ព្រះរាជអាជ្ញាអមសាលាដំបូងខេត្តចុះបង្ក្រាបបទល្មើសនេសាទ
- កំពង់ឆ្នាំង
ខេត្តកំពង់ឆ្នាំង ៖ ឯកឧត្តម អិុត សុធា ព្រះរាជអាជ្ញាអមសាលាដំបូងខេត្ត រួមនឹងមន្ត្រីតុលាការជាច្រើនរូប កាលពីថ្ងៃទី២៥ ខែវិច្ឆិកា ឆ្នាំ២០២០កន្លងទៅ…
ខេត្តកំពង់ឆ្នាំង ៖ ឯកឧត្តម អិុត សុធា ព្រះរាជអាជ្ញាអមសាលាដំបូងខេត្ត រួមនឹងមន្ត្រីតុលាការជាច្រើនរូប កាលពីថ្ងៃទី២៥ ខែវិច្ឆិកា ឆ្នាំ២០២០កន្លងទៅ បានចុះបង្ក្រាបការនេសាទខុសច្បាប់ដោយប្រើស្បៃមុង និងរបាំងសាច់អួនក្រឡាញឹក ធ្វើជារបាំងរាំងភ្ជិតព្រែកជាច្រើនកន្លែងក្នុងភូមិសាស្ត្រស្រុកជលគីរី និងបានណែនាំម្ចាស់របាំងទាំងនោះ ឲ្យបញ្ឈប់សកម្មភាពចាប់ត្រីដោយខុសច្បាប់បែបនេះទៀត ។
តាមប្រភពពីមន្ត្រីតុលាការបានឱ្យដឹងថា ដោយសង្កេតឃើញថា ត្រីល្អិតជាច្រើនតោនក្នុងមួយថ្ងៃៗត្រូវបានក្រុមអ្នកនេសាទដាក់ដាយកាត់ព្រែក ប្រើឧបករណ៍សាច់អួនក្រឡាញឹក និងរបាំងស្បៃមុងខុសច្បាប់ជាច្រើនកន្លែង ក្នុងភូមិសាស្ត្រស្រុកជលគីរី ទើបនៅថ្ងៃទី២៥ ខែវិច្ឆិកាឯកឧត្តម អិុត សុធា ព្រះរាជអាជ្ញាអមសាលាដំបូងខេត្ត ដឹកនាំកម្លាំងចុះបង្ក្រាបបទល្មើសនេសាទទាំងនោះ ។
ជាមួយនេះ ក៏បានធ្វើការណែនាំដល់ប្រជានេ សាទ កុំដាក់សាច់អួនក្រឡាញឹក របាំងស្បៃមុង និងប្រើប្រាស់ឧបករណ៍នេសាទខុស ច្បាប់ ដែលធ្វើឲ្យប៉ះពាល់ដល់ត្រីល្អិតៗ ដែលអាចប្រឈមនឹងការដាច់ពូជមិនខាន ។
ក្នុងការពិនិត្យឃើញជាក់ស្តែងពីការចាប់កូនត្រីល្អិតជាច្រើនដែលជាប់ស្បៃមុងនេះដែរ ឯកឧត្តមព្រះរាជអាជ្ញា ក៏បានបញ្ជាឱ្យចាក់លែងកូនត្រីទាំងនោះចូលទន្លេវិញ និងឱ្យម្ចាស់របាំងរើរបាំងស្បៃមុង និងរបាំងសាច់អួនក្រឡាញឹកចេញ ដើម្បីឱ្យត្រីហូរធ្លាក់ចូលទន្លេបន្តពូជធំធាត់វិញផងដែរ ។
ជាមួយគ្នានេះ ឯកឧត្តម អិុត សុធា បានធ្វើការអំពាវនាវនិងណែនាំដល់ប្រជានេសាទទាំងអស់នៅតាមដងទន្លេ សូមកុំនេសាទខុសនឹងច្បាប់ដែលបានហាមឃាត់ ព្រោះវាធ្វើឱ្យអស់ត្រីនៅក្នុងបឹង ក្នុងទន្លេ និងមួយវិញទៀត បងប្អូនត្រូវប្រឈមមុខនឹងផ្លូវច្បាប់ទៀតផង ។ សូមបងប្អូនចូលរួមថែរក្សាធនធានមច្ឆជាតិទាំងអស់គ្នា ៕
ចែករំលែកព័តមាននេះ