ក្នុងចំណោម «មរតកមនុស្សរស់» របស់កម្ពុជាមិនច្រើនប៉ុន្មាននោះ ចំនួន៤រូបមានប្រភពកំណើតនៅខេត្តតាកែវ ។ ទោះជាយ៉ាងណាក្ដីក្នុងចំណោមព្រឹទ្ធាចារ្យមានទេពកោសល្យខាងសិល្បៈ វប្បធម៌ អក្សរសាស្ត្រ ដ៏គួរឲ្យកោតសរសើរទាំង៤រូបនោះ ភាគច្រើនបានបង់ជីវិតទៅហើយនារយៈពេលប៉ុន្មានឆ្នាំចុងក្រោយនេះ ។
«មរតកមនុស្សរស់» គឺជាបុគ្គលមានចំណេះដឹង មានទេពកោសល្យលើសពីមនុស្សធម្មតា ក៏ដូចជាការលើកទឹកចិត្តបុគ្គលដែលមានទេពកោសល្យ និងស្នាដៃចំពោះមនុស្សជាតិ។
មរតកមនុស្សរស់មានប្រភពកំណើតនៅខេត្តតាកែវទាំង៤រូប គឺ ៖
ព្រឹទ្ធាចារ្យភិរម្យវោហារប្រាជ្ញ ឈួន បានចូលច្រៀងចាប៉ីប្រចាំវិទ្យុជាតិនាឆ្នាំ១៩៦១។ បន្ទាប់មកនៅឆ្នាំ១៩៦២ គាត់បានចូលរួមប្រឡងចម្រៀងចាប៉ីដងវែង ក្នុងសមាជជាតិលើកទី១១ ជាប់ចំណាត់ថ្នាក់លេខ១ ។ មរតកមនុស្សរស់ ដ៏មានទេពកោសល្យប្រាជ្ញ ឈួន ទទួលមរណភាពក្នុងវ័យ៨២ឆ្នាំដោយជរា និងរោគាពាធ នាថ្ងៃទី១៧ ខែវិច្ឆិកា ឆ្នាំ២០១៨ នៅស្រុកកំណើតរបស់គាត់ភូមិស្រម៉ក្រោម ឃុំខ្វាវ ស្រុកទ្រាំង ។
ចំណែក ព្រឹទ្ធាចារ្យកោសល្យតន្ត្រីវិជ្ជាធរសុខ ឌុច មានទេពកោសល្យខាងភ្លេងការ និងភ្លេងអារក្ស ។ ព្រឹទ្ធាចារ្យបានទទួលប័ណ្ណសរសើរនៅឆ្នាំ១៩៧៩ ទទួលសញ្ញាបត្រកិត្តិយសវរសិល្បករឆ្នាំ១៩៩៦ ផ្ដល់ដោយក្រសួងវប្បធម៌និងវិចិត្រសិល្បៈ ។ គាត់បានទទួលវិញ្ញាបនបត្រ ព្រឹទ្ធាចារ្យវប្បធម៌ និងសិល្បៈខ្មែរនៅឆ្នាំ២០០១ និងប្រកាសនីយបត្រ គ្រឿងឥស្សរិយយសមុនីសារាភ័ណ នៅឆ្នាំ២០០៩ ។
ព្រឹទ្ធាចារ្យសុខ ឌុច បានបង្រៀនភ្លេងបុរាណដល់សិស្ស៣ក្រុម សរុប៣៦នាក់ ព្រមទាំងបណ្ដុះបណ្ដាលសិស្សខ្មែរ និងបរទេសជាច្រើននាក់ទៀត ។ ព្រឹទ្ធាចារ្យរូបនេះទទួលមរណភាពក្នុងវ័យ៩២ឆ្នាំ នៅថ្ងៃទី៦ ខែឧសភា ឆ្នាំ២០១៧ ។
ចំពោះ ព្រឹទ្ធាចារ្យនាដភក្ដីនិម្មិតអ៊ុំ សាមិត្ត ជាព្រឹទ្ធាចារ្យល្ខោនបាសាក់ដ៏ឆ្នើម។ ក្នុងចំណោមស្នាដៃជាច្រើន គាត់បានសម្ដែងជាតួអង្គតេជោមាស នៃល្ខោនបាសាក់រឿងតេជោយ៉ត ដ៏ល្បីដែលផលិតដោយវិទ្យុជាតិ ។
នាដភក្ដីនិម្មិតអ៊ុំ សាមិត្ត ក្រៅពីជាសិល្បករ គាត់ជាគ្រូបង្ហាត់ល្ខោនបាសាក់ និងនិពន្ធរឿងទៀតផង ។ គាត់ទទួលបានសញ្ញាបត្រកិត្តិយសជាវរសិល្បករឯកទេសល្ខោនបាសាក់ ឆ្នាំ១៩៩៩-២០០០ និងគ្រឿងឥស្សរិយយស សិល្បករមានស្នាដៃឆ្នើមក្នុងវិស័យសិល្បៈវប្បធម៌ខ្មែរ ថ្នាក់មេដាយមាស ។ ព្រឹទ្ធាចារ្យអ៊ុំ សាមិត្ត ទទួលមរណភាព ក្នុងវ័យ៧៦ឆ្នាំ នៅថ្ងៃទី១៥ ខែវិច្ឆិកាឆ្នាំ២០១៩ ។
ដោយឡែក ព្រឹទ្ធាចារ្យគរុពហុស្សូត បណ្ឌិតជិត ជន ជាសាស្ត្រាចារ្យភាសាបាលី សំស្ក្រឹត និងទស្សនៈវិជ្ជា នៅសាកលវិទ្យាល័យ ព្រះសីហនុរាជ ។ ព្រឹទ្ធាចារ្យវ័យ៨៦ឆ្នាំមានស្រុកកំណើតនៅឃុំត្រពាំងធំខាងជើង ស្រុកត្រាំកក់ ខេត្តតាកែវ រូបនេះចេះចាំស្ទាត់ភាសាបាលី និងសំស្ក្រឹត និងសម្ដែងធម៌ ។
គរុពហុស្សូតជិត ជន មានជំនាញនិពន្ធកំណាព្យជាភាសាបាលី និងសំស្ក្រឹត ព្រមទាំងបកប្រែកំណាព្យពីភាសាបាលី-សំស្ក្រឹត មកជាភាសាខ្មែរ ។ គាត់ទទួលសញ្ញាបត្របណ្ឌិតកិត្តិយសភាសាបាលី នៅថ្ងៃទី៤ ខែកក្កដា ឆ្នាំ២០១១ ព្រមទាំងគ្រឿងឥស្សរិយយស ផ្នែកអប់រំ ក្នុងវិស័យសិល្បៈវប្បធម៌ខ្មែរ ។ ព្រឹទ្ធាចារ្យជិត ជន ជាង៤០ឆ្នាំមកហើយបង្រៀនទាំងព្រះសង្ឃ និងគ្រហស្ថ៕
ចែករំលែកព័តមាននេះ