រាជធានីភ្នំពេញ ៖ កម្លាំងនគរបាលផ្នែកព្រហ្មទណ្ឌ នៃអធិការដ្ឋាននគរបាលខណ្ឌដូនពេញ បានបញ្ជូនខ្លួនមន្ត្រីនគរបាលប៉ុស្តិ៍ស្រះចកម្នាក់ និងបក្សមួយចំនួនទៀត ទៅសាលាដំបូងរាជធានីភ្នំពេញ នាព្រឹកថ្ងៃទី ២៧ ខែវិច្ឆិកា ឆ្នាំ២០២០នេះ ពាក់ព័ន្ឋករណីគ្រឿងញៀន ។
ជនសង្ស័យដែលជាមន្ត្រីនគរបាលរូបនេះ មានឈ្មោះ ហ៊ីង តុលា ភេទប្រុស អាយុ៣១ឆ្នាំ ជនជាតិខ្មែរ ឋានន្តរស័ក្ដិអនុសេនីយ៍ឯក ជានាយប៉ុស្តិ៍ស្រះចក ស្នាក់នៅផ្ទះលេខ១៦៦ ផ្លូវ១១០ សង្កាត់ផ្សារចាស់ ខណ្ឌដូនពេញ រាជធានីភ្នំពេញ ។
ប្រភពច្បាប់ការណ៍បានអោយដឹងថា កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌដូនពេញ បានបើកការស្រាវជ្រាវឈានដល់ការឃាត់ខ្លួនជនសង្ស័យម្នាក់ កាលពីវេលាម៉ោង៧យប់ថ្ងៃទី២៥ ខែវិច្ឆិកា ឆ្នាំ២០២០ ស្ថិតនៅចំណុចម្តុំស្តុប ធនាគារកាណាឌីយ៉ា ផ្លូវព្រះមុនីវង្ស សង្កាត់ស្រះចក ខណ្ឌដូនពេញ រាជធានីភ្នំពេញ ។ ជនសង្ស័យដែលត្រូវឃាក់ខ្លួននោះ ជានាយប៉ុស្តិ៍ស្រះចក ហើយចាប់ខ្លួនគឺនៅកន្លែងប៉ុស្តិ៍នគរបាលសង្កាត់ស្រះចក តែម្តង និងដកហូតយកវត្ថុតាងបានទូរស័ព្ទដៃម៉ាក OPPO មួយគ្រឿង ។
គួររម្លឹកឡើងវិញថា នៅវេលាម៉ោង២១ និង១៥នាទី ថ្ងៃទី២៣ វិច្ឆិកា ២០២០ កម្លាំងជំនាញផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌដូនពេញ បានបើកការស្រាវជ្រាវឈានដល់ការបង្ក្រាបជាក់ស្តែងករណីជួញដូរដោយខុសច្បាប់នូវសារធាតុញៀន នៅចំណុចម្តុំក្តាន់ពីរ R6 ក្រុម៣៩ ភូមិ៣ សង្កាត់ស្រះចក ខណ្ឌដូនពេញ និងបានឃាត់ខ្លួនជនសង្ស័យម្នាក់ ឈ្មោះ សុង ដេត ភេទប្រុស អាយុ២៣ឆ្នាំ ដោយបានធ្វើការត្រួតពិនិត្យឆែកឆេររកឃើញថ្នាំញៀន ចំនួន២០៩កញ្ចប់ (២០៦កញ្ចប់តូច និង០៣កញ្ចប់ធំ) និងជញ្ជីងសំរាប់ថ្លឹងថ្នាំញៀនចំនួន០១គ្រឿង នៅក្នុងថង់ខ្មៅ ដែលជនសង្ស័យ កាន់នឹងដៃខាងឆ្វេង ហើយកម្លាំងសមត្ថកិច្ចក៏បានធ្វើការឃាត់ខ្លួនជនសង្ស័យរួមនឹងវត្ថុតាង បញ្ជូនមកកាន់អធិការដ្ឋាននគរបាលខណ្ឌដូនពេញ ដើម្បីធ្វើការសាកសួរបន្ត ។
បន្ទាប់មក នៅវេលាម៉ោង១១ព្រឹក ថ្ងៃទី២៤ វិច្ឆិកា ២០២០ កម្លាំងជំនាញ បានសហការជាមួយកម្លាំងបញ្ជាការឯកភាពខណ្ឌ បើកកិច្ចប្រតិបត្តិការឆែរឆេរត្រួតពិនិត្យនៅតំបន់សំណង់មិនរៀបរយ នៅម្តុំផ្លូវរថភ្លើង ក្នុងក្រុម៣៩ ភូមិ៣ សង្កាត់ស្រះចក ខណ្ឌដូនពេញ រកឃើញ ឧបករណ៍សំរាប់ប្រើប្រាស់ថ្នាំញៀន និងអាវុធកែច្នៃមួយចំនួន ហើយបានធ្វើការឃាត់ខ្លួនបក្ខពួករបស់ជនសង្ស័យឈ្មោះ សុង ដេត បានចំនួន ០៧នាក់បន្ថែមទៀត ។
