រាជធានីភ្នំពេញ ៖ យុវជនម្នាក់គ្មានការងារធ្វើ ក៏បានជិះកង់ដើរធ្វើសកម្មភាពលួចស្លាកលេរថយន្ត ប៉ុន្តែនៅពេលលួចបានយកទៅលក់ឱ្យអ្នកចាំទទួលទិញ ហើយគេមិនទាន់ទាំងឲ្យលុយផង ក៏ត្រូវសមត្ថកិច្ចក្របួចជាប់នៅថ្ងៃទី២៦ ខែវិច្ឆឹកា ឆ្នាំ២០២០ នោះតែម្តង ។
ជនសង្ស័យខាងលើនេះឈ្មោះ ចាន់ តុលា ហៅឡា ភេទប្រុស អាយុ២៧ឆ្នាំ មុខរបរ និងស្នាក់នៅមិនពិតប្រាកដ ។
ពាក់ព័ន្ធនឹងករណីខាងលើនេះ ត្រូវបានលោកវរសេនីយ៍ឯក ប៊ុន សន្យា នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ឲ្យដឹងថា កាលពីយប់ថ្ងៃទី២៥ ខែវិច្ឆិកា ឆ្នាំ២០២០ មានអំពើចោរលួចស្លាកលេខរថយន្តមួយកើតឡើងនៅចំណុចមុខផ្ទះលេខ៥៤អឺ០ ផ្លូវលេខ៥១ សង្កាត់ផ្សារថ្មី៣ ខណ្ឌដូនពេញ ដែលបង្កដោយជនសង្ស័យម្នាក់មធ្យោបាយជិះកង់បានទៅលួចដោះយកស្លាកលេខរថយន្តមួយគ្រឿង ម៉ាកTOYOTA FORTUNER ពណ៌ស ពាក់ស្លាកលេខ ភ្នំពេញ២.A Q៨៨៥៩ ដែលម្ចាស់គេចតនៅមុខផ្ទះ។
លោកនាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បន្តថា បន្ទាប់ពីមានអំពើចោរកម្មលួចដោះយកស្លាកលេខរថយន្តខាងលើនោះ ម្ចាស់បានដឹង និងបានឆែកមើលកាមរ៉ាសុវត្ថិភាព ទើបឃើញពីសកម្មភាព និងភិនភាគចោរ រួចក៏បានបង្ហោះរូបភាពលើបណ្តាញសង្គមហ្វេសប៊ុកតៗគ្នា ។
ពេលនោះសមត្ថកិច្ចជំនាញក៏បានបើកការស៊ើបអង្កេត និងស្រាវជ្រាវ រហូតដល់យប់ថ្ងៃទី២៦ ខែវិច្ឆិកា ក៏ឈានដល់ការឃាត់ខ្លួនជនសង្ស័យម្នាក់ នៅចំណុចក្រោយវត្តឧណ្ណាលោម តាមបណ្តោយផ្លូវលេខ១៧២ សង្កាត់ជ័យជំនះ ខណ្ឌដូនពេញ និងដកហូតកង់១គ្រឿងដែលជាមធ្យោបាយរបស់ជនសង្ស័យ ដើម្បីជិះធ្វើសកម្មភាពផងដែរ ។
ក្រោយពីឃាត់ខ្លួនជនសង្ស័យខាងលើ ទើបម្ចាស់រថយន្តបានទៅដាក់ពាក្យបណ្តឹង ដែលមានឈ្មោះ ឡាយ សៅ ភេទប្រុស អាយុ៤០ឆ្នាំ មានទីលំនៅផ្ទះលេខ៦អា ផ្លូវបេតុង ភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ មុខរបរបុគ្គលិកក្រុមហ៊ុន ។
ហើយនៅចំពោះមុខសមត្ថកិច្ចជនសង្ស័យរូបនេះ បានសារភាពថា នៅវេលាម៉ោងប្រហែល១កន្លះយប់ ថ្ងៃទី២៥ ខែវិច្ឆិកា ខ្លួនបានជិះកង់ម្នាក់ឯងចេញទៅធ្វើសកម្មភាពលួចទ្រព្យសម្បត្តិប្រជាពលរដ្ឋក្នុងរាជធានីភ្នំពេញ លុះពេលទៅដល់ចំណុចខាងលើ ខ្លួនក៏បានឃើញគេចតរថយន្តទុកចោល ហើយយប់ស្ងាត់ផង ក៏បានប្រើដែកទួលឡឺវីសលួចដោះយកស្លាកលេខរថយន្តនោះ ទាំងមុខក្រោយតែម្តងទៅ រួចក៏បានជិះកង់គេចខ្លួន។ លុះព្រឹកឡើងបានទូរស័ព្ទទាក់ទងទៅរកអ្នកទិញស្លាកលេខរថយន្ត និងបានណាត់ជួបគ្នាដើម្បីទិញលក់ក្នុងតម្លៃ៣០ដុល្លារអាមេរិក ។
ជនសង្ស័យខាងលើផ្តល់ចម្លើយបន្តថា នៅពេលដែលលក់ស្លាកលេខរថយន្តដែលលួចបាននោះ អ្នកទិញមិនទាន់ឲ្យលុយភ្លាមៗទេ ដោយគេសន្យាថា នឹងយកទៅលក់សិន ពេលបានលុយចាំយកមកឲ្យ ប៉ុន្តែទីបំផុតលក់ស្លាកលេខរថយន្តលួចនោះ មិនទាន់បានលុយផង ក៏ត្រូវសមត្ថកិច្ចចាប់ខ្លួនតែម្តង ។
ក្រោយពេលស្តាប់ចម្លើយសារភាពរបស់ជនសង្ស័យរួចហើយ ក៏ត្រូវបានសមត្ថកិច្ចកសាងសំណុំរឿង រួចបញ្ជូនជនសង្ស័យរូបនេះទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