ខេត្តបាត់ដំបង ៖ អតីតទណ្ឌិតចំនួន២នាក់ ត្រូវបានកម្លាំងការិយាល័យព្រហ្មទណ្ឌកំរិតស្រាល សហការជាមូយកម្លាំងមូលដ្ឋានតាមចាប់ខ្លួនបានជាបន្តបន្ទាប់នៅកន្លែងផ្សេងៗគ្នា តាមដីកាបង្គាប់ឲ្យនាំខ្លួនរបស់សាលាដំបូងខេត្ត កាលពីវេលាម៉ោង១រសៀលថ្ងៃទី២៥ វិច្ឆិកា ដែលជាប់ចោទពីបទលួចមានស្ថានទំងន់ទោស (ប្លន់) ។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ជនត្រូវចោទទាំង០២នាក់នោះ ត្រូវបាននាំខ្លួននៅកន្លែងផ្សេងគ្នា តែបានប្រព្រឹត្តបទល្មើសរួមគ្នាក្នុងអំពើ«ប្លន់»។ ជនម្នាក់ឈ្មោះ ទិត្យ រ៉ូហ្សែត ហៅ ហ្សិត អាយុ២៣ឆ្នាំ រស់នៅភូមិព្រែកក្រូច ឃុំព្រែកនរិន្ទ ស្រុកឯកភ្នំ តែត្រូវតាមចាប់ខ្លួនបាន នៅភូមិភូមិតាសី ឃុំតាម៉ឺន ស្រុកថ្មគោល និង ម្នាក់ទៀតឈ្មោះ ទោម សម្បត្តិ ហៅ ឆាយ អាយុ៣០ឆ្នាំ នៅភូមិរំចេក៤ សង្កាត់រតនៈ ក្រុងបាត់ដំបង (ចាប់ខ្លួននៅផ្ទះ)។
លោកឈឿង គឹមសុង បានប្រាប់ថា បើតាមប្រវត្តិជនទាំង០២នាក់នេះ សុទ្ធតែធ្លាប់ជាប់គុកដូចគ្នា តែក្រោយចេញពីគុកក្រុមនេះបានប្រព្រឹត្តបទល្មើសជាថ្មីទៀត គឺ «ប្លន់» ម៉ូតូរបស់មិត្តភក្ដិ។ ជនទាំង០២នាក់នេះត្រូវបាននាំខ្លួនតាមដីការបស់លោក ចាប តុលា ចៅក្រមស៊ើបសួរសាលាដំបូងខេត្ត។
យោងតាមដីកា «បង្គាប់ឲ្យនាំខ្លួន» របស់លោក ចាប តុលា ចៅក្រមស៊ើបសួរ សាលាដំបូងខេត្ត គឺ ជនត្រូវចោទឈ្មោះ ទិត្យ រ៉ូហ្សែត ហៅ ហ្សិត និង ឈ្មោះ ទោម សម្បត្តិ ហៅ ឆាយ ត្រូវបានតំណាងអយ្យការអមសាលាដំបូងខេត្ត ចោទប្រកាន់ពីបទ«លួចមានស្ថានទម្ងន់ ដោយសារការប្រព្រឹត្តអំពើហឹង្សា» ដែលបានប្រព្រឹត្ត កាលពីថ្ងៃទី២៧ តុលា ២០២០ នៅចំណុចក្លិប ខារ៉ាអូខេយីហោ ត្រចៀកកាំ ស្ថិតនៅក្នុងភូមិរំចេក៤ សង្កាត់រតនៈ ក្រុងបាត់ដំបង។
នៅក្នុងអំពើវាយប្លន់យកម៉ូតូនេះ បើតាមសមត្ថកិច្ច បានប្រាប់ថា ជនរងគ្រោះនិងក្រុមជនដៃដល់គឺជាមិត្តភក្ដិនឹងគ្នា ដែលក្រុមជនដៃដល់ល្បូងឲ្យចូលច្រៀងខារ៉ាអូខេ រួចព្រូតគ្នាវាយជនរងគ្រោះប្លន់យកម៉ូតូតែម្ដង។ ក្រោយប្លន់បានសម្រេច ក្រុមជនដៃដល់បានគេចខ្លួនបាត់ស្រមោល រហូតដល់ពេលនេះទើបកម្លាំងសមត្ថកិច្ចស្រាវជ្រាវចាប់ខ្លួនបានតាមដីកាតុលាការ។
លោក ឈឿង គឹមសុង បានបញ្ជាក់ដែរថា ជនត្រូវចោទឈ្មោះ ទិត្យ រ៉ូហ្សែត ហៅ ហ្សិត ធ្លាប់ជាប់គុកចំនួន០២លើក ករណីប្រព្រឹត្តអំពើហឹង្សា រីឯជនឈ្មោះ ទោម សម្បត្តិ ហៅ ឆាយ ធ្លាប់ជាប់គុកមួយលើកប្រព្រឹត្តបទល្មើសគ្រឿងញៀន។ ប៉ុន្តែពួកគេមិនរាងចាលទេ ក្រោយចេញពីគុកលើកនេះ ពួកគេប្រព្រឹត្តបទល្មើសឧក្រិដ្ឋម្ដង។ ទោះយ៉ាងណា ពេលនេះ មន្ត្រីជំនាញបានបញ្ជូនខ្លួនអតីតទណ្ឌិតទាំង០២នាក់នេះ ទៅប្រគល់ជូនចៅក្រមស៊ើបសួរហើយ ដើម្បីទទួលទោសជាថ្មី ៕
ចែករំលែកព័តមាននេះ