រាជធានីភ្នំពេញ ៖ បុរសម្នាក់ត្រូវរថយន្តដឹកដីបុករួចកិនបណ្ដាលឲ្យស្លាប់យ៉ាងអាណោចអាធម៌នៅនឹងកន្លែង ស្ថិតតាមបណ្តោយផ្លូវ២៧១ ទល់មុខស្ថានីយ៍បូមទឹកបឹងត្របែក ក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ កាលពីវេលាម៉ោង១៤និង១០នាទីរសៀល…
រាជធានីភ្នំពេញ ៖ បុរសម្នាក់ត្រូវរថយន្តដឹកដីបុករួចកិនបណ្ដាលឲ្យស្លាប់យ៉ាងអាណោចអាធម៌នៅនឹងកន្លែង ស្ថិតតាមបណ្តោយផ្លូវ២៧១ ទល់មុខស្ថានីយ៍បូមទឹកបឹងត្របែក ក្នុងភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ កាលពីវេលាម៉ោង១៤និង១០នាទីរសៀល ថ្ងៃទី២៧ ខែវិច្ឆិកា ឆ្នាំ២០២០ ។
សពជនរងគ្រោះមានឈ្មោះ ប៊ុត សុភ័ក្រ អាយុ៣០ឆ្នាំ ស្នាក់នៅសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។
បើតាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថា នៅម៉ោងកើតហេតុជនរងគ្រោះបានបើកបរម៉ូតូម៉ាកយ៉ាម៉ាហា ខ្យូប ពណ៌ខ្មៅ ពាក់ស្លាកលេខភ្នំពេញ 1GU-6599 ជិះធ្វើដំណើរតាមបណ្តោយផ្លូវ២៧១ ក្នុងទិសដៅពីបឹងទំពុន ឆ្ពោះទៅក្បាលថ្នល់ ។ លុះដល់ចំណុចកើតហេតុមានរថយន្តដឹកដី ពណ៌សមួយគ្រឿង បើកបរទន្ទឹមគ្នាស្រប និងម៉ូតូដែលបើកបរចន្លោះកណ្តាលបង្កឲ្យកៀ រួចកិនជនរងគ្រោះបែកក្បាលស្លាប់នៅនឹងកន្លែងតែម្តង ចំណែករថយន្តបង្កបានបើកគេចទៅក្បាលថ្នល់ទើបប្រជាពលរដ្ឋឃាត់បាន ។
ក្រោយកើតហេតុ កម្លាំងសមត្ថកិច្ចមូលដ្ឋានបានចុះដល់ទីតាំងកើតហេតុ និងធ្វើការទំនាក់ទំនងទៅសមត្ថកិច្ចជំនាញចរាចរណ៍នៃស្នងការនគរបាលរាជធានីភ្នំពេញ ចុះមកធ្វើការវាស់វែងយករថយន្ត និងម៉ូតូទៅរក្សាទុកនៅការិយាល័យចរាចរណ៍ផ្លូវគោក ដើម្បីធ្វើការដោះស្រាយតាមច្បាប់នៅពេលក្រោយ ។
ចំពោះតៃកុងរថយន្តបង្ក មានឈ្មោះ បឿង រ៉ាត់ អាយុ២៩ឆ្នាំ មានស្រុកកំណើតនៅខេត្តកំពង់ស្ពឺ ក៏ត្រូវបានឃាត់ខ្លួនទៅជាមួយផងដែរ ។ ចំណែកសាកសពជនរងគ្រោះ សមត្ថកិច្ចបានប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណីនៅខេត្តព្រៃវែង ដែលជាស្រុកកំណើត ៕
ចែករំលែកព័តមាននេះ