រាជធានីភ្នំពេញ ៖ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២៥ ខែវិច្ឆិកា បានប្រកាសសាលក្រមផ្តន្ទាទោសលើសំណុំរឿងស្ត្រីម្នាក់យកកាំបិតឆូតមុខក្មេងស្រីម្នាក់អាយុ៥ឆ្នាំ ដាក់ពន្ធនាគារកំណត់១២ឆ្នាំ និងសងជម្ងឺចិត្តទៅជនរងគ្រោះចំនួន២០០លានរៀល ។ សាលក្រមបានទុកសិទ្ធិឲ្យប្តឹងឧទ្ធរណ៍តាមកំណត់ច្បាប់…
រាជធានីភ្នំពេញ ៖ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២៥ ខែវិច្ឆិកា បានប្រកាសសាលក្រមផ្តន្ទាទោសលើសំណុំរឿងស្ត្រីម្នាក់យកកាំបិតឆូតមុខក្មេងស្រីម្នាក់អាយុ៥ឆ្នាំ ដាក់ពន្ធនាគារកំណត់១២ឆ្នាំ និងសងជម្ងឺចិត្តទៅជនរងគ្រោះចំនួន២០០លានរៀល ។ សាលក្រមបានទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើភាគីណាមួយកើតទុកមិនសុខចិត្ត ចំពោះការកាត់ក្តីរបស់តុលាការជាន់ទាបនេះ ។
ស្ត្រីជាប់ចោទមានឈ្មោះ លីវ ប៊ុនធឿន អាយុ៤៣ឆ្នាំ រស់នៅផ្ទះលេខ៦ ផ្លូវលេខ២៦ បុរីភពថ្មីឈូកវ៉ា២ ក្នុងភូមិតិក្ខប្បញ្ញោ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
សូមបញ្ជាក់ថា កាលពីរសៀលថ្ងៃទី១៧ ខែវិច្ឆិកា ឆ្នាំ២០២០ សាលាដំបូងរាជធានីភ្នំពេញ បានលើកយកសំណុំរឿងព្រហ្មទណ្ឌធ្ងន់ធ្ងរមួយនេះ មកបើកសវនាការជំនុំជម្រះទោស ដែលស្ត្រីម្នាក់បានយកកាំបិតឆូតមុខនិងអារ.ដៃក្មេងស្រីអាយុ៥ឆ្នាំ បណ្តាលឲ្យរងរបួសធ្ងន់ធ្ងរដេរជាង១០ ០ថ្នេរ ។ សវនាការនេះដឹកនាំដោយលោកស្រី អ៊ុក រ៉េតគន្ធា ជាប្រធានក្រុមប្រឹក្សាជំនុំជម្រះ ប៉ុន្តែនៅពេលសាកសួរដេញដោលចប់ប្រធានក្រុមប្រឹក្សា បានលើកពេលប្រកាសសាលក្រម ទៅថ្ងៃទី២៥ ខែវិច្ឆិកា នេះ ។
នៅចំពោះអង្គសវនាការស្ត្រីជាជនដៃដល់ឈ្មោះ លីវ ប៊ុនធឿន បានឆ្លើយសារភាពថា នៅរសៀលថ្ងៃកើតហេតុទី១៦ ខែកក្កដា ឆ្នាំ២០២០ ខ្លួនបានទៅទិញកូនកាំបិតនៅ ក្នុងផ្សារ រួចក៏ចាប់ក្មេងស្រីរងគ្រោះឆូតមុខ ច្រមុះ និងដៃ នោះគឺជាការតបស្នង ទៅលើអ្វីដែលភាគីម្ខាងនោះបានយកដុំថ្មគប់លើកូនប្រុសរបស់ខ្លួន ។ រឿងនឹងគាត់ខឹងខ្លាំងណាស់ដេកមិនលក់ ២យប់មកហើយ ដោយសារតែក្មេងស្រីរងគ្រោះ ធ្វើឲ្យកូនខ្លួនចេញឈាម ហើយត្រូវដឹងថា កូនខ្លួនធំឡើង នឹងក្លាយជាតារាផងដូច្នេះខ្លួនសុំត្រឹមតែឲ្យក្មេងស្រីនោះ ចេញឈាមវិញដូចកូនគាត់ដែរ ។
