រាជធានីភ្នំពេញ ៖ ជនសង្ស័យជាមុខសញ្ញាចោរកម្មជំនាញកាច់សោរកម៉ូតូម្នាក់ត្រូវបានកម្លាំងសមត្ថកិច្ចប៉ុស្តិ៍នគរបាលកាកាបទី២ធ្វើការឃាត់បានភ្លាមៗ បន្ទាប់ពីជននេះជិះម៉ូតូកញ្ចាស់១គ្រឿងទៅប្ដូរយកម៉ូតូថ្មីស៊េរីទំនើ១គ្រឿងទៀតនៅទីតាំងទទួលផ្ញើរម៉ូតូមួយកន្លែង។ ប៉ុន្តែខណៈកំពុងអូសយកម៉ូតូថ្មីដើម្បីជិះចេញគេចខ្លួន ក៏ត្រូវបានអ្នកមើលការខុសត្រូវនៅទីនោះឃើញទាន់ស្រែកឆោឡោបង្កការភ្ញាក់ផ្អើលហើយក៏ត្រូវបានកម្លាំងនគរបាលខាងលើចាប់ខ្លួនតែម្ដង។
ហេតុការណ៍ខាងលើនោះបានកើតឡើងកាលពីវេលាម៉ោង១១ព្រឹកថ្ងៃទី២៧ ខែវិច្ឆកា ឆ្នាំ២០២០ នៅចំណុចទីតាំងផ្ញើរម៉ូតូស្ថិតនៅក្នុងភូមិត្រពាំងសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា ជនសង្ស័យខាងលើនោះឈ្មោះសួន ប៊ុន្នី អាយុ៤២ឆ្នាំមាន ទីលំនៅបច្ចុប្បន្នក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឱ្យដឹងថា នៅមុនពេលកើតហេតុ ជននេះបានជិះម៉ូតូម៉ាកស៊ុយហ្ស៊ុយគីវីវ៉ា ពណ៍ខ្មៅ កញ្ចាស់១គ្រឿង យកទៅផ្ញើនៅទីតាំងខាងលើ លុះផ្ញើរម៉ូតូកញ្ចាស់របស់ខ្លួនរួចរាល់ ហើយឆ្លៀតពេលឃើញអ្នកទទួលខុសត្រូវទីនោះរវល់ ស្រាប់តែជនសង្ស័យរូបនេះក៏បានបន្លំលួចអូសយកម៉ូតូថ្មី១គ្រឿងម៉ាកហុងដាឌ្រីម ធុនសេ១២៥ ស៊េរីឆ្នាំ២០១៩ ពណ៍ខ្មៅ ពាក់ស្លាកលេខ បាត់ដំបង 1AH-3081 ដែលជាកម្មសិទ្ធិរបស់ស្ត្រីម្នាក់ឈ្មោះ ម៉ែន ចន្ទ សុខារី អាយុ៣០ឆ្នាំ មុខរបរបុគ្គលិកក្រុមហ៊ុន ស្នាក់នៅបន្ទប់ជួលសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលបានដាក់ផ្ញើរនៅទីនោះដែរ។
តាមប្រភពដដែលបានបន្តទៀតថា ខណៈនោះយីអ៊ុនដាក់ព្រះមិនជួយពេលកំពុងអូសម៉ូតូថ្មីដើម្បីជិះគេចខ្លួន ស្រាប់តែអ្នកមើលការខុសត្រូវនៅទីនោះប្រទះឃើញទាន់ពេលក៏ស្រែកឆោឡោថា«ចោរៗ»បង្កឲ្យមានការភ្ញាក់ផ្អើលយ៉ាងខ្លាំង ស្របពេលនោះកម្លាំងនគរបាលនៅជិតនោះបានចេញអន្តរាគមន៍ឃាត់ខ្លួនបានភ្លាមៗ បន្ទាប់មកបាននាំទៅសាកសួរនិងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញចាត់ការតាមច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