រាជធានីភ្នំពេញ ៖ ស្ត្រី២នាក់ម្ដាយមីងនិងក្មួយបានបាត់បង់ជីវិតភ្លាមៗនៅនឹងកន្លែងក្នុងឧប្បត្តិហេតុគ្រោះថ្នាក់ចរាចរដ៏រន្ធត់មួយ ខណៈដែលពួកគាត់ទាំង២នាក់កំពុងជិះម៉ូតូឌុបគ្នាធ្វើដំណើរឆ្លងផ្លូវ ស្រាប់តែមានរថយន្តដឹកស៊ីម៉ង់ត៌១គ្រឿងបើកក្នុងល្បឿនលឿនទៅដល់បានបុកពីក្រោយបណ្ដាលឲ្យដួលខ្ទាតចូលក្រោមកង់រថយន្តនោះកិនបែកក្បាលធ្លាយខួរស្លា.ប់តែម្ដង។
ឧប្បត្តិហេតុគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី២៣ ខែវិច្ឆិកា ឆ្នាំ២០២០ នៅលើកំណាត់ផ្លូវជាតិលេខ៣ ត្រង់ចំណុចមុខ សួនឧស្សាហកម្មវឌ្ឍនៈ២ ស្ថិតនៅក្នុងភូមិទឹកថ្លា ក្រាំងពង្រ ខណ្ឌដង្កោ រាជធានីភ្នំពេញ។
ជនរងគ្រោះទាំង២នាក់ខាងលើ ក្នុងនោះម្នាក់ឈ្មោះឃុន ស្រីពេជ្រ អាយុ១៧ឆ្នាំត្រូវជាក្មួយស្រី និងម្នាក់ទៀតឈ្មោះម៉ាក់ វណ្ណា អាយុ៥៨ឆ្នាំ ត្រូវជាម្ដាយមីង ។ ជនរងគ្រោះទាំង២នាក់មានមុខរបរលក់ទូរស័ព្ទនៅក្នុងផ្សារទឹកថ្លា មានទីលំនៅក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។ ជនរងគ្រោះទាំង២នាក់ជិះម៉ូតូ១គ្រឿងម៉ាកHonda Beat ពណ៍ខ្មៅលាយផ្កាឈូក ពាក់ស្លាកលេខ ភ្នំពេញ 1GS-5185។
ចំណែករថយន្តបង្កម៉ាកហ៊ីយ៉ាន់ដាយ ពណ៍សលាយខៀវ ពាក់ស្លាកលេខ តាកែវ 3A-1246 អ្នកបើកបរត្រូវបាននគរបាលចាប់ខ្លួន ខណៈពេលឈប់រថយន្តរួចព្យាយាមរត់គេចខ្លួននិងត្រូវបានគេស្គាល់ឈ្មោះសារ៉ាន់ រដ្ឋា ភេទប្រុស អាយុ២៧ឆ្នាំ មានទីលំនៅក្នុងភូមិវាំង ឃុំជីផុច ស្រុកមេសាង ខេត្តព្រៃវែង ។
បើតាមតាមអ្នកបើកបររថយន្តដឹកស៊ីម៉ង់ត៌ដូចគ្នាបាននិយាយថា រថយន្តនោះទើបនិងទិញក្នុងពេលកន្លងមកមិនយូរប៉ុន្មានឡើយ ហើយធ្លាប់បើកក្រឡាប់២ទៅ៣ដងរួចមកហើយ លុះពេលនេះស្រាប់តែបុកនិងកិនមនុស្សបាត់បង់ជីវិត២នាក់ទៀតបែបនេះតែម្ដង។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះទាំង២នាក់បានជិះម៉ូតូមួយគ្រឿងឌុបគ្នាចេញពីកន្លែងលក់ដូរនៅផ្សារទឹកថ្លា ឆ្ពោះទៅកាន់សួនឧស្សាហកម្មវឌ្ឍនៈ២ ដោយបានធ្វើដំណើរតាមផ្លូវជាតិលេខ៣ក្នុងទិសដៅពីត្បូងទៅជើង។ ចំណែករថយន្តបង្កបានបើកបរក្នុងល្បឿនលឿននិងក្នុងទិដៅស្របគ្នាដែរ លុះពេលទៅដល់ត្រង់ចំណុចកើតហេតុខាងលើជនរងគ្រោះបានបត់ឆ្លងផ្លូវដើម្បីចូលទៅកាន់សួនឧស្សាហកម្មវឌ្ឍនៈ២ ហើយឆ្លងជិតផុតទៅហើយ ស្រាប់តែរថយន្តខាងលើទៅដល់បុកបណ្ដាលឲ្យដួលខ្ទាតចូលក្រោមកង់កិនខ្ទេចក្បាលធ្លាយខួរស្លា.ប់ភ្លាមៗនៅនឹងកន្លែងទាំង២នាក់តែម្ដង។
តាមប្រភពព័ត៌មានបានបន្តថា ក្រោយពេលកើតហេតុ រថយន្តបានបើកគេចចេញពីកន្លែងកើតហេតុបានចម្ងាយប្រមាណជិត១គីឡូម៉ែត្រទើបឈប់ ហើយអ្នកបើកបរបានចុះរត់គេចខ្លួនកាត់វាលស្រែនិងព្រៃ ហើយក៏ត្រូវបានកម្លាំងនគរបាលតាមចាប់ខ្លួនបានរួចប្រគល់ទាំងរថយន្តទៅឲ្យកម្លាំនគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញកសាងសំណុំរឿងចាត់ការតាមច្បាប់ ។
ចំណែក សពជនរងគ្រោះទាំង២នាក់ម្ដាយមីងនិងក្មួយស្រីត្រូវបានក្រុមគ្រួសារនាំយកទៅធ្វើបុណ្យតាមប្រពៃណីក្រោមទុក្ខសោកគួរឱ្យសង្វេគបំផុត៕ (កែសម្រួលដោយ ៖ ធីតា)
ចែករំលែកព័តមាននេះ