ADផ្ទាំងផ្សព្វផ្សាយពាណិជ្ជកម្ម

ត្អូញត្អែរ​គ្រប់​គ្នា​! រក​ត្បូង​មិនសូវ​បាន លក់​​ក៏​មិន​ដាច់ ក្នុង​១​ថ្ងៃ​ស្ទើរតែ​គ្មាន​ម៉ូយ​(​វី​ដេ​អូ​)

1 ខែ មុន
  • Pailin

ខេត្ត​ប៉ៃលិន ៖ កុងសែ ប្រកប​របរ​រកស៊ី​លក់ដូរ​ត្បូង​នៅ​ក្បែរ​ជើងភ្នំ​យ៉ា​ត ស្ថិត​ក្នុងភូមិ​វត្ត សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន បាន​ត្អូញ​ត្អូ​រ​ចំពោះ​មុខរបរ​លក់ដូរ​របស់​ខ្លួន​ថា នៅ​រដូវ​កូ​វី​ដ​១៩​នេះ…

ខេត្ត​ប៉ៃលិន ៖ កុងសែ ប្រកប​របរ​រកស៊ី​លក់ដូរ​ត្បូង​នៅ​ក្បែរ​ជើងភ្នំ​យ៉ា​ត ស្ថិត​ក្នុងភូមិ​វត្ត សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន បាន​ត្អូញ​ត្អូ​រ​ចំពោះ​មុខរបរ​លក់ដូរ​របស់​ខ្លួន​ថា នៅ​រដូវ​កូ​វី​ដ​១៩​នេះ ពី​ការ​លក់ដូរ​មាន​ភាព​ស្ងាត់​ភ្ញៀវ​ជាង​ឆ្នាំ​មុន​ៗ ដោយ​ក្នុង​១​ថ្ងៃ​ស្ទើរតែ​អត់​មាន​ម៉ូយ​ចូល​ទិញ​ត្បូង​នោះ​ឡើយ ណាមួយ​ប្រជាពលរដ្ឋ​នៅ​ក្នុងស្រុក​អត់​សូវ​មាន​លុយកាក់​ទិញ​គ្រឿងអលង្ការ​របស់​ពួក​គាត់ រីឯ​ភ្ញៀវ​បរទេស​ក៏​ស្ងាត់​ថែម​ទៀត ។

បើ​ងាក​មើលទៅ​ប្រជាពលរដ្ឋ​រស់នៅ​ក្នុង​ខេត្ត​ប៉ៃលិន ដែល​ប្រកប​មុខរបរ​រែង​ត្បូង​នៅ​តាម​ដងស្ទឹង មានការ​ត្អូញត្អែរ​ចំពោះ​ជីវភាព​របស់​ខ្លួន ខណៈ​អ្នកខ្លះ​បាន​បោះបង់​ចោល​មុខរបរ​មួយ​នេះ​ទាំង​ស្រុង​ទៅ​ហើយ និង​អ្នកខ្លះ​ទៀត​ទាល់តែ​រួច​ដៃ​ពី​ចម្ការ ទើប​នាំ​គ្នា​ចុះ​រែង​រក​រ៉ែ​ត្បូង ដោយ​ពួក​គាត់​លើក​ឡើង​ថា ពិតជា​ពិបាក​រែង​រក​រ៉ែ​ត្បូង ព្រោះ​ដី​ភាគច្រើន​ជា​កម្មសិទ្ធិឯកជន​របស់​គេ ហើយ​ដី​នៅ​តាម​មាត់​ស្ទឹង ត្រូវ​បាន​គេ​ជីក​រុករក​រ៉ែ​ត្បូង​អស់រលីង​ទៅ​ហើយ នៅ​សល់​តែ​កម្ទេច​តិចតួច​ប៉ុណ្ណោះ ។

ហើយ​ការ​ផ្សងព្រេង​ជីកដី​តាម​មាត់​ស្ទឹង​រែង​រក​រ៉ែ​ត្បូង​នេះ មិន​មានការ​ងាយស្រួល​នោះ​ទេ ជួន​កាល​បាន​តិចតួច ជួនកាល​ទៀត​ខំប្រឹង​រែង​រក​រ៉ែ​ត្បូង​ជា​ច្រើន​ថ្ងៃ​មិន​ប៉ះ សូ​ម្បី​តែ​១​គ្រាប់​នោះ​ឡើយ ។

