ខេត្តសៀមរាប ៖ ថៅកែលក់គ្រឿងកាឡៃពិភពថ្មី នៅមុខផ្សារលើធំថ្មី ត្រូវបានសមត្ថកិច្ចចាប់ខ្លួនពីបទរំលោភផ្លូវភេទលើបុគ្គលិករបស់ខ្លួន កាលពីខែសីហា ឆ្នាំ២០១៩ ហើយរត់គេចខ្លួនបាត់មួយរយៈនោះ ត្រូវបានកម្លាំងការិយាល័យជំនាញខេត្តតាមចាប់ខ្លួនវាយខ្នោះ តាមដីការបស់តុលាការដើម្បីចាត់ការតាមនីតិវិធី ។ បុគ្គលនេះ ជាប់ចោទពីបទរំលោភសេពសន្ថវៈ ដោយមានស្ថានទម្ងន់ទោស ទាក់ទងនឹងអាយុជនរងគ្រោះដែលប្រព្រឹត្តិនៅក្នុងហាងយីហោ ហេង សុវណ្ណ ពិភពម៉ូដ ស្ថិតនៅមុខផ្សារលើធំថ្មី ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាបដែលចេញដោយលោក ថាន់ ឃុន ចៅក្រមស៊ើបសួរនៃសាលាដំបូងខេត្តសៀមរាប ។
ការចាប់ខ្លួនថៅកែលក់គ្រឿងកាឡៃពិភពថ្មីនេះ បានធ្វើឡើងនៅថ្ងៃទី២៤ ខែវិច្ឆិកា ឆ្នាំ២០២០ ស្ថិតនៅក្នុងបរិវេណវិហារព្រះយេស៊ូ ក្នុងសង្កាត់ផ្សារដើមស្កូវ ខណ្ឌចំការមន រាជធានីភ្នំពេញ ។ លោកវរសេនីយ៍ឯក ជា ហេង ប្រធានការិយាល័យប្រឆាំងការជួញដូរមនុស្សនិងការពារអនីតិជនខេត្តសៀមរាបបានប្រាប់តាមទូរស័ព្ទនៅរសៀលថ្ងៃទី២៥ ខែវិច្ឆិកា ឆ្នាំ២០២០នេះថា ជនសង្ស័យ ឈ្មោះ ហេង សុវណ្ណ ភេទប្រុស អាយុ៣៣ឆ្នាំ ជនជាតិខ្មែរ មុខរបរលក់គ្រឿងកាឡៃពិភពថ្មី មុខផ្សារលើធំថ្មី មានស្រុកកំណើតនៅភូមិពោធិ៍កំបោរ ឃុំវាល ស្រុកកណ្តៀង ខេត្តពោធិ៍សាត់ មានទីលំនៅបច្ចុប្បន្នភូមិចុងកៅស៊ូ សង្កាត់ស្លក្រាម ក្រុងសៀមរាប ។
លោកបានបញ្ជាក់ថា ដោយយោងតាមពាក្យបណ្តឹងរបស់ម្តាយមីងជនរងគ្រោះឈ្មោះ ហេង គន្ធា អាយុ២៧ឆ្នាំ បច្ចុប្បន្នរស់នៅភូមិតាវៀន សង្កាត់សាលាកំរើក ក្រុងសៀមរាប ដែលបានធ្វើសកម្មភាពចាប់បង្ខំរំលោភទៅលើក្មួយស្រីរបស់ខ្លួនឈ្មោះ ហ ថ.វ អាយុ១៤ឆ្នាំ ជាបុគ្គលិកធ្វើការនៅក្នុងហាងលក់គ្រឿងកាឡៃ យីហោ ហេង សុវណ្ណនោះ ។
លោកបានបញ្ជាក់ទៀតថា តាមការស្តាប់ចម្លើយបំភ្លឺរបស់កុមារីរងគ្រោះ ដែលជាបុគ្គលិកបម្រើការនៅក្នុងហាងលក់គ្រឿងកាឡៃយីហា ហេង សុវណ្ណ បានរៀបរាប់ប្រាប់សមត្ថកិច្ចយើងថា នៅក្នុងខែសីហា ឆ្នាំ២០១៩ នៅពេលយប់មានបុគ្គលិកដែលបម្រើការក្នុងហាងនេះចំនួន២នាក់ (ភេទស្រី)មកពីខាងក្រៅត្រូវចូលមកក្នុងហាងតែអត់មានសោចាក់ទ្វារ ដើម្បីចាក់ឱ្យបុគ្គលិក២នាក់ ដែលនៅខាងក្រៅចូលពេលនោះនាងខ្ញុំក៏បានទៅសួរឈ្មោះ ហេង ពុយ ភេទស្រី ត្រូវជាបងស្រីបង្កើតរបស់លោក ហេង សុវណ្ណ ដើម្បីយកសោចាក់ទ្វារឱ្យបុគ្គលិកចូល តែ ហេង ពុយ ថា ឱ្យទៅសួរលោក ហេង សុវណ្ណ ។ ខណៈពេលនោះនាងក៏បានសួរ លោក ហេង សុវណ្ណ ដើម្បីយកកូនសោ ហើយគាត់ក៏យកកូនសោមកឱ្យ ។
ពេលយកកូនសោនោះបានហើយ នាងជាអ្នកបំភ្លឺភ្លើងពិលទូរស័ព្ទឱ្យឈ្មោះ ស្រី លីន ជាអ្នកចាក់សោ រួមទាំងបុគ្គលិកទាំង២នាក់ ក៏ចូលមកក្នុង ហើយក៏បាននាំគ្នាទៅដេកនៅជាន់ទី១ ជាកន្លែងពួកនាងសម្រាក ។ នៅពេលដែលនាងឡើងបានបន្តិច ឈ្មោះ ហេង សុវណ្ណ ដែលជាថៅកែ ក៏បានហៅរូបនាងឱ្យចុះមកជួបគាត់វិញ ប្រាប់ឱ្យមកតែម្នាក់ឯងបានហើយ ពេលនោះ ហេង សុវណ្ណ ប្រាប់នាងថា មានការចង់និយាយជាមួយ ។ ពេលមកជួប ហេង សុវណ្ណ ហើយ ស្រាប់តែស្ទុះមកចាប់ឱបនាងជាប់ រួចនិយាយថា រូបនាងពេញក្រមុំហើយ ។ ហើយក៏បានរំលោភនាងទាំងកំរោលតែម្តង ។
ក្រោយពីនាងឡើងទៅបន្ទប់ដេកវិញ មួយសន្ទុះស្រាប់តែឈ្មោះ ហេង ពុយ ដែលជាបងស្រី របស់ ហេង សុវណ្ណ ចូលទៅជួបនាង ហើយនិយាយថា រឿងដែលបានកើតឡើងយប់នេះមិនបាច់និយាយប្រាប់អ្នកណាទេ ទុកដូចជាការយល់សប្តិទៅចុះ ។ ប៉ុន្តែក្រោយមក ដោយសារម្តាយមីងនាងប្តឹងទើបលោកឈ្មោះ ហេង សុវណ្ណ ដាក់មេប្រូចបាត់មកសម្ងំសុខនៅភ្នំពេញបាត់ទៅជាង១ឆ្នាំ ទើបតែចាប់ខ្លួនបាន ។
លោកបានបញ្ជាក់បន្ថែមទៀតថា រឿងរ៉ាវនេះលោកបានហៅ ហេង សុវណ្ណ ចូលមកបំភ្លឺ ពេលនោះ ហេង សុវណ្ណ បានបដិសេធការចោទប្រកាន់ពីក្មេងស្រីរងគ្រោះ ។ ផ្អែកតាមការសន្និដ្ឋានរបស់សមត្ថកិច្ច បានសន្និដ្ឋានថា ករណីខាងលើនេះ ថៅកែឈ្មោះ ហេង សុវណ្ណ ភេទប្រុស អាយុ៣៣ឆ្នាំ ពិតជាបានធ្វើសកម្មភាពចាប់បុគ្គលិករបស់ខ្លួន ឈ្មោះ ហេង ថាវី អាយុ១៤ឆ្នាំ រំលោភសេពសន្ថវៈ នៅក្នុងហាងរបស់ខ្លួនពិតមែន ។
បច្ចុប្បន្ន ថៅកែហាងលក់គ្រឿងកាឡៃយីហា ហេង សុវណ្ណ ត្រូវបានការិយាល័យជំនាញចាប់បញ្ជូនខ្លួន មកដល់តុលាការហើយនៅរសៀលថ្ងៃទី២៥ ខែវិច្ឆិកា ឆ្នាំ២០២០ ត្រូវបានលោក ថាន់ ឃុន ចៅក្រមស៊ើបសួរនៃសាលាដំបូងខេត្តសៀមរាប បញ្ជាឱ្យសមត្ថកិច្ចយកជនសង្ស័យ ទៅឃុំនៅពន្ធនាគារបណ្តោះអាសន្នរង់ចាំការបើកសវនាការ ៕
ចែករំលែកព័តមាននេះ