រាជធានីភ្នំពេញ ៖ ធនាគារអភិវឌ្ឍន៍អាស៊ី នៅថ្ងៃទី ២៧ វិច្ឆិកា ២០២០នេះ បានសម្រេចផ្ដល់ កម្ចី ៧០លានដុល្លារអាមេរិកដល់កម្ពុជា…
រាជធានីភ្នំពេញ ៖ ធនាគារអភិវឌ្ឍន៍អាស៊ី នៅថ្ងៃទី ២៧ វិច្ឆិកា ២០២០នេះ បានសម្រេចផ្ដល់ កម្ចី ៧០លានដុល្លារអាមេរិកដល់កម្ពុជា ដើម្បីពង្រឹងវិស័យកសិកម្ម និងសុវត្ថិភាពចំណីអាហារ ។ ទឹកប្រាក់នេះ គឺដើម្បីពង្រឹងសមត្ថភាព កសិពាណិជ្ជកម្ម ក្នុងខេត្តចំនួន ៦នៃទូទាំងប្រទេស សម្រាប់កែច្នៃផលិតផលកសិកម្មសំខាន់ៗ ដូចជាដំឡូងមី ស្វាយចន្ទី ស្វាយ បន្លែ និងមាន់ស្រែ ។
សេចក្តីប្រកាសព័ត៌មានធនាគារអភិវឌ្ឍន៍អាស៊ី បានឱ្យដឹងថា គម្រោងពង្រឹងការប្រកួត ប្រជែងខ្សែសង្វាក់តម្លៃ និងសមត្ថភាពក្នុងវិស័យកសិកម្មនេះ មានគោលបំណងផ្តល់អត្ថប្រ យោជន៍ដល់សហករណ៍កសិកម្មចំនួន ២៣០ និង សហគ្រាសកសិកម្មចំនួន ៥០ ក្នុងខេត្ត កំពង់ចាម កំពង់ធំ ឧត្តរមានជ័យ ព្រះវិហារ សៀមរាប និង ត្បូងឃ្មុំ ។
បើតាមលោក Takeshi Ueda សេដ្ឋវិទូជាន់ខ្ពស់ ផ្នែកធនធានធម្មជាតិ និងកសិកម្ម បានមានប្រសាសន៍ថា កសិកម្មអាចចូលរួមចំណែកដល់កំណើន និងការធ្វើពិពិធកម្មសេដ្ឋកិច្ច ក្នុងប្រទេសកម្ពុជា ប្រសិនបើសហគ្រាសកសិកម្មធុនតូច និងមធ្យម អាចបង្កើនសមត្ថភាព របស់ពួកគេ ក្នុងការកែច្នៃផលិតផលកសិកម្មដែលមានតម្លៃខ្ពស់ ហើយដាក់លក់លើទីផ្សារក្នុង និងក្រៅប្រទេស ។
លោកបន្តថា ការវិនិយោគឯកជនលើវិស័យកសិកម្ម រួមជាមួយការទទួលបានឥណ ទាន ព្រមទាំងផលិតផលកសិកម្មសម្រាប់កែច្នៃប្រកបដោយគុណភាពខ្ពស់នឹងជួយកសិពា ណិជ្ជកម្មរបស់កម្ពុជាបញ្ចេញសក្តានុពលរបស់ខ្លួន បង្កើតការងារ និងលើកកម្ពស់ជីវភាព ប្រជាពលរដ្ឋនៅទីជនបទ ។ បច្ចុប្បន្នប្រជាពលរដ្ឋកម្ពុជាប្រមាណ ៧៦% រស់នៅតាមតំបន់ជន បទ ក្នុងនោះកសិកម្មបានរួមចំណែក ២០,៧% នៃផលិតផលក្នុងស្រុកសរុប (GDP) និងបាន រួមចំណែកដល់ការងារសរុប ៣១,២% ក្នុងឆ្នាំ២០១៩ ។
គម្រោងឥណទានរបស់ធនាគារអភិវឌ្ឍន៍អាស៊ី នឹងជួយសម្រួលដល់ការទទួលបាន ឥណទាន សម្រាប់កសិកម្ម និងកសិពាណិជ្ជកម្ម ដែលកំពុងទទួលបានតែប្រមាណ ១០% នៃហិរញ្ញប្បទានផ្លូវការសរុប ។ គម្រោងនេះនឹងអនុវត្តប្រភេទហិរញ្ញវត្ថុ ដែលគាំទ្រគ្នាទៅវិញ ទៅមក រួមមានដូចជា ការផ្តល់ឥណទាន និងការធានាឥណទាន ជាដើម ។
បើតាម ADB គម្រោងនេះនឹងគាំទ្រគំនិតផ្តួចផ្តើម ដើម្បីពង្រឹងសុវត្ថិភាព និងគុណភាព ស្បៀងអាហារ ក្នុងខ្សែសង្វាក់តម្លៃសម្រាប់ ដំឡូងមី ស្វាយចន្ទី ស្វាយ បន្លែ និង សាច់មាន់ ស្រែ ។ វានឹងជួយឱ្យសហករណ៍ កសិកម្ម អនុវត្តសកម្មភាពកសិកម្មបានល្អ និងធ្វើឱ្យប្រសើរ នូវមន្ទីរពិសោធន៍សុវត្ថិភាពចំណីអាហារ ដើម្បី ទទួលបានការទទួលស្គាល់ជាអន្តរជាតិ ។ គម្រោងនេះក៏នឹងគាំទ្រដល់ការស្រាវជ្រាវ និងការអភិវឌ្ឍគ្រាប់ពូជ និងពូជបក្សីចញ្ចឹម ដោយ ជួយសហករណ៍កសិកម្មទទួលបានគ្រាប់ពូជ ផ្តល់ទិន្នផលខ្ពស់ ធន់នឹងគ្រោះរាំងស្ងួត ធន់នឹង ជំងឺ ក៏ដូចជាការគាំទ្រសម្ភារដាំដុះផ្សេងទៀត ។ លើសពីនេះទៀត គម្រោងនេះ នឹងជួយកែ លម្អផ្លូវជនបទប្រវែង ១១០ គីឡូម៉ែត្រ និងជួយភ្ជាប់កសិផលទៅទីផ្សារក្នុងតំបន់គោលដៅ នៃគម្រោង ។
គម្រោងនេះដែរ នឹងសាកល្បងនូវយន្តការហិរញ្ញប្បទានបៃតង ដែលគាំទ្រដោយប្រាក់ កម្ចីចំនួន ៥លានដុល្លារ ពីមូលនិធិហេដ្ឋារចនាសម្ព័ន្ធអាស៊ាន (ASEAN Infrastructure Fund) ។ ធនាគារអភិវឌ្ឍន៍ អាស៊ីក៏នឹងគ្រប់គ្រងប្រាក់កម្ចី ២៥លានដុល្លារ ពីទីភ្នាក់ងារអភិវឌ្ឍន៍របស់ បារាំង (Agence Française de Développement) និងជំនួយ ៣លានដុល្លារពីមូលនិធិជប៉ុន សម្រាប់ការកាត់បន្ថយភាពក្រីក្រ (Japan Fund for Poverty Reduction) ៕
ចែករំលែកព័តមាននេះ