រាជធានីភ្នំពេញ ៖ ទីតាំងរោងស្តុកសំបកបាវនៅជាប់នឹងឡសម្ងួតស្រូវរបស់រោងម៉ាស៊ីនកិនស្រូវមួយកន្លែង ត្រូវបានអគ្គិភ័យឆាបឆេះយ៉ាងសន្ធោរសន្ធៅ ប៉ុន្តែសំណាងល្អត្រូវបានកម្លាំងអាជ្ញាធរនិងសមត្ថកិច្ចខណ្ឌដង្កោដឹកនាំដោយលោកស្រីអភិបាលខណ្ឌគឹម ញ៉ឹបនិងលោកអធិការនគរបាលខណ្ឌ ជឹម ស៊ីថា ចេញអន្តរាគមន៍ហៅរថយន្តពន្លត់អគ្គិភ័យចេញទៅបាញ់ពន្លត់ទាន់ពេល។
ហេតុការណ៍ខាងលើនេះបានបង្កឲ្យមានការភ្ញាក់ផ្អើលកាលពីវេលាម៉ោង៩និង១០នាទីព្រឹកថ្ងៃទី២៦ ខែវិច្ឆិកា ឆ្នាំ២០២០ នៅក្នុងរោងម៉ាស៊ីនកិនស្រូវប៊ុន ហួរ ដែលមានទីតាំងស្ថិតនៅផ្លូវជាតិលេខ២ ក្នុងភូមិកណ្ដាល សង្កាត់រលួស ខណ្ឌដង្កោ រាជធានីភ្នំពេញ។
នគរបាលខណ្ឌដង្កោបានឲ្យដឹងថា រោងស្តុកសំបកបាវ នោះមានទំហំ៣ម៉ែត្រគុណនឹង២០ម៉ែត្រ ត្រូវអគ្គិភ័យឆាបឆេះរងការខូចខាតទាំងស្រុង ហើយរោងស្តុកសំបកបាវនេះស្ថិតនៅជាប់នឹងឡសម្ងួតស្រូវ និងរោងម៉ាស៊ីនកិនស្រូវខាងលើដែលមានទំហំ៤០ម៉ែត្រគុណនឹង៧០ម៉ែត្រ សង់អំពីថ្មប្រក់ស័ង្កសី ហើយវាជាកម្មសិទ្ធិរបស់ឈ្មោះប៊ុន សុធី ភេទប្រុស អាយុ ៤៣ឆ្នាំ ។ ចំណែកមូលហេតុនៃការឆាបឆេះវិញគឺបណ្ដាលមកពីផ្កាភ្លើងខ្ទាតចេញពីបំពង់ម៉ាស៊ីនឡសម្ងួតធ្លាក់លើសំបកបាវដែលនៅក្នុងរោងជាប់គ្នានោះ ហើយភ្លើងបានឆាបឆេះយ៉ាងសន្ធោរសន្ធៅនិងមានផ្សែងហុយឃ្មួលខ្មាញ់យ៉ាងឆាប់រហ័ស។
តាមប្រភពដដែលបានបន្តថា បន្ទាប់ពីមានហេតុការណ៍បែបនេះ កម្មករនៅទីនោះបាននាំគ្នាពន្លត់ដែរ ប៉ុន្តែពន្លត់មិនរលត់ឡើយ រហូតមានការអន្តរាគមន៍ពីសំណាក់អាជ្ញាធរខណ្ឌដង្កោ ដឹកនាំដោយលោកស្រីអភិបាលខណ្ឌគឹម ញ៉ឹប និងលោកអធិការនគរបាលខណ្ឌជឹម ស៊ីថា នាំយករថយន្តពន្លត់អគ្គិភ័យដែលប្រចាំការនៅសាលាខណ្ឌ ព្រមទាំងហៅរថយន្តពន្លត់អគ្គិភ័យពីបណ្ដាអង្គភាពផ្សេងៗទៀតទៅជួយចេញទៅបាញ់ពន្លត់ ទើបរលត់ទៅវិញ ។
តាមប្រភពដដែលបានបន្តទៀតថា ក្នុងការពន្លត់អគ្គិភ័យខាងលើ បានប្រើប្រាស់រថយន្ដពន្លត់អគ្គិភ័យសរុបចំនួន១២គ្រឿង ក្នុងនោះរួមមាន រថយន្តការិយាល័យអគ្គីភ័យពន្លត់អគ្គិភ័យនៃស្នងការដ្ឋាននគរបាលរាជធានីភ្នំពេញចំនួន៨គ្រឿង រថយន្តពន្លត់អគ្គិភ័យនៃស្នងការដ្ឋានខេត្ដកណ្ដាលចំនួន៣គ្រឿង និងរថយន្តពន្លត់អគ្គិភ័យក្រុមហ៊ុនស្រាបៀកម្ពុជា១គ្រឿង ហើយភ្លើងបានរត់ជាស្ថាពរនៅម៉ោង៩និង៥៣នាទីនាព្រឹកថ្ងៃខែឆ្នាំដដែលនោះ ម្យ៉ាងទៀតមិនបានបណ្ដាលឲ្យមានមនុស្សណាម្នាក់រងរបួសឬស្លា.ប់ឡើយ៕ (កែសម្រួលដោយ ៖ ធីតា)
ចែករំលែកព័តមាននេះ