រាជធានីភ្នំពេញ ៖ មានមនុស្សភាគច្រើនតែងតែចុះញ៉ម ឬមិនចង់បន្តទៀតនោះទេ នៅពេលដែលពួកគេជួបបញ្ហាអ្វីមួយ និងភាពបរាជ័យលើកដំបូង។ ប៉ុន្តែបើតាមអ្នកជំនាញល្បីៗ បាននិយាយថា ទម្រាំគាត់បានមកដល់ភាពជោគជ័យនាពេលបច្ចុប្បន្ននេះ ពួកគាត់ទទួលបានការបរាជ័យមិនក្រោម មួយលើកនោះ រហូតមានអ្នកជោគជ័យខ្លះបរាជ័យរបស់ទាល់តែ ៣០ដង ឯនោះ។
លោកឧកញ៉ា វេជ្ជបណ្ឌិត គួច ម៉េងលី ដែលជាបុរសម្នាក់ គ្រប់គ្នាតែងតែស្គាល់ ជាមនុស្សពូកែម្នាក់ បានលើកឡើងថា «មនុស្សមួយចំនួនគ្រាន់តែធ្វើអ្វីមួយខុសឆ្គងឬបរាជ័យរឿងអ្វីម្ដង ពួកគាត់ចាប់ផ្ដើមភ័យខ្លាច រាងចាល បាក់ស្បាត លែងចង់ធ្វើអ្វីទាំងអស់។ ឧទាហរណ៍ បើគាត់បើកតូបលក់នំបញ្ចុកនៅទីតាំងណាមួយលក់អត់ដាច់ គឺគាត់ឈប់លក់រហូតតែម្ដង។ គាត់អត់បានសិក្សារកមូលហេតុដែលបណ្ដាលឱ្យគាត់លក់អត់ដាច់នោះទេ។ ដល់ពេលអ៊ីចឹង គឺធ្វើឱ្យគាត់បាត់បង់ឱកាស និងក្លាយជាមនុស្សរួញរាច្រើន ចេះតែខ្លាចនេះខ្លាចនោះ មុជមិនជ្រៅទៅមិនឆ្ងាយ»។
លោកឧកញ៉ា វេជ្ជបណ្ឌិត បានបន្តថា តើនរណាដែលមិនធ្លាប់មានកំហុស? បុគ្គលណាក៏ដោយតែងតែធ្លាប់បានសាងនូវកំហុសឆ្គងរៀងៗខ្លួន ហើយសូម្បីតែទេវតាឬព្រះក៏មានខុសដែរ។ ដូច្នេះយើងមិនចាំបាច់ខ្លាចកំហុសឆ្គងខ្លាំងពេកទេ សំខាន់ឱ្យតែយើងចេះកែប្រែកំហុស រៀនពីកំហុស និងកុំឱ្យកើតមានកំហុសនោះដដែលៗទៅបានហើយ។
ឧទាហរណ៍ថា បើអ្នកប្រឡងឡើងថ្នាក់ធ្លាក់ ចូរកុំបាក់ទឹកចិត្តឬឈប់រៀនឱ្យសោះ! បើអ្នកឈប់រៀន នោះបានន័យថាអ្នកកំពុងតែបំផ្លាញអនាគតខ្លួនឯង។ អ្នកត្រូវតែរៀនបន្តទៀត ហើយស្វែងយល់ថា ហេតុអ្វីបានជាខ្លួនប្រឡងធ្លាក់? តើធ្លាក់មុខវិជ្ជាអ្វីខ្លះ?
លោកឧកញ៉ា វេជ្ជបណ្ឌិត គួច ម៉េងលី បានបកស្រាយនៅសំនួរខាងលើថា «នៅពេលបានឈ្វេងយល់ពីមូលហេតុបណ្ដាលឱ្យប្រឡងធ្លាក់នោះហើយ អ្នកត្រូវតែកែប្រែចំណុចអវិជ្ជមាននោះឱ្យប្រសើរឡើងវិញ អ្នកត្រូវតែយកចិត្តទុកដាក់និងចំណាយពេលរៀនមុខវិជ្ជាដែលអ្នកប្រឡងធ្លាក់នោះឱ្យបានច្រើនជាងមុន ដើម្បីពង្រឹងនិងបង្កើនចំណេះដឹងលើមុខវិជ្ជាទាំងនោះ»៕
ចែករំលែកព័តមាននេះ