងៃទី២៩ វិច្ឆិកានេះ ការធ្វើតេស្តអ្នកពាក់ព័ន្ធករណីក្រុមគ្រួសារអគ្គនាយកពន្ធនាគារបានជាង ៣០០០នាក់។ នៅថ្ងៃស្អែកនឹងបន្តនៅអ៊ីអន១ ប្រមាណ ១ ០០០នាក់ទៀត និងនៅក្រសួងមហាផ្ទៃ។ ប៉ុន្តែនៅខេត្តមួយចំនួនដូចជា នៅបាត់ដំបង និងនៅខេត្តសៀមរាប បានតិចតួចនៅឡើយ។ នៅបាត់ដំបង ដែលរដ្ឋមន្ត្រីយុត្តិធម៌ ឯកឧត្តម កើត រិទ្ធ ទៅចូលរួមពិធីមង្គលការ ទើបបាន៦នាក់ ហើយនៅខេត្តសៀមរាប ទើបធ្វើតេស្តបានជាង ៤០នាក់។ ដូច្នេះសម្តេច អំពាវនាវឲ្យអាជ្ញាធរខេត្តបាត់ដំបង និងខេត្តសៀមរាប ព្រមទាំងខេត្តពាក់ព័ន្ធដទៃ បន្តសកម្មភាពស្រាវជ្រាវរកអ្នកពាក់ព័ន្ធ ព្រមទាំងអំពាវនាវឲ្យប្រជាពលរដ្ឋ ដែលជាអ្នកពាក់ព័ន្ធ ចូលមកធ្វើតេស្តឲ្យបានគ្រប់ៗគ្នា៕ ដោយ ៖ សហការី
ចែករំលែកព័តមាននេះ