ខេត្តប៉ៃលិន ៖ មេការកាស៊ីណូ ក៏ដូចជាបុគ្គលិកធ្វើការនៅកាស៊ីណូនីមួយៗមានការត្អូញត្អែរពីបញ្ហាជីវភាពរបស់ខ្លួន បន្ទាប់ពីកាស៊ីណូទាំងអស់នៅជាប់នឹងព្រំដែនកម្ពុជា-ថៃ ក្នុងខេត្តប៉ៃលិន ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ត្រូវបានបិទទ្វារ…
ខេត្តប៉ៃលិន ៖ មេការកាស៊ីណូ ក៏ដូចជាបុគ្គលិកធ្វើការនៅកាស៊ីណូនីមួយៗមានការត្អូញត្អែរពីបញ្ហាជីវភាពរបស់ខ្លួន បន្ទាប់ពីកាស៊ីណូទាំងអស់នៅជាប់នឹងព្រំដែនកម្ពុជា-ថៃ ក្នុងខេត្តប៉ៃលិន ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ត្រូវបានបិទទ្វារ ខណៈភ្ញៀវអន្តរជាតិ ដូចជាភ្ញៀវថៃជាដើម អត់មានឆ្លងដែនចូលមកលេងដូចសព្វមួយដងឡើយ ព្រោះតែបញ្ហាជំងឺកូវីដ១៩ ដែលកំពុងតែវាយប្រហារលើពិភពលោក ក៏ដូចជាប្រទេសកម្ពុជាផងដែរ។
ជាក់ស្តែងកាលពីវេលាម៉ោង១០និង៤០នាទីព្រឹក ថ្ងៃទី២៤ ខែវិច្ឆិកា ឆ្នាំ២០២០ កន្លងទៅនេះ គេសង្កេតឃើញកាស៊ីណូទាំងអស់ត្រូវបានថៅកែបិទទ្វារជិត លុះភ្នាក់ងារសារព័ត៌មានសួរនាំមេការ និងបុគ្គលិក ទើបពួកគេប្រាប់ថា ក្រោយពីកាស៊ីណូមួយចំនួនបានបើកទ្វារម្តងទៀត ខណៈពេលរលកកូវីដ១៩លើកទី២ ចូលមកទឹកដីកម្ពុជា កាស៊ីណូត្រូវបានបិទបន្តទៀត ហើយអនុញ្ញាតិឱ្យបុគ្គលិកទាំងអស់ត្រឡប់ទៅផ្ទះរៀងៗខ្លួន នៅសល់តែមេការមួយចំនួនរង់ចាំមើលថែទាំបន្ទប់កាស៊ីណូតែប៉ុណ្ណោះ ។
តាមប្រភពពីប្រជាពលរដ្ឋរស់នៅក្នុងភូមិផ្សារព្រំ បានរៀបរាប់ទាំងទឹកមុខស្រងូតស្រងាត់ឱ្យដឹងថា ការលក់ដូរនៅតាមច្រកទ្វារព្រំដែននាពេលនេះមានការធ្លាក់ចុះខ្លាំង ពោលគឺស្ងាត់ភ្ញៀវតែម្តង។
ប្រភពដដែលបន្តទៀតថា ច្រកទ្វារអន្តរជាតិព្រំដែន ត្រូវបានបើកឱ្យដំណើរការឡើងវិញហើយ តែគេឱ្យត្រឹមតែរថយន្តតូចធំចេញចូលដឹកទំនិញប៉ុណ្ណោះ រីឯមនុស្សវិញ គឺហាមដាច់ខាតមិនឱ្យឆ្លងកាត់ទៅមកនោះឡើយ ព្រោះទាំងភាគីថៃ និងខ្មែរ ខ្លាចក្រែងមានការឆ្លងជំងឺដ៏កាចសាហាវមួយនេះ ។
ប្រភពដដែលបញ្ជាក់ទៀតថា រហូតមកដល់ឥឡូវ កាស៊ីណូជិត១០កន្លែងត្រូវបានបិទទ្វារទាំងអស់ មិនមានភ្ញៀវណាចូលទៅលេងនោះឡើយ គឺមានតែប្រជាពលរដ្ឋលក់ដូរម្ហូបអាហារនៅតាមហាង និងតាមចិញ្ចើមផ្លូវបន្តិចបន្តួចសម្រាប់ផ្គត់ផ្គង់ជីវភាពគ្រួសារប្រចាំថ្ងៃ។
ហើយពួកគេម្នាក់ៗថ្ងូរគ្រប់គ្នាថា មិនដឹងជានៅពេលណា ទើបជំងឺកូវីដ១៩ ត្រូវផុតរលត់ទៅវិញនោះទេ បើសិនជានៅបន្តអូសបន្លាយរយ:ពេលយូរទៀត ពិតជាមានការខ្វះខាតផ្នែកហិរញ្ញវត្ថុគ្រួសារជាក់ជាមិនខាន ។
ពាក់ព័ន្ធទៅនឹងបញ្ហាខាងលើនេះ លោក លឹម វាសនា ប្រធានមន្ទីរទេសចរណ៍ខេត្តប៉ៃលិន បានឱ្យភ្នាក់ងារព័ត៌មានដឹងកាលពីរសៀលថ្ងៃទី២៤ ខែវិច្ឆិកា ឆ្នាំ២០២០នេះថា រហូតមកដល់ពេលនេះ កាស៊ីណូចំនួន៦កន្លែងត្រូវបានបិទទ្វារទាំងអស់វិញហើយ ពោលគឺមិនដំណើរការដូចមុននោះទេ ព្រោះតែបញ្ហាជំងឺកូវីដ១៩បន្តវាយលុក ដែលធ្វើឱ្យម្នាក់ៗមានការព្រួយបារម្ភពីសុវត្ថិភាព ។ លោកបន្តទៀតថា ដូច្នេះហើយ សូមឱ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ ត្រូវលាងដៃនឹងសាប៊ូ ឬទឹកអាល់កុលជាប្រចាំ ពិសេសត្រូវពាក់ម៉ាសការពារផងដែរ និយាយជាមួយអ្នកដទៃ ឬពេលចេញទៅក្រៅផ្ទះជាដើម ៕
ចែករំលែកព័តមាននេះ