ហុងកុង ៖ តារាសម្តែងហុងកុងសរុបចំនួន២០៥នាក់ប្រចាំស្ថានីយទូរទស្សន៍ TVB ទទួលបានការធ្វើតេស្តរកវីរុស Covid-19 បន្ទាប់ពីមានទំនាក់ទំនងជិតស្និទ្ធជាមួយលោក Edwin Siu ដែលបានឆ្លងវីរុសនេះ…
ហុងកុង ៖ តារាសម្តែងហុងកុងសរុបចំនួន២០៥នាក់ប្រចាំស្ថានីយទូរទស្សន៍ TVB ទទួលបានការធ្វើតេស្តរកវីរុស Covid-19 បន្ទាប់ពីមានទំនាក់ទំនងជិតស្និទ្ធជាមួយលោក Edwin Siu ដែលបានឆ្លងវីរុសនេះ ក្នុងកម្មវិធីមួយ។
យោងតាមរបាយការណ៍ពីទូរទស្សន៍ TVB បានឱ្យដឹងថា តារាសម្តែងប្រុសវ័យ៤៣ឆ្នាំរូបនេះ បានទៅថតកម្មវិធីម្ហូបអាហារមួយ នៅក្នុងភោជនីយដ្ឋានមួយកន្លែង កាលពីថ្ងៃទី ១៨ វិច្ឆិកា កន្លងទៅ ហើយបុគ្គលិកម្នាក់នៅផ្នែកម្ហូបអាហារ ត្រូវបានធ្វើរោគវិនិច្ឆ័យថាឆ្លងវីរុសនេះ ។ ជាលទ្ធផលលោក Edwin Siu ក៏ត្រូវបានធ្វើតេស្តមានសញ្ញាវិជ្ជមានផងដែរ កាលពីថ្ងៃទី ២៤ វិច្ឆិកា កន្លងទៅ។
យ៉ាងណាមិញ មុនពេលទទួលបានលទ្ធផលវិជ្ជមាននៃការធ្វើតេស្ត លោក Edwin Siu បានមានប្រាស្រ័យទាក់ទងជាមួយមិត្តរួមអាជីពនៅក្នុងកម្មវិធី TVB Anniversary Gala ដែលធ្វើឡើងកាលពីថ្ងៃទី ១៩ វិច្ឆិកា ដោយមានសិល្បករស្រីប្រុស ក្មេងចាស់សរុបចំនួន២០៥នាក់បានចូលរួមក្នុងកម្មវិធីនោះ ដោយភាគច្រើនពុំបានពាក់ម៉ាស់ការពារនោះទេ។
ទូរទស្សន៍ TVB បានបញ្ជាក់នៅក្នុងសេចក្តីថ្លែងការមួយថា លទ្ធផលនៃការធ្វើតេស្តលើកដំបូងលើសិល្បករទាំងអស់បានឆ្លើយតបមកវិញ គឺសញ្ញាអវិជ្ជមាន ហើយបច្ចុប្បន្នពួកគេកំពុងអនុវត្តតាមវិធានការកំណត់ ដោយដាក់ខ្លួននៅដាច់ដោយឡែកពីអ្នកដទៃ ខណៈដែលបន្ទប់ស្ទូឌីយោ និងបន្ទប់ផ្លាស់សំលៀកបំពាក់ ក៏ត្រូវបានសំអាតដោយការបាញ់ថ្នាំស.ម្លា.ប់មេរោគផងដែរ។
សូមរំលឹកថា កាលពីថ្ងៃទី ២៤ វិច្ឆិកា លោក Edwin Siu បានចែករំលែកសារមួយ និយាយពីបច្ចុប្បន្នភាពរបស់គាត់នៅលើបណ្តាញសង្គម Instagram ដោយបានអះអាងថា ខ្លួននៅតែមានសុខភាព និងស្មារតីល្អ ព្រមទាំងបានជូនពរគ្រប់គ្នាឱ្យឆ្លងផុតពីវីរុសមួយនេះ៕ (ដកស្រង់ចេញពី 8days)
ចែករំលែកព័តមាននេះ