ក្មេងស្រីរងគ្រោះមានឈ្មោះ ឡាស់ ម៉ាវីលីយ៉ា អាយុ៥ឆ្នាំ រងរបួសផ្ទៃមុខ ច្រមុះ ក និង ដៃធ្ងន់ធ្ងរ ។ លោក គុជ គឹមឡុង ព្រះរាជអាជ្ញារង នឹងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានឱ្យដឹងថា លោក សុខ កែវបណ្ឌិត ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ នៅព្រឹកថ្ងៃ១៨ ខែកក្កដា ឆ្នាំ២០២០ បានសម្រេចធ្វើការចោទប្រកាន់លើស្ដ្រីម្នាក់ដែលមានចិត្តឃោឃៅ យកកាំបិតវះមុខក្មេងស្រីអាយុ៥ឆ្នាំ ជាផ្លូវការហើយ ពីបទ.ទារុណកម្ម នឹងអំពើឃោរ.ឃៅ តាមបញ្ញាតិមាត្រា២១១ នៃក្រមព្រហ្មទណ្ឌ ។
មាត្រា២១១ នៃ ក្រមព្រហ្មទណ្ឌ បានចែងថា បទ.ទារុណកម្ម និងអំពើឃោរ.ឃៅ មានស្ថានទម្ងន់ទោសទាក់ទង នឹងជនរងគ្រោះ តម្រូវឲ្យផ្តន្ទាទោសដាក់ពន្ធនាគារពី១០ទៅ ២០ឆ្នាំ ។ ក្រោយពីតំណាងអយ្យការបានចោទប្រកាន់ សំណុំរឿងបានចាត់បញ្ជូនទៅចៅក្រមស៊ើបសួរគឺស្ថិតនៅដៃលោក ឆឹម ឫទ្ធី កំពុងបើកការស៊ើបសួរ ដើម្បីសម្រេចឃុំខ្លួនជនសង្ស័យដាក់ពន្ធនាគារជាបណ្តោះអាសន្ន ។
សូមរំលឹកថា ស្ត្រីដែលជាជនដៃដល់ក្នុងការឆូតមុខក្មេងស្រីម្នាក់បណ្ដាលឲ្យរងរបួសធ្ងន់ធ្ងរ ព្រោះតែជាការសងសឹកជំនួសកូនប្រុសគាត់ ដែលត្រូវបានក្មេងស្រីរងគ្រោះគប់បែកក្បាលហូរឈាម និងត្រូវប្រឈមមុខចំពោះផ្លូវច្បាប់ និងការទាមទារសំណងខូចខាតពីសំណាក់អាណាព្យាបាលក្មេងស្រីរងគ្រោះជាទឹកប្រាក់ចំនួនរាប់ម៉ឺនដុល្លារថែមទៀតផង ។ ខណៈពេលនោះក្មេងស្រីរងគ្រោះ បាននាំទៅសម្រាកព្យាបាលរបួសនៅក្នុងមន្ទីរពេទ្យកុមារជាតិ ហើយក៏មានអាជ្ញាធរនិងសប្បុរសជននានាទៅសាកសួរសុខទុក្ខដល់មន្ទីរពេទ្យព្រមទាំងជួយឧបត្ថម្ភមជាបន្តបន្ទាប់ ។