ជនសង្ស័យដែលត្រូវកម្លាំងផ្នែកឃាត់ខ្លួនរួមមាន ៖
១- ឈ្មោះសាន សីហា ភេទប្រុស ជនជាតិខ្មែរ មុខរបរ មិនពិតប្រាកដ ស្នាក់នៅបន្ទប់ជួល ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
២- ឈ្មោះវណ្ណ ចាន់ថា ភេទប្រុស ជនជាតិខ្មែរ មុខរបរ ជាងសំណង់ ស្នាក់នៅបន្ទប់ជួល ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
៣- ឈ្មោះ ស សិលា ភេទប្រុស ជនជាតិខ្មែរ មុខរបរ ជាងសំណង់ ស្នាក់នៅបន្ទប់ជួល ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
៤- ឈ្មោះរស់ យ៉ា ភេទប្រុស ជនជាតិខ្មែរ មុខរបរ រត់កង់បី ស្នាក់នៅបន្ទប់ជួល ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
៥- ឈ្មោះ ហុក សុខឡេង ភេទប្រុស ជនជាតិខ្មែរ មុខរបរ រត់PassApp ស្នាក់នៅបន្ទប់ជួល ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
៦- ឈ្មោះ សួន បូរ៉ា ភេទប្រុស ជនជាតិខ្មែរ មុខរបរ កម្មករ ស្នាក់នៅបន្ទប់ជួល ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។
៧- ឈ្មោះ លី ចាន់ណាក់ ភេទប្រុស ជនជាតិខ្មែរ មុខរបរ ស្នាក់នៅមិនពិតប្រាកដ។
បន្ទាប់ពីឃាត់ខ្លួនក្រុមជនសង្ស័យទាំងអស់នោះ កម្លាំងជំនាញបានប្រើប្រាស់វិធានការជំនាញសួរចម្លើយ (តាមចម្លើយសារភាពរបស់ជនសង្ស័យទាំង៧នាក់ថាឈ្មោះ ហ៊ីង តុលា ជាមេក្លោងចាត់ចែងលក់ដូរគ្រឿងញៀននៅក្នុងមូលដ្ឋានរបស់ខ្លួនតែម្ដង) លុះដល់វេលាម៉ោង៧យប់ថ្ងៃទី២៥ វិច្ឆិកា ២០២០ កម្លាំងផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌដូនពេញ បានធ្វើការឃាត់ខ្លួនជនសង្ស័យម្នាក់ទៀតឈ្មោះ ហ៊ីង តុលា ជាមន្ត្រីនគរបាលប៉ុស្តិ៍ស្រះចក បញ្ជូនមកកាន់អធិការដ្ឋាននគរបាលខណ្ឌដូនពេញ ។
ទោះជាយ៉ាងណា កម្លាំងជំនាញ នៃអធិការដ្ឋាននគរបាលខណ្ឌដូនពេញ កំពុងបន្តស្រាវជ្រាវរកបក្ខពួកមេក្លោងនិងក្រុមដទៃផ្សេងទៀត ព្រមទាំងកសាងសំណុំរឿង បញ្ជូនទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធី ៕
ចែករំលែកព័តមាននេះ