ខេត្តកណ្ដាល ៖ ជាអ្នកស្រុករស់នៅជិតខាងគ្នាមិនគួរណាធ្វើអំពើចោរកម្មបែបនេះសោះ បន្ទាប់ពីយុវជនម្នាក់ត្រូវបានកម្លាំងសមត្ថកិច្ចនគរបាលមូលដ្ឋានស្រុកស្អាង ខេត្តកណ្តាលឃាត់ខ្លួន កាល ពីថ្ងៃទី២៨ ខែវិច្ឆិកា ឆ្នាំ២០២០ ដោយជាប់ពាក់ព័ន្ធករណីអំពើលួច (សត្វទា) ក្រោយពីជនសង្ស័យបានលួចទារស់ពីអ្នកស្រុកដូចគ្នា រួចបោចរោមម៉ាស្អាត បំរុងឆ្អើរយកទៅលក់ ក៏ត្រូវចាប់ ខ្លួនតែម្តង។
ជនសង្ស័យខាងលើឈ្មោះ ខ្នា ផល្លា ភេទប្រុស អាយុ២៤ឆ្នាំ មុខរបរមិនពិតប្រាកដ មានទីលំនៅភូមិព្រែកតាជ័រ ឃុំស្វាយប្រទាល ស្រុកស្អាង ខេត្តកណ្ដាល (ជនរូបនេះធ្លាប់ជាប់ពន្ធនាគារខេត្តកណ្ដាល ១លើក រយៈពេល៤ខែ ពីបទ.ធ្វើឲ្យខូចខាតដោយចេតនា) ក្រោយមកត្រូវបានដោះឲ្យមានសេរីភាពវិញ ។ ចំណែកជនរងគ្រោះដែលជាម្ចាស់ទាឈ្មោះ ធន់ ហ៊ ភេទប្រុស អាយុ៤៤ឆ្នាំ ជាអ្នករស់នៅស្រុកភូមិជាមួយគ្នា រីឯវត្ថុតាងចាប់យកបានមកវិញ គឺសត្វទា៥ក្បាល (ងាប់ទាំងអស់) ។
ពាក់ព័ន្ធនឹងករណីខាងលើនេះ សមត្ថកិច្ចបានឲ្យដឹងថា វេលាម៉ោង២ទៀបភ្លឺ ថ្ងៃទី២៨ ខែវិច្ឆិកា ជនសង្ស័យឈ្មោះ ខ្នា ផល្លា បានចូលទៅលួចសត្វទានៅផ្ទះរបស់ឈ្មោះ ធន់ ហ៊ ។ លុះដល់ម៉ោង៩និង៣០នាទីព្រឹកថ្ងៃដដែលនោះ ជនរងគ្រោះបានទៅរាយការណ៍ជូនសមត្ថកិច្ចនគរបាលប៉ុស្តិ៍រដ្ឋបាលស្វាយប្រទាល ។
ក្រោយពីទទួលបានព័ត៌មានភ្លាម កម្លាំងសមត្ថកិច្ចប៉ុស្ដិ៍ស្វាយប្រទាល ក៏បាននាំខ្លួនជនសង្ស័យ រួមទាំងវត្ថុតាងមកកាន់ស្នាក់ការប៉ុស្ដិ៍ដើម្បីសាកសួរ ។ លុះនៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពលួចសត្វទាចំនួន៥ក្បាលពីផ្ទះជនរងគ្រោះពិតប្រាកដមែន ។ ហើយសត្វទានោះបានបោចរោមរួចហើយ បម្រុងឆ្អើរ រួចយកទៅលក់ទៀតផង តែត្រូវសមត្ថកិច្ចឃាត់ខ្លួនតែម្តង ។ បន្ទាប់មកជនសង្ស័យ និងវត្ថុតាងត្រូវបានសមត្ថកិច្ចបញ្ជូនអធិការដ្ឋាននគរបាលស្រុកស្អាង ដើម្បីចាត់ការបន្ត ៕
ចែករំលែកព័តមាននេះ