រីឯមជ្ឈដ្ឋានជាច្រើនបានសម្ដែងនូវការអាណិតអាសូរដល់នាងតូចរូបនេះនិង ថ្កោលទោសនូវទង្វើដ៏សាហាវព្រៃផ្សៃរបស់ជនដៃដល់ ។ មហាជនជាច្រើនបានទន្ទឹងរង់ចាំមើលនូវចំណាត់ ការតាមផ្លូវច្បាប់ពីតុលារទៅលើស្ត្រីដៃដល់ និងចង់ដឹងថាតើស្ត្រីនោះអាចនិងជាប់ពន្ធនាគាររយៈពេលប៉ុន្មានឆ្នាំ ហើយបើយោងតាមបណ្ដាញសង្គមហ្វេសប៊ុកបានបង្ហោះពីសកម្មភាពនានាក្រោយពេលកើតហេតុ ដោយក្នុងនោះអាជ្ញាធរខណ្ឌនិងគរបាលខណ្ឌពោធិ៍សែនជ័យ ដឹកនាំដោយលោក ហែម ដារិទ្ធិ បានចុះទៅសួរសុខទុក្ខដល់មន្ទីរពេទ្យទាំងយប់និងឧបត្ថម្ភថវិការួមគ្នាសរុប៧៥០ដុល្លារអាមេរិក ។
រីឯប្រធានមន្ទីរពេទ្យកុមារជាក៏បានជួយព្យាបាលដោយមិនគិតប្រាក់ឡើយ បន្តបន្ទាប់ទៀតគឺលោកឧកញ៉ ឌួង ឆាយ ក៏បានទៅសួរសុខទុក្ខដល់មន្ទីរពេទ្យដែរ ហើយពុំដឹងថាបានជួយឧបត្ថម្ភថវិការផ្ទាល់ប៉ុន្មានទេ ប៉ុន្តែបានធានាថានៅពេលដែលក្មេងស្រីរូបនេះជាលោកនិងនាំទៅអ៊ុតបំបាត់ស្នាមរបួសនៅឯប្រទេសកូរ៉េឬប្រទេសថៃ ។
ចំណែកសប្បុរសជនម្នាក់ទៀតដែលជាថៅកែហាងពេជ្រដ៏ល្បីគឺអ្នកស្រី ទ្រី ដាណា និងស្វាមី ក៏បានទៅសួរសុខទុក្ខដល់មន្ទីរពេទ្យ ហើយដោយសារតែរន្ធត់និងអាណិតក្មេងស្រីខ្លាំងពេកទប់ទឹកភ្នែកមិនបាន អ្នកស្រីទ្រីដាណា បានយំតែម្ដង បន្ទាប់មកអ្នកស្រីបានឧបត្ថម្ភថវិកាចំនួន ២ពាន់ដុល្លារអាមេរិកផងដែរ ។
គួររំលឹកទៀតថា នគរបាលផ្នែកព្រហ្មទណ្ឌនៃអធិការដ្ឋានខណ្ឌពោធិ៍សែនជ័យ នាវេលារសៀលថ្ងៃទី១៧ ខែកក្កដា ឆ្នាំ២០២០ បានធ្វើការសាកសួរជនដៃដល់រូបនេះចប់សព្វគ្រប់ហើយ មិនតែប៉ុណ្ណោះក៏បានកសាងសំណុំរឿងបញ្ជូនជនដៃដល់ទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ។
ជាមួយនោះដែរឪពុកម្ដាយក្មេងស្រីរងគ្រោះ ក៏បានដាក់ពាក្យបណ្ដឹងនៅសមត្ថកិច្ចដោយមានសំណូមពរ២ចំណុចគឺទី១-ទាមទារសំណងការខូចខាតកូនស្រីជាទឹកចំនួន១០ម៉ឺនដុល្លារអាមេរិក និងទី២-សំណូមពរសុំឲ្យជួយចាត់ការជនដៃដល់តាមច្បាប់ ។
ស្ត្រីដែលបានប្រព្រឹត្តអំពើឃោរឃៅលើកុមារីរងគ្រោះ មានប្ដីជាមន្ត្រីកងទ័ពជើងគោក ហើយបុរសជាប្ដីក៏បានទៅមើល និងយកបាយទឹកឲ្យប្រពន្ធហូបផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