ខេត្តកំពង់ឆ្នាំង ៖ មានការភ្ញាក់ផ្អើលមួយទាំងព្រឹកព្រលឹម ដោយសារគេបានប្រទះឃើញ សាកសពបុរសម្នាក់អណ្ដែតតាមទឹកទន្លេមកទើរនៅចំណុចកំពង់ផែថ្មី ចុងកោះ នៅក្នុងភូមិទី7 សង្កាត់ខ្សាម ក្រុងកំពង់ឆ្នាំង ដែលហេតុការណ៍នេះបានកើតឡើង នៅវេលាម៉ោង 7 និង30នាទីព្រឹក ថ្ងៃទី28 ខែវិច្ឆិកា ឆ្នាំ 2020 ។
ជុំវិញករណីនេះដែរ ពីដំបូងឡើយ ពុំមាននរណាបានស្គាល់អត្តសញ្ញាណជនរងគ្រោះនោះទេ ។ យ៉ាងនេះក្តី សមត្ថកិច្ចបានព្យាយាមលើកយកសាកសពចេញពីក្នុងកំប្លោកយកមកដាក់លើគោកដើម្បីធ្វើកោសល្យវិច្ច័យ ។ រហូតដល់ម៉ោង ជាង12 ថ្ងៃត្រង់ ថ្ងៃដដែល សពជនរងគ្រោះ ត្រូវបានស្គាល់អត្ដសញ្ញាណហើយ តាមរយៈក្រុមគ្រួសារដែលបានបាត់សមាជិក គ្រួសាររយៈពេល 3 ថ្ងៃមកហើយ ។
ប្រភពពីសមត្ថកិច្ចនគរបាលក្រុងកំពង់ឆ្នាំងបានឲ្យដឹងថា សពជនរងគ្រោះមានឈ្មោះ យន់ ម៉ៅអាយុជាង 30ឆ្នាំ មានទីលំនៅភូមិកំពង់បឹង ឃុំកំពង់ហៅ ស្រុកកំពង់លែង ។ តាមការបញ្ជាក់ពីក្រុមគ្រួសារដែលមកទទួលសពបានឱ្យដឹងថា ជនរងគ្រោះបានបាត់ 3 ថ្ងៃមកហើយ ដោយមិនដឹងទៅណា ហើយក្រុមគ្រួសារក៏តាមរកដែរ តែពុំឃើញឡើយ ។
យ៉ាងនេះក្តី សមត្ថកិច្ចក្រោយពីពិនិត្យធ្វើកោសល្យវិច្ច័យពុំមានឃើញស្លាកស្នាមគួរឲ្យសង្ស័យជាអំពើឃាតកម្មនោះទេ តែសង្ស័យថា បណ្ដាលមកពីលង់ទឹក ។ សមត្ថកិច្ចនគរបាលបានប្រគល់សពទៅក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