រាជធានីភ្នំពេញ ៖ ប្រធានគណបក្សកម្មាធិការជាតិរៀបចំការបោះឆ្នោត (គជប)បានបញ្ជាក់ថា គ.ជ.ប នឹងរៀបចំការបោះឆ្នោតសាកល្បងតាមប្រព័ន្ធព័ត៌មានវិទ្យាអនឡាញនៅឆ្នាំ២០២១ខាងមុខនេះ ។
យោងតាមសេចក្តីប្រកាសព័ត៌មាន គ.ជ.ប បានឲ្យដឹងថា ក្នុងជំនួបប្រធានថ្មីនៃអង្គការ JICA លោកស្រី ហារូកូ កាម៉ី(Hahuko Kamei) កាលពីថ្ងៃទី២៦ ខែវិច្ឆិកា ឆ្នាំ២០២០នៅ ទីស្តីការ គ.ជ.ប លោក ស៊ិកប៊ុន ហុកបានលើកឡើងថា គ.ជ.ប នឹងរៀបចំការបោះឆ្នោតសាកល្បង នៅឆ្នាំ២០២១ តាមប្រព័ន្ធបច្ចេកវិទ្យាព័ត៌មាន ។
ប្រធាន គ.ជ.ប ក៏បានស្នើសុំឱ្យមានកិច្ចសហការជាបន្តទៅទៀតដោយស្នើសុំភាគីជប៉ុន បន្តជួយសម្ភារ បរិក្ខារ ដែលរួមមានកុំព្យូទ័រយួរដៃ២ពាន់គ្រឿង និង Power Bank ២ពាន់ គ្រឿង ដើម្បីបម្រើឱ្យការបោះឆ្នោតសាកល្បងតាមប្រព័ន្ធបច្ចេកវិទ្យាព័ត៌មាននៅឆ្នាំ២០២១ រួមមាន ៖
ការចុះឈ្មោះគណបក្សនយោបាយ និងបញ្ជីបេក្ខជន តាមប្រព័ន្ធអនឡាញ (Online) ការបូកសរុបលទ្ធផលនៃការបោះឆ្នោតតាមប្រព័ន្ធអនឡាញ (Online)។ ការបញ្ជូននិងការទទួលលទ្ធផលបោះឆ្នោតបឋម ។ ការបែងចែកអាសនៈនិង ការស្រង់ឈ្មោះបេក្ខជនជាប់ឆ្នោត សុទ្ធតែត្រូវធ្វើតាមប្រព័ន្ធកុំព្យូទ័រ។
លោកប្រធានគ.ជ.បបានគូសបញ្ជាក់ថា៖«ប្រសិនបើការបោះឆ្នោតសាកល្បងក្នុងឆ្នាំ២០២១ ទទួលជោគជ័យ នោះការរៀបចំការបោះឆ្នោតនៅ ឆ្នាំ២០២២ និងឆ្នាំ២០២៣ ដោយប្រើ ប្រព័ន្ធបច្ចេកវិទ្យាទំនើបក៏ទទួលបានជោគជ័យដែរ ដែលធ្វើឱ្យគ្រប់ភាគី ទទួលយកលទ្ធផល នៃការបោះឆ្នោត ដែលរៀបចំដោយ គ.ជ.ប ដោយយើងទាំងអស់គ្នាបានដឹងហើយថា ការបោះ ឆ្នោត គឺជាស្នូលនៃលទ្ធិប្រជាធិបតេយ្យ ដូច្នេះបើយើងរៀបចំការបោះឆ្នោតបានល្អ នោះលទ្ធិប្រជាធិប តេយ្យកាន់តែល្អ និងរឹងមាំនៅកម្ពុជា»។
លោកប្រធានគ.ជ.បបានលើកឡើងថាបំណងប្រាថ្នាដ៏ធំរបស់លោក គឺត្រូវធ្វើ ឱ្យទាល់តែបានការបោះឆ្នោត ត្រឹមត្រូវ និងយុត្តិធម៌ ក្នុងនោះគឺ៖ អ្នកដែលគ្រប់អាយុ ១៨ឆ្នាំឡើងទៅ នៅពេលដែលបានបំពេញលក្ខខណ្ឌត្រឹមត្រូវស្របតាមច្បាប់ ត្រូវតែ មានឈ្មោះ ក្នុងបញ្ជីបោះឆ្នោត ហើយសំឡេងឆ្នោតត្រូវតែរាប់ឱ្យបានត្រឹមត្រជាទីបំផុត ។ លទ្ធផលនៃការបោះឆ្នោតទាំង ៣ដំណាក់កាល (លទ្ធផលបឋម បណ្តោះអាសន្ន និងផ្លូវការ) មិន ត្រូវខុសគ្នាជាដាច់ខាត ។
ជាកិច្ចសហការបន្តជាមួយ គ.ជ.ប លោកប្រធាន ក៏បានស្នើសុំជំនាញការ ៣រូប លើផ្នែកច្បាប់ បច្ចេកទេស និងផ្នែកបណ្តុះបណ្តាល និងអប់រំអ្នកបោះឆ្នោត។ ជាការឆ្លើយតប លោកស្រី ហាឡកូ កាម៉ី (Haruko Kanel) នាយិកាអង្គការ JICA បានបានលើកឡើងថា លោកស្រីមានកិត្តិយសណាស់ ដែលលោកស្រីមានឱ កាសបានជួបសម្តែងការគួរសមជាមួយនឹង គ.ជ.ប។
