ខេត្តស្ទឹងត្រែង ៖ បើតាមយោងតាមគេហទំព័រហ្វេសប៊ុករបស់បញ្ជាការដ្ឋានកងរាជអាវុធហត្ថលើផ្ទៃប្រទេស បានបង្ហោះព័ត៌មាននៅថ្ងៃទី២៦ ខែវិច្ឆិកា ឆ្នាំ២០២០ នេះថា កាលពីវេលាម៉ោង៩និង១០នាទីព្រឹក ថ្ងៃទី២៤ វិច្ឆិកា…
ខេត្តស្ទឹងត្រែង ៖ បើតាមយោងតាមគេហទំព័រហ្វេសប៊ុករបស់បញ្ជាការដ្ឋានកងរាជអាវុធហត្ថលើផ្ទៃប្រទេស បានបង្ហោះព័ត៌មាននៅថ្ងៃទី២៦ ខែវិច្ឆិកា ឆ្នាំ២០២០ នេះថា កាលពីវេលាម៉ោង៩និង១០នាទីព្រឹក ថ្ងៃទី២៤ វិច្ឆិកា កម្លាំងសមត្ថកិច្ចមូលដ្ឋានកងរាជអាវុធហត្ថស្រុកសៀមបូក បានធ្វើការឃាត់ខ្លួនបុរសជនជាតិខ្មែរ-អ៊ិស្លាមម្នាក់ នៅចំណុចភូមិស្រែក្រសាំង ឃុំស្រែក្រសាំង ស្រុកសៀបបូក ខេត្តស្ទឹងត្រែង ពាក់ព័ន្ធករណីប្រើប្រាស់ក្រដាសប្រាក់ដុល្លារ និងប្រាក់រៀលក្លែងក្លាយ។
បុរសជនជាតិខ្មែរ-អ៊ិស្លាមរូបនោះឈ្មោះ លី គ្រីយ៉ា អាយុ៤៤ឆ្នាំ មុខរបរលក់ដូរ មានទីលំនៅភូមិវាលឃ្មុំ ឃុំគរ ស្រុកត្បូងឃ្មុំ ខេត្តត្បូងឃ្មុំ ។
យោតាមខ្លឹមសារក្នុងគេហទំព័រហ្វេសប៊ុកកងរាជអាវុធលើផ្ទៃប្រទេសបានបញ្ជាក់ថា នៅវេលាម៉ោងខាងលើ មានប្រជាពលរដ្ឋដែលជាជនរងគ្រោះចំនួន៣នាក់ បាននាំគ្នាជិះម៉ូតូដេញតាមពីក្រោយជនសង្ស័យម្នាក់ឈ្មោះ លី គ្រីយ៉ា រហូតមកដល់មូលដ្ឋានកងរាជអាវុធហត្ថនៅស្នាក់ការសន្តិសុខ៧២២ រួចក៏បានចូលប្តឹង ដើម្បីឱ្យជួយអន្តរាគមន៍ឃាត់ខ្លួនជនសង្ស័យខាងលើនេះ មូលហេតុដោយសារតែជនសង្ស័យនេះបានយកក្រដាសប្រាក់ដុល្លារក្លែងក្លាយទៅទិញអីវ៉ាន់របស់ពួកគាត់ ។
ភ្លាមៗនោះ ដោយបានការអនុញ្ញាតពីព្រះរាជអាជ្ញានៃអយ្យការអមសាលាដំបូងខេត្តស្ទឹងត្រែ កម្លាំងកងរាជអាវុធហត្ថបានចេញទៅត្រួតពិនិត្យ និងឃាត់ខ្លួនជនសង្ស័យ ដើម្បីធ្វើការឆែកឆេរ ហើយជាក់ស្តែងនៅក្នុងហោប៉ៅ និងក្រោមកែបម៉ូតូរបស់ជនសង្ស័យ មានក្រដាសប្រាក់១ម៉ឺនរៀលក្លែងក្លាយចំនួន១៨សន្លឹក, ក្រដាសប្រាក់១០ដុល្លារក្លែងក្លាយចំនួន១១ សន្លឹក, ប្រាក់រៀលសុទ្ធចំនួន៧,៤៨៥,០០០រៀល និងម៉ូតូ១គ្រឿងម៉ាកវ៉េវ ពណ៌ខ្មៅ ពាក់ស្លាកលេខភ្នំពេញ 2RB-3668 ។
ក្រោយពេលឃាត់ខ្លួន ជនសង្ស័យត្រូវបានកម្លាំងកងរាជអាវុធមូលដ្ឋានបញ្ជូនទៅបញ្ជាការដ្ឋានកងរាជអាវុធហត្ថខេត្ត ដើម្បីកសាងសំណុំ ដើម្បីចាត់ការតាមនីតិវិធី ៕
ចែករំលែកព័តមាននេះ