រាជធានីភ្នំពេញ ៖ អាជ្ញាធរខណ្ឌដូនពេញចុះបិទទីតាំងម៉ាស្សាយីហោដាយម៉ិន ម៉ាស្សា ដោយមានការសង្ស័យមានបង្កប់សេវាបម្រើផ្លូវភេទ ក្រោយពីមានការបែកធ្លាយនូវវីដេអូផ្សព្វផ្សាយពាណិជ្ជកម្ម និងហ្វេសប៊ុករបស់ហាងម៉ាស្សា ដ៏អស្ចារ្យមួយនេះដែលមានឈ្មោះ ដាយម៉ិន ម៉ាស្សា DIAMOND MASSA ។ កម្លាំងអាជ្ញាធរខណ្ឌដូនពេញ ដែលដឹកនាំដោយលោក សុខ ពេញវុធ ជាអភិបាលខណ្ឌ លោក ទៀង ចន្ទសារ អធិការនគរបាលខណ្ឌ និងមន្ត្រីពាក់ព័ន្ធបានចុះធ្វើការត្រួតពិនិត្យ ព្រមទាំងឆែកឆេរ និងឈានទៅដល់ការបិទអាជីវកម្មទីតាំងខាងលើនេះផងដែរ ។ បែកធ្លាយវីដេអូ ហាងម៉ាស្សាលេខ១នៅភ្នំពេញ មានអារម្មណ៍ដូចនៅលើឋានសួគ៌
ប្រតិបត្តិការបង្ក្រាបនេះដែរបានធ្វើឡើង កាលពីវេលាម៉ោង៣និង៣០នាទីរសៀលថ្ងៃទី២៦ ខែវិច្ឆិកា ឆ្នាំ២០២០ នៅហាងម៉ាស្សាយីហោ ដាយម៉ិន ម៉ាស្សា DIAMOND MASSA ផ្ទះលេខ ៤៨C ផ្ទះលេខ ២២២ ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីអាជ្ញាធរមូលដ្ឋានបានប្រាប់ឱ្យដឹងថា ក្រោយពីបែកធ្លាយវីដេអូឃ្លីបផ្សព្វផ្សាយពាណិជ្ជកម្ម និងសារជាសំឡេងក្នុងការទាក់ទងគ្នារវាងបុគ្គលិករបស់ហាងម៉ាស្សានេះ ជាមួយនឹងបុរសជាអតិថិជន ក្នុងការទាក់ទងគ្នាអំពីរឿងផ្តល់សេវាកម្មរបស់ខ្លួន និងមានលក្ខណៈបែបបង្កប់ការស្រើបស្រាលផ្លូវភេទដ៏សរើបរំភើបត្រូវគេបង្ហោះ ចែកចាយតៗគ្នាតាមបណ្តាញសង្គមហ្វេសប៊ុកនោះ ។
ពេលនេះ កម្លាំងគណៈបញ្ជាការឯកភាពខណ្ឌដូនពេញ ក្រោមការដឹកនាំរបស់លោក សុខ ពេញវុធ ជាអភិបាលខណ្ឌ បានធ្វើការស្រាវជ្រាវរកឃើញទីតាំងខាងលើ ក៏បានចុះមកធ្វើការត្រួតពិនិត្យ និងឆែកឆេរទីតាំងផ្ទះម៉ាស្សានេះតែម្តង ព្រោះការផ្សាយនោះមានភាពទាក់ទាញខ្លាំងណាស់ ។ មិនឱ្យឆក់យកភ្ញៀវម្តេចបានទៅ បើផ្សាយសុទ្ធតែ…យ៉ាងនេះ ចំណុចពិសេសនោះ គឺសាប់មាត់…ហេ ! ហេ ! ។
តាមប្រភពដដែលបានប្រាប់បន្តទៀតថា ក្នុងពេលដែលកម្លាំងអាជ្ញាធរខណ្ឌដូនពេញចុះមកដល់កន្លែងទីតាំងម៉ាស្សាដែលមានយីហោដាយម៉ិនម៉ាស្សានេះ បានឃើញហាងបិទទ្វារជិត ហើយក៏បានចុចកណ្តឹងពីខាងក្រៅ ទើបមានបុរសម្នាក់ដែលជាសន្តិសុខ ចេញមកបើកទ្វារឱ្យចូលទៅខាងក្នុងហាង ។ ក្នុងពេលដែលអស់លោកចូលទៅដល់ខាងក្នុងត្រួតពិនិត្យមើលមិនឃើញមានអ្វីប្លែក ក្រៅតែមានគ្រែពូកនៅតាមបន្ទប់ ដែលគេប្រើសម្រាប់ម៉ាស្សានោះទេ ហើយធ្វើការសួរនាំទៅ បុរសជាសន្តិសុខយាមនៅទីនេះក៏គេមិនដឹងអ្វីដែរ ដោយទើបតែចូលមកធ្វើការបានរយៈពេល២ថ្ងៃប៉ុណ្ណោះ ។
ហាងម៉ាស្សាយីហោ ដាយម៉ិន ម៉ាស្សានេះដែរ គឺបើកធ្វើអាជីវកម្មឡើងដោយមានច្បាប់អនុញ្ញាតត្រឹមត្រូវ កាលពីថ្ងៃទី១៨ ខែមិថុនា ឆ្នាំ២០២០មកម្ល៉េះ តែដោយសំអាងលើរូបភាពផ្សព្វផ្សាយ និងការបែកធ្លាយសារសំឡេងតាមបណ្តាញសង្គមហ្វេសប៊ុកនោះ ទើបឈានទៅដល់ការបិទអាជីវកម្មតែម្តង ។
អ្នកតាមដានមានការសង្ស័យហើយមើលទៅ ទើប «ចាប់ខ្យល់» យ៉ាងនេះ ។ ទំនងបែកធ្លាយការសម្ងាត់រឿងចេញបែកធ្លាយនេះតែម្តង ឬសង្ស័យមានអ្នកស៊ីឈ្នួលមើលផ្លូវតាំងពីចំណុចចេញដំណើរទេដឹង ?…ហេ ! ហេ !
ចែករំលែកព័តមាននេះ