លោកស្រីបានធ្វើការវាយតម្លៃ ខ្ពស់ចំពោះកិច្ច សហប្រតិបត្តិការយ៉ាងស្អិតរមួត និងស្និទ្ធស្នាល ជាទីបំផុត រវាងអ្នកជំនា ញការជប៉ុន និង គ.ជ.ប ហើយលោកស្រី ទទួលស្គាល់ថា ការបោះឆ្នោតគឺជាស្នូលនៃ លទ្ធិប្រជាធិបតេយ្យ ហើយលោកស្រីក៏ជឿជាក់ថា គ.ជ រៀបចំកា របោះឆ្នោតបន្តទៀតដោយសេរី ត្រឹមត្រូវ និងយុត្តិធម៌ ។
ពាក់ព័ន្ធនឹងសំណើរបស់ គ.ជ.ប បើតាមប្រធានថ្មីរូបនេះបានឱ្យដឹងថា អង្គការ JICA បានទទួល រួចហើយកាលពីខែសីហា ឆ្នាំ២០២០ ដែល គ.ជ.ប បានដាក់តាម រយៈក្រុមប្រឹក្សាអភិវឌ្ឍន៍កម្ពុជា (CDC)។ ដោយសារអង្គការ JICA ជាអង្គការអនុវត្តជំនួយឥតសំណងរបស់ប្រទេសជប៉ុន ដូចនេះលោកស្រីនៅតែបន្តការ អនុវត្តតាមគោលកា រណ៍របស់រដ្ឋាភិបាលជប៉ុន ក៏ដូចជាការងាររបស់ស្ថានទូតជប៉ុនប្រចាំកម្ពុជាផងដែរ។
សម្រាប់សំណើនេះ លោកស្រីពុំទាន់បានទទួលព័ត៌មានលម្អិតនៅឡើយទេ ពីព្រោះត្រូវរង់ចាំការសម្រេចពី រដ្ឋាភិបាលជប៉ុន ហើយលោកស្រីនឹងផ្តល់ព័ត៌មាន ជាបន្តបន្ទាប់ដល់ គ.ជ .ប ប្រសិនបើទទួលបានចម្លើយ វិជ្ជមាននៃសំណើនោះ បន្ទាប់មក លោកស្រីស្នើសុំឱ្យមានជំនួបក្នុងក្របខ័ណ្ឌបច្ចេកទេស ដើម្បីពិនិត្យមើល សំណើនេះ ពីព្រោះថាកន្លងមកជប៉ុនបានជួយរួចហើយពាក់ព័ន្ធនឹងការងារមួយចំនួនដូចជា ការ ចុះឈ្មោះ បោះឆ្នោត ដូច្នេះត្រូវពិនិត្យមើលឡើងវិញនូវអ្វីដែលត្រូវ ជួយជាបន្តទៀត តាមលក្ខណៈបច្ចេកទេស។
ជាមួយគ្នានោះដែរលោកប្រធាន គ.ជ.ប បានជម្រាបជូនលោកស្រីប្រធានអង្គការ JICA អំពីកិច្ចសហប្រតិបត្តិការល្អ ជាមួយភាគីជប៉ុន តាមរយៈអង្គការ JICA ដែលតែងតែផ្ត ល់ជំនួយមិនដាច់ ទាំងសម្ភារ បរិក្ខារផ្សេងៗ ដូច ជារថយន្ត Pickup ចំនួន ៤០គ្រឿង ហិបឆ្នោត ចំនួន ១១.០០០ និងជំនាញការជាច្រើនរូប សម្រាប់ការ បោះឆ្នោតនៅប្រទេសកម្ពុជា ជាពិសេសចាប់តាំងពីឯកឧត្តមប្រធានចូលមកដឹកនាំនៅ គ.ជ.ប តាំងពីឆ្នាំ២០១៥ រហូត មកដល់បច្ចុប្បន្ន ។
ជំនួយទាំងអស់បានបែងចែកទៅតាមលេខាធិការដ្ឋានរាជធានី ខេត្តរៀបចំការបោះឆ្នោត ដើម្បីប្រើប្រាស់តាមតម្រូវការ ដើម្បីបម្រើសេវាបោះ ឆ្នោតជូនពលរដ្ឋកម្ពុជា។ ចំពោះអ្នកជំនាញការដែលបានធ្វើការជាមួយ គ.ជ.ប កន្លងមក មានចំនួន ៨រូប ដែលធ្វើការក្នុងនាមជាទីប្រឹក្សាជាន់ខ្ពស់ក្នុងនាមជាអ្នកបច្ចេកទេស និងការធ្វើកំណែទម្រង់ការបោះឆ្នោត៕
ចែករំលែកព័តមាននេះ