ខេត្តមណ្ឌលគិរី ៖ គិតមកត្រឹមពាក់កណ្ដាលខែវិច្ឆិកា ឆ្នាំ២០២០នេះ ស្ថានភាពអាកាសធាតុនៅក្នុងខេត្តមណ្ឌលគិរី ត្រូវបានគេកត់សម្គាល់ឃើញថា ហាក់បីដូចជាកើនឡើងកម្ដៅបន្តិចវិញ បន្ទាប់ពីបានចុះត្រជាក់ក្នុងកម្រិតទាបកាលពីដើមខែវិច្ឆិកា ចន្លោះពីថ្ងៃទី០១ ដល់ថ្ងៃទី១២…
ខេត្តមណ្ឌលគិរី ៖ គិតមកត្រឹមពាក់កណ្ដាលខែវិច្ឆិកា ឆ្នាំ២០២០នេះ ស្ថានភាពអាកាសធាតុនៅក្នុងខេត្តមណ្ឌលគិរី ត្រូវបានគេកត់សម្គាល់ឃើញថា ហាក់បីដូចជាកើនឡើងកម្ដៅបន្តិចវិញ បន្ទាប់ពីបានចុះត្រជាក់ក្នុងកម្រិតទាបកាលពីដើមខែវិច្ឆិកា ចន្លោះពីថ្ងៃទី០១ ដល់ថ្ងៃទី១២ ។
ហើយនៅអំឡុងពេលនោះនៅខេត្តមណ្ឌលគិរី ជាពិសេសក្រុងសែនមនោរម្យសីតុណ្ហភាពបានធ្លាក់ចុះដល់១៨អង្សារនៅពេលព្រឹក រួមជាមួយខ្យល់បក់បោកខ្លាំងៗ ថែមទាំងមានធ្លាក់អ័ព្ទផងដែរ ដែលបង្កើនឲ្យអាកាសធាតុកាន់តែត្រជាក់ខ្លាំង ។
បើតាមប្រជាពលរដ្ឋនៅក្នុងក្រុងសែនមនោរម្យ បានឲ្យដឹងថា ឆ្នាំនេះហាក់បីដូចជាប្លែកខុសពីឆ្នាំមុនៗត្រង់ថា មកដល់ខែវិច្ឆិកាទៅហើយ អាកាសធាតុមិនទាន់ត្រជាក់ខ្លាំង ដោយកាលពីកន្លងទៅ គិតត្រឹមខែវិច្ឆិកានេះ សីតុណ្ហភាពនឹងធ្លាក់ចុះទាបខ្លាំងអូសបន្លាយដល់ខែមករាឯណោះ តែឆ្នាំនេះដល់ខែវិច្ឆិកាទៅហើយនៅមានពេលខ្លះស្អុះស្អាប់ម្ដងៗទៅវិញ។
លោក ចាន់ រតនា នាយករងរដ្ឋបាលសាលាខេត្ត និងជាមន្ត្រីគ្រប់គ្រងគ្រោះមហន្តរាយរបស់ខេត្តមណ្ឌលគិរី បានថ្លែងប្រាប់ថា មណ្ឌលគិរីឆ្នាំនេះរដូវរងារ គឺយឺតជាងបណ្ដាឆ្នាំមុនៗ ព្រោះថា ជាទូទៅនៅចុងខែតុលា ឬដើមខែវិច្ឆិកា នឹងចុះត្រជាក់ខ្លាំង ប៉ុន្តែពេលនេះនៅមិនទាន់ត្រជាក់នៅឡើយ ។
លោករម្លឹកថា កាលពីពេលកន្លងទៅខេត្តមណ្ឌលគិរីនៅឆ្នាំ២០០១ គឺធ្លាប់មានធ្លាក់ដុំទឹកកកតូចៗទៀតផង នៅពេលមានភ្លៀងធ្លាក់ដែលសីតុណ្ហភាពធ្លាក់ចុះទាប តែទោះជាយ៉ាងណា លោកបញ្ជាក់ថា តាមព័ត៌មានដែលលោកទទួលបានពីមន្ត្រីជំនាញ ភាពត្រជាក់អាចនឹងយឺតជាងឆ្នាំមុនៗ ដោយប្រហែលជាចាប់ផ្ដើមពីធ្នូ អូសបន្លាយដល់ចុងខែមករា ឆ្នាំ២០២១ ។
សូមបញ្ជាក់ថា បើតាមការជូនដំណឺងរបស់ក្រសួងធនធានទឹក និងឧតុនិយម ចាប់ពីថ្ងៃទី១៨ រហូតដល់២៤ វិច្ឆិកា ឆ្នាំ២០២០នេះ ភូមិភាគឥសាន្ត រួមមានខេត្តមណ្ឌលគិរីផង បានរងនូវឥទ្ធិពលសម្ពាធខ្ពស់ពីភាគខាងជើងប្រទេសចិន ជាមួយនឹងខ្យល់មូសុងឥសាន្តខ្សោយ ដែលធ្វើសីតុណ្ហភាពធ្លាក់ចុះទាប ប៉ុន្តែជាក់ស្តែងសម្រាប់ខេត្តមណ្ឌលគិរី គិតត្រឹមថ្ងៃទី២០ វិច្ឆិកានេះ គឺមានស្ថានភាពធម្មតាមិនទាន់ចុះត្រជាក់ទាបនោះទេ ៕
ចែករំលែកព័តមាននេះ