សំណុំរឿងបរិហារកេរ្តិ៍ប្តឹងលោកសម រង្ស៊ី ៖ តុលាការបារាំងនឹងបើកសវនាការថ្ងៃ១ ខែកញ្ញា
- ភ្នំពេញ
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានប្រកាសឲ្យដឹងនៅព្រឹក ថ្ងៃពុធ ទី២៥ ខែវិច្ឆិកា នេះថា…
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាបានប្រកាសឲ្យដឹងនៅព្រឹក ថ្ងៃពុធ ទី២៥ ខែវិច្ឆិកា នេះថា តុលាការប្រទេសបារាំងបានកំណត់ថ្ងៃបើកសវនាការលើបណ្តឹងបរិហារកេរ្តិ៍ របស់សម្តេចដែលប្តឹងអតីតមេដឹកនាំគណបក្សប្រឆាំងលោក សម រង្ស៊ី នារសៀលថ្ងៃទី០១ ខែកញ្ញា ឆ្នាំ២០២២ ដែលសវនាការនេះអាចនឹងប្រើពេល ២ម៉ោងកន្លះ ។
សម្តេចតេជោ បានថ្លែងឲ្យដឹងបែបនេះនាឱកាសអញ្ជើញជួបសំណេះសំណាល និងពិនិត្យលទ្ធផលការងាររបស់សមាជិកក្រុមមេធាវីរាជរដ្ឋាភិបាល និងមេធាវីស្ម័គ្រចិត្តសម្តេចតេជោ សរុបចំនួន១៥៣នាក់ នៅវិមានសន្តិភាព នៅរាជធានីភ្នំពេញ ។ សម្តេចតេជោ ហ៊ុន សែន បានបញ្ជាក់ថា សំណុំរឿងមួយនេះ គឺរូបសម្តេច បានប្តឹងនៅតុលាការនៅប្រទេសបារាំង តាំងពីឆ្នាំ២០១៩ មកម្លេះ ។ គ្រាន់តែសំណុំរឿងមួយនេះ ប្រើពេលដល់ទៅ ៣ឆ្នាំ ទើបអាចបើកសវនាការបាន ។ ដូច្នេះរឿងអីបរទេសមួយចំនួន ចង់ឲ្យការកាត់ក្តីនៅកម្ពុជា ឲ្យបានឆាប់ បើយើងគ្មានលទ្ធភាពទៅបង្ខំតុលាការបារាំងក៏យើងមិនអាចមកបង្ខំតុលាការនៅកម្ពុជាបានដែរ។
សូមបញ្ជាក់ថា សម្តេចតេជោ ហ៊ុន សែន បានប្តឹងលោក សម រង្ស៊ី ដែលមានសញ្ជាតិបារាំងនិងកំពុងរស់នៅក្រៅប្រទេស អំពីបទបរិហារកេរ្តិ៍ ដែលបណ្តឹងធ្វើឡើងបន្ទាប់ពីលោក សម រង្ស៊ី បានចោទប្រកាន់គ្មានមូលដ្ឋានច្បាស់លាស់ជុំវិញបញ្ហាដែលថា សម្តេចតេជោ ជាអ្នករៀបចំគម្រោងសម្លាប់លោកនាយឧត្តមសេនីយ៍ ហុក ឡង់ឌី ដែលកាលនោះលោក ហុក ឡង់ឌី គឺជាអគ្គស្នងការដ្ឋាននគរបាល កាលពីឆ្នាំ២០០៨ និងគម្រោងសម្លាប់មេសហជីព ផងដែរ ។
សូមរម្លឹកផងដែរថា ការចោទប្រកាន់ដោយគ្មានមូលដ្ឋានរបស់លោក សម រង្ស៊ីនេះ សូម្បីតែលោក ឌី វិជ្ជា ដែលជាកូនប្រុសលោក ហុកឡង់ឌី ក៏បានទាត់ចោលការចោទប្រកាន់របស់អតីតមេដឹកនាំបក្សប្រឆាំនងិងបានដាក់ពាក្យប្តឹងលោក សម រង្ស៊ី នៅតុលាការបារាំង ផងដែរ ៕
ចែករំលែកព័តមាននេះ