ខេត្តកំពង់ឆ្នាំង ៖ បន្ទាប់ពីមានមនុស្ស២នាក់បានស្លាប់ និងច្រើននាក់ទៀតត្រូវបានដឹកទៅជួយសង្គ្រោះដែលព័ត៌មានពីដំបូងសង្ស័យថា បណ្ដាលមកពីពុលទឹកអណ្តូង នៅព្រឹកថ្ងៃទី 27 ខែវិច្ឆិកា ឆ្នាំ 2020 អភិបាលខេត្តកំពង់ឆ្នាំង ឯកឧត្តម ឈួរ ច័ន្ទឌឿន បាន អញ្ជើញទៅចូលរួមរំលែកទុក្ខ នឹងចូលបច្ច័យក្នុងពិធីបុណ្យសពដល់គ្រួសាររងគ្រោះទាំងពីរនាក់ ជាមួយគ្នានេះដែរ ដែលស្ថិតនៅក្នុងភូមិជីប្រង ឃុំជៀប ស្រុកទឹកផុស ។
សូមរំលឹកថា កាលពីថ្ងៃទី25 ខែវិច្ឆិកា ឆ្នាំ 2020 បងប្អូនប្រជាពលរដ្ឋរស់នៅភូមិជីប្រង ឃុំជៀប ស្រុកទឹកផុស បាននាំគ្នាទៅច្រូតស្រូវនៅចំណុចអូររូង ។
តាមប្រភពពីប្រជាពលរដ្ឋរងគ្រោះដែលកំពុងសំរាកនៅក្នុងមន្ទីរពេទ្យខេត្តកំពង់ឆ្នាំង បានប្រាប់ភ្នាក់ងារយើងនៅព្រឹកថ្ងៃទី27 ខែវិច្ឆិកានេះថា នៅព្រឹកនោះ (25.11.20) ក្រោយពីច្រូតរួចប្រជាពលរដ្ឋចំនួន15នាក់ បាននាំគ្នាសម្រាកពិសាបាយជុំគ្នា ដោយម្ចាស់ស្រែបានធ្វើម្ហូបមានសម្លរក្តាម និងឪឡឹកទុំ ។ ពេលពិសាបាយរួចក៏នាំគ្នាពិសាទឹកក្នុងពីដុងដែលម្ចាស់ស្រែដាក់មកតាម ។ ប៉ុន្តែពេលទឹកក្នុងពីដុងអស់ក៏ទៅដងទឹកអណ្ដូងដៃដាក់ក្នុងពីដុង យកមកចែកគ្នាផឹកបន្ត ។ ថ្ងៃនោះក្រោយពីនាំគ្នាត្រឡប់មកផ្ទះវិញ ស្រាប់តែនាំមានអាការៈ ធីងធោង ហើយម្ចាស់ស្រែមានឈ្មោះ ណុល វ៉ារ៉ុម ភេទស្រី អាយុ 45ឆ្នាំ ក៏បានស្លាប់បាត់បង់ជីវិត ។
នៅថ្ងៃទី26 ខែវិច្ឆិកា ជាថ្ងៃបន្ទាប់ ជនរងគ្រោះទាំងអស់ត្រូវបានដឹកមកសង្គ្រោះនៅឯមន្ទីរពេទ្យខេត្តកំពង់ឆ្នាំង ប៉ុន្តែដោយសារស្ថានភាពធ្ងន់ធ្ងរពេកនៅយប់នោះស្ត្រីឈ្មោះ ម៉ៅចិន្តា អាយុ 47 ឆ្នាំក៏បានស្លាប់ម្នាក់ទៀត នៅក្នុងបន្ទប់សង្គ្រោះបន្ទាន់ ។ នៅព្រឹកថ្ងៃ 27 ខែវិច្ឆិកានេះដែរ គេសង្កេតឃើញឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង បាននាំថវិកាទៅចូលរួមបុណ្យសព ដែលរងគ្រោះទាំងពីរគ្រួសារដោយក្នុងមួយគ្រួសារមួយគ្រួសារទទួលបានថវិកា 1 លាន 20 ម៉ឺនរៀល និងកាកបាទក្រហម 20ម៉ឺនរៀលរួម និងគ្រឿងឧបភោគបរិភោគមួយចំនួនទៀត ។
ដោយឡែកមន្ទីរសុខាភិបាលខេត្តកំពង់ឆ្នាំង មិនអាចទំនាក់ទំនងសួររកមូលហេតុដែលបណ្ដាលឲ្យមានគ្រោះថ្នាក់ដល់ជីវិតមនុស្សនោះទេ ទោះបីមានការព្យាយាមពីក្រុមអ្នកសារព័ត៌មានយ៉ាងណាក្តី ហើយអ្វីដែលជាការកត់សម្គាល់ទៀត រឿងកើតហេតុតាំងពីថ្ងៃ 25 ប៉ុន្តែទើបនៅផ្ទុះនៅថ្ងៃទី 27 ខណៈដែលមានមនុស្សស្លាប់នៅក្នុងមន្ទីរពេទ្យខេត្ត គឺហាក់ដូចជា មានការលាក់លាមអ្វីមួយ ។
យ៉ាងនេះក្តី តាមការបញ្ជាក់ ពីសមត្ថកិច្ច និងអាជ្ញាធរមូលដ្ឋានបានឲ្យដឹងថា ទឹកអណ្ដូងដែលពួកគាត់ប្រើ គឺជាទឹកអណ្ដូងដៃ ហើយនៅជិតនោះមានចម្ការឪឡឹក ដែលគេសង្ស័យថា អ្នកចម្ការប្រើប្រាស់ទឹកអណ្ដូង ដើម្បីលាយថ្នាំបាញ់សម្លាប់សត្វល្អិត ទើបបណ្ដាលឲ្យមានពុលដល់មនុស្សបែបនេះ ។ ក្រោយកើតហេតុ នៅកន្លែងកើតហេតុ ក៏មានការព័ទ្ធខ្សែ និងដាក់ស្លាកបំរាមហាមការប្រើប្រាស់ទឹកអណ្ដូងនោះផងដែរ ៕
ចែករំលែកព័តមាននេះ