បើ​តាម​សម្តី​កុងសែ​លក់​ត្បូង ឈ្មោះ ស៊ី​ម សរ ភេទ​ស្រី អាយុ​៤៥​ឆ្នាំ និង​ឈ្មោះ ស៊ី​ម ទូច ភេទ​ស្រី អាយុ​៥២​ឆ្នាំ រស់នៅ​ភូមិ​វត្ត សង្កាត់​ប៉ៃលិន ក្រុងប៉ៃលិន បាន​រៀបរាប់​ឱ្យ​ដឹង​ថា ៖ ការ​លក់ដូរ​ត្បូង​ពេល​នេះ​ស្ងាត់​ភ្ញៀវ​ជាង​រាល់ដង ខណ​:​ជំងឺ​កូ​វី​ដ​១៩ កំពុង​វាយប្រហារ​ពេញ​ពិភពលោក និង​ប្រទេស​កម្ពុជា​របស់​យើង ធ្វើ​ឱ្យ​ស្ងាត់​ម៉ូយ​ខ្លាំង ពោល​គឺ​អត់​សូវ​មាន​អ្នក​ដើរ​លេង ឬ​ចូល​ទិញ​ដូច​កាលពីមុន​នោះ​ទេ ។

ប្រភព​ដដែល​បន្ត​ទៀត​ថា តូប​លក់​ត្បូង​ជា​ច្រើន​ដែល​កុងសែ​លក់ដូរ​នៅ​ក្បែរ​ជើងភ្នំ ត្រូវ​បាន​បិទ​ទ្វារ​ចាក់សោ​ទុក​ចោល ផ្អាក​លក់​១​រយ​:​សិន ពោល​គឺ​បើក​លក់ដូរ​តែ​រដូវ​បុណ្យ​ទាន ដូច​ជា​ចូល​ឆ្នាំ​ខ្មែរ ចូល​ឆ្នាំ​ចិន និង​ពិធី​ផ្សេង​ៗ ដែល​មាន​មនុស្ស​មក​លេង​នៅ​ខេត្ត​ប៉ៃលិន​ច្រើន​ប៉ុណ្ណោះ។

ចំណែកឯ​តាម​ការ​រៀបរាប់​ពី​បុរស​ម្នាក់​ឈ្មោះ ម៉ា​ប់ អាយុ​៤៥​ឆ្នាំ រស់នៅ​ភូមិ​អូរ​ប្រើស សង្កាត់​អូរ​តា​វ៉ៅ ក្រុងប៉ៃលិន ក៏​បាន​រៀបរាប់​ឱ្យ​ដឹង​កាលពី​ម៉ោង​១០​និង​៣០​នាទី​ព្រឹក ថ្ងៃ​ទី​២៤ ខែវិច្ឆិកា ឆ្នាំ​២០២០​នេះ​ថា រហូត​មក​ដល់​ពេល​នេះ អត់​សូវ​មាន​អ្នក​ជីក​កកាយ​ដី​រែង​រក​រ៉ែ​ត្បូង​ដូច​កាលពីមុន​នោះ​ទេ ដោយសារ​អ្នកខ្លះ​នៅ​បន្ត​ផ្សងព្រេង​នៅ​តាម​មាត់​ស្ទឹង​ផ្លាស់​ទី​ពី​កន្លែង​មួយ​ទៅ​កន្លែង​មួយទៀត និង​នៅ​ក្នុង​ស្ទឹង​តា​រាប ក្នុងភូមិ​ស្ទឹង​កាច់ ឃុំ​ស្ទឹង​កាច់ ស្រុក​សាលា​ក្រៅ ខេត្ត​ប៉ៃលិន ។

ប្រភព​បន្ត​ទៀត​ថា រហូត​មក​ដល់​ពេល​នេះ នៅ​ក្នុង​ស្ទឹង​តា​រាប គាត់​មក​ជីកដី​រែង​រក​រ៉ែ​ត្បូង​តែ​ម្នាក់​ឯង​ប៉ុណ្ណោះ ក្រែង​ហេង​ប៉ះ​ចំ​គ្រាប់​រ៉ែ​ត្បូង​តិចតួច យក​ទៅ​លក់​សម្រាប់​ផ្គត់ផ្គង់​ជីវភាព​គ្រួសារ ។ ចំណែក​អ្នក​ផ្សេង​ទៀត​ដែល​ធ្លាប់​ប្រកប​របរ​មួយ​នេះ បាន​បោះបង់​ចោល​អស់ហើយ ព្រោះ​ពិបាក​រក​រ៉ែ​ត្បូង ពោល​គឺ​អស់រលីង​ទៅ​ហើយ ដោយសារ​តែ​កាលពី​សម័យ​សង្គ្រាម​ជនជាតិ​ថៃ ចូល​មក​ជីក​កកាយ​ដឹក​យក​ទៅ​ប្រទេស​របស់​គេ​អស់រលីង ៕