ប្រទេសថៃ ៖ ស្ថានការណ៍តានតឹងសម្រាប់អ្នកសង្កេតការណ៍ឃើញថា កំពុងមានការកើនឡើងខ្លាំងជុំវិញបាតុកម្មតវ៉ានៅប្រទេសថៃ បន្ទាប់ពីមានការបាញ់មនុស្សចំនួន៦នាក់ឲ្យរងរបួសក្នុងការប៉ះទង្គិចគ្នាកាលពីសប្តាហ៍មុន រហូតប្រើឧស្ម័នបង្ហូរទឹកភ្នែក និងកាណុងបាញ់ទឹកពណ៌លើក្រុមបាតុករ នៅតាមដងផ្លូវនៃទីក្រុងបាងកក ។
យោងតាមបណ្តាញព័ត៌មាន CNA នារសៀលថ្ងៃទី២៤ ខែវិច្ឆិកា ឆ្នាំ២០២០ បានរាយការណ៍ថា ទីក្រុងបាងកកកំពុងប្រឈមនឹងបាតុកម្មដ៏ធំមួយទៀតនៅថ្ងៃទី២៥ ខែវិច្ឆិកា ដោយក្រុមបាតុករគ្រោងប្រមូលផ្តុំគ្នានៅឯការិយាល័យរាជសម្បត្តិ(Crown Property Bureau) ដែលជាភ្នាក់ងារគ្រប់គ្រងទ្រព្យសម្បត្តិព្រះរាជា ។
សូមបញ្ជាក់ថា ក្រុមចលនានិស្សិតរបស់ថៃ បានធ្វើការតវ៉ាអស់ជាច្រើនខែមកហើយ ដោយក្នុងនោះសញ្ញាម្រាមដៃ៣របស់ពួកគេនៅតែប្រើប្រាស់ ដើម្បីទាមទារចំណុចសំខាន់ៗចំនួន៣ គឺ ៖
១-លោក ប្រាយុទ្ធ ចាន់អូចា ត្រូវចុះចេញពីតំណែងនាយករដ្ឋមន្ត្រី២-កែប្រែរដ្ឋធម្មនុញ្ញឲ្យដូចមុនឆ្នាំ២០១៩ និង៣-ការធ្វើកំណែទម្រង់រាជានិយម ដែលផ្តល់អំណាចជ្រុលពេកដល់ព្រះមហាក្សត្របច្ចុប្បន្នដែលពួកគេមិនសូវជាពេញចិត្តនោះឡើយ ។
ជាមួយគ្នានេះ សភាសហព័ន្ធអាល្លឺម៉ង់បានប្រកាសថា ព្រះមហាក្សត្រថៃអាចនឹងត្រូវឱ្យយាងចេញពីអាល្លឺម៉ង់ ប្រសិនបើទ្រង់មិនគិតគូរពីប្រទេសរបស់ទ្រង់ទេនោះ ។គេដឹងថា ព្រះមហាក្សត្រថៃ Maha Vajiralongkorn ទ្រង់បន្ដស្នាក់នៅក្នុងព្រះរាជដំណាក់នៅឯរដ្ឋបាវ៉ារីយ៉ារបស់អាល្លឺម៉ង់ដែលទីនោះគឺជាកន្លែងដែលទ្រង់តែងតែទៅគង់នៅជា
ទម្លាប់ ។
ការបន្ដគង់នៅយ៉ាងយូររបស់ព្រះមហាក្សត្រ Maha Vajiralongkorn នៅទ្វីបអឺរ៉ុប
បានស្ថិតនៅក្រោមការឃ្លាំមើលនិងរងការរិះគន់យ៉ាងខ្លាំង ក្នុងអំឡុងពេលដែលប្រទេសថៃកំពុងមានការតវ៉ាប្រឆាំងរដ្ឋាភិបាល និងរបបរាជានិយមពីសំណាក់ ក្រុមអ្នកគាំទ្រលទ្ធិប្រជាធិបតេយ្យ ។
សភាអាល្លឺម៉ង់ប្រកាសថា ព្រះមហាក្សត្រថៃ Maha Vajiralongkorn មានឯកសិទ្ធិការទូតក្នុងអំឡុងពេលគង់នៅក្នុងដំណាក់របស់ទ្រង់ ប៉ុន្តែរដ្ឋបាវ៉ារីយ៉ាក៏មានអំណាចគ្រប់គ្រាន់ក្នុងការឱ្យទ្រង់យាងចេញពីប្រទេសផងដែរ ។ យ៉ាងណាក៏ដោយ រដ្ឋរបស់អាល្លឺម៉ង់មួយនេះ មានអំណាចតិចតួចណាស់ក្នុងការវិនិច្ឆ័យលើព្រះមហាក្សត្រថៃ ទោះបីជាមានការគំរាមកំហែងថ្មីៗពីសំណាក់រដ្ឋមន្ត្រីក្រសួងការបរទេសអាល្លឺម៉ង់ Heiko Maas ក៏ដោយ ។ កាលពីខែតុលាកន្លងទៅ រដ្ឋមន្ត្រីក្រសួងការបរទេសអាល្លឺម៉ង់រូបនេះ ក៏បានព្រមានដល់ព្រះមហាក្សត្រថៃ ប្រឆាំងនឹងការដែលចោទថា ទ្រង់គ្រប់គ្រងប្រទេសរបស់ទ្រង់ចេញពីប្រទេសអាល្លឺម៉ង់ ។
ព្រះមហាក្សត្រថៃចំណាយពេលជាច្រើនខែក្នុងដំណាក់មួយក្បែរបឹង Starnberg ស្ថិតនៅខាងត្បូងទីក្រុងមុយនិច ហើយនៅរដូវផ្ការីក ទ្រង់តែងតែប្រថាប់នៅសណ្ឋាគារប្រណីតមួយ នៅរមណីយដ្ឋានជិះស្គីនៅ Garmisch-Partenkirchen ។ សារព័ត៌មាន Deutche Welle បានរាយការណ៍ថា ព្រះអង្គតែងវិលត្រឡប់ទៅប្រទេសថៃវិញ ក្នុងអំឡុងខែតុលា ដើម្បីចូលរួមពិធីនានា និងការបង្ហាញព្រះរាជវត្តមានមួយចំនួន ប៉ុន្តែគណបក្សប្រឆាំងរបស់អាល្លឺម៉ង់ កំពុងអំពាវនាវឱ្យរដ្ឋាភិបាលអាល្លឺម៉ង់ ហាមឃាត់ព្រះមហាក្សត្រថៃមិនឱ្យចូលប្រទេសអាល្លឺម៉ង់បន្តទៀត ។
ចែករំលែកព័តមាននេះ