អាហ្សង់ទីន ៖ មានការប៉ះទង្គិចគ្នាមួយរវាងក្រុមប៉ូលិស ជាមួយនឹងក្រុមអ្នកកាន់ទុក្ខវិញ្ញាណក្ខន្ធរបស់វីរបុរសបាល់ទាត់លោក Diego Maradona ជាច្រើននាក់ ដែលបានដើរដង្ហែរនៅក្នុងរដ្ឋធានីប៊ុយណូស៊ែ (Buenos Aires) ប្រទេសអាហ្សង់ទីន នេះបើតាមការចុះផ្សាយរបស់ BBC នៅព្រឹកថ្ងៃទី ២៧ វិច្ឆិកា នេះ។ រំលឹកថា ៖ រញ្ជួយពិភពលោក! ក្រោយមរណភាពស្តេចបាល់ទាត់ Diego Maradona
សូមបញ្ជាក់ថា សពវីរបុរសបាល់ទាត់អាហ្សង់ទីន Diego Maradona ត្រូវបានគេបញ្ចុះនៅក្នុងពិធីឯកជនមួយ ជាច្រើនទិដ្ឋភាពដ៏រំជួលចិត្ត និងសោកសៅយ៉ាងខ្លាំងនៅរដ្ឋធានីខាងលើ។ ហើយមានតែសាច់ញាតិ និងមិត្តភក្តិជិតស្និតតែប៉ុណ្ណោះ ដែលបានចូលរួមក្នុងពិធីលាចុងក្រោយកាលពីថ្ងៃទី ២៦ វិច្ឆិកាកន្លងទៅ។
ប៉ុន្តែបើតាមការចុះផ្សាយរបស់ BBC បានឱ្យដឹងថា មុនពេលពិធីបញ្ចុះចាប់ផ្តើម គេសង្កេតឃើញហ្វូងមនុស្សដ៏ច្រើន បាននាំគ្នាដើរដង្ហែរក្នុងគោលបំណងគោរពវិញ្ញាណក្ខន្ធ និងជាលាចុងក្រោយចំពោះស្តេចបាល់ទាត់របស់ពួកគេ។
ហើយឈានដល់ពេលរសៀលក្បួនដង្ហែរកាន់តែច្រើនទៅៗ លាតសន្ធឹងជាង១គីឡូម៉ែត្រ ដែលបណ្តាលឱ្យមានការប៉ះទង្គិចគ្នារវាងក្រុមប៉ូលិស និងក្រុមអ្នកកាន់ទុក្ខតែម្តង។ របាយការណ៍បានអះអាងថា មានការប្រើប្រាស់ឧស្ម័នបង្ហូរទឹកភ្នែក និងគ្រាប់កាំភ្លើងជ័រពីកងប៉ូលិសប្រឆាំងកុបកម្ម ដើម្បីរារាំងហ្វូងមនុស្សទាំងនោះ ដែលចង់ឃើញមឈូសរបស់លោក Diego Maradona។
សូមរំលឹកថា លោក Diego Maradona បានទទួលមរណភាពកាលពីថ្ងៃទី ២៥ វិច្ឆិកា កន្លងទៅដោយសារជំងឺគាំងបេះដូងក្នុងអាយុ ៦០ឆ្នាំ។ មរណភាពរបស់លោកបានធ្វើឱ្យមានការសោកស្តាយ និងការចូលរួមកាន់ទុក្ខនៅជុំវិញពិភពលោក។ ក្រៅពីប្រទេសអាហ្សង់ទីន គេឃើញនៅក្នុងប្រទេសអ៊ីតាលី និងអេស្ប៉ាញក៏មានការជួបជុំកាន់ទុក្ខពីសំណាក់អ្នកគាំទ្រជាច្រើនផងដែរ៕
ចែករំលែកព័តមាននេះ