រាជធានីភ្នំពេញ៖ ការផ្តល់ឥណទាន ឬការផ្តល់ប្រាក់កម្ចីរបស់គ្រឹះស្ថានមីក្រូហិរញ្ញវត្ថុទៅដល់ប្រជាពលរដ្ឋនៅឆ្នាំ ២០២០ អាចនឹងមានថមថយដោយសារទទួលរងផលប៉ះពាល់ពីព្រឹត្តិការណ៍សកម្មភាពធំៗចំនួន៣ដងខុសពីឆ្នាំមុនៗ ហើយអ្នកជំនាញរំពឹងថានៅដើមឆ្នាំ២០២១ទើបការផ្តល់ប្រាក់កម្ចីទើបវិលទៅរកស្ថានភាពជាធម្មតាឡើងវិញ។
ឆ្នាំ២០២០នេះសម្រាប់វិស័យមីក្រូហិរញ្ញវត្ថុបន្ទាប់ពីផ្ទុះជំងឺកូវីដ១៩ បញ្ហាជំនន់ទឹកភ្លៀងនិងការផ្ទុះឡើងវិញជាថ្មីនៅជំងឺកូវីដ១៩ដែលរាជរដ្ឋាភិបាលដាក់ឈ្មោះឬហៅថាជាព្រឹត្តិការណ៍៣វិច្ឆិកាកន្លងទៅអាចនឹងធ្វើឱ្យប៉ះពាល់ទៅដល់កំណើនៃការផ្តល់ឥណទានបើប្រៀបធៀបទៅនិងឆ្នាំ២០១៩។
លោក ផល វ៉ាន់ឌី នាយកប្រតិបត្តិសមាគមមីក្រូហិរញ្ញវត្ថុកម្ពុជាមានប្រសាសន៍ថា នៅដើមឆ្នាំ២០២០ កូវីដ-១៩ ចាប់ផ្តើមកើតនៅកម្ពុជា យើងមានការបារម្ភ។ ទោះបីស្ថានភាពផ្តល់ឥណទាននៅក្នុងខែ១ ឬខែ២ នៅរឹងមាំ តែមកដល់ខែ៤ឬខែ៥ក៏ដូចជានៅខែ៦ មានស្ថានភាពយ៉ាប់ជាខ្លាំង។ តែចូលមកដល់ខែ៧យើងហាក់ធូរបន្តិច លុះមកដលខែ៩ស្ថានភាពហាក់បីដូចជាល្អវិញ។
លោកបានបន្តថា តែដល់ចុងខែ១០ឬដើមខែ១១ មានបញ្ហាទឹកជំនន់មួយទៀតបង្កឱ្យមានការព្រួយបារម្ភ ឬធ្វើឱ្យប៉ះពាល់តិចតួច ។ តែមកដល់ព្រឹត្តិការណ៍៣វិច្ឆិកា ធ្វើឱ្យយើងមានការបារម្ភជាថ្មីម្តងទៀត តែដល់សព្វថ្ងៃនេះមានភាពប្រសើរវិញហើយ។ យើងគិតថានៅដើមឆ្នាំ២០២១ការផ្តល់ឥណទានវាអាចត្រលប់ទៅស្ថានភាពល្អធម្មតាវិញ។
បើទោះបីការផ្តល់ឥណទាននៅបំណាច់ឆ្នាំ២០២០នេះ ត្រូវបានប៉ាន់ប្រមាណថា អាចនឹងមានការថមថយប្រៀបធៀបទៅនឹងឆ្នាំ២០១៩ក្តី ប៉ុន្តែការដាក់ប្រាក់បញ្ញើរបស់ប្រជាពលរដ្ឋ ឬអតិថិជននៅក្នុងវិស័យមីក្រូហិរញ្ញវត្ថុមិនមានការស្រុតចុះនោះទេ។
លោក ផលវ៉ាន់ឌី គូសបញ្ជាក់ថា «មកដល់ពេលនេះ គឺការដាក់ប្រាក់បញ្ញើនៅល្អធម្មតា អត់មានស្រុតចុះទេ តែគ្រាន់ថាអត្រាប្រាក់កម្ចី ដោយតម្រូវការរបស់ប្រជាពលរដ្ឋ គឺគាត់មានតម្រូវការទាបជាងពេលមុនបន្តិច។ អីចឹងនៅពេលសេដ្ឋកិច្ចដើរឡើងវិញ គាត់នឹងត្រូវការថវិកាថែមទៀតហើយ។នៅដើមឆ្នាំក្រោយអ្វីៗនឹងល្អប្រសើរឡើងវិញ»។
នៅឆ្នាំ២០២០នេះ កំណើននៃការផ្តល់ប្រាក់កម្ចីប្រាកដជាមានផលប៉ះពាល់ខ្លះហើយ ព្រោះនៅខែ៤ឬខែ៥កន្លងទៅនេះមានផលប៉ះពាល់ច្រើន ហើយផលប៉ះពាល់នេះបានបន្តដូចជាបញ្ហាទឹកជំនន់ និងព្រឹត្តិការណ៍៣វិច្ឆិកាកន្លងទៅនេះបានរំខាន (ប៉ះពាល់) អីចឹងយើងគិតថា នៅដើមឆ្នាំក្រោយការផ្តល់ប្រាក់កម្ចីអាចនឹងប្រសើរឡើងវិញ» ៕
ចែករំលែកព័តមាននេះ