ខេត្តព្រះសីហនុ ៖ មានករណីគ្រោះថ្នាក់ចរាចរណ៍ចំនួន២លើកផ្សេងគ្នាកើតឡើងក្នុងថ្ងៃតែមួយ បណ្តាលឱ្យបាត់បង់ជីវិតម្នាក់ និងរបួសធ្ងន់ម្នាក់ ។ ករណីទី១-កាលពីវេលាម៉ោងជាង១រំលងអាធ្រាត្រឈានចូលថ្ងៃទី២១ ខែវិច្ឆិកា ឆ្នាំ២០២០ មានរថយន្តមួយគ្រឿងជ្រុលចង្កូតទៅបុករនាំងពុះចែកទ្រូងផ្លូវ…
ខេត្តព្រះសីហនុ ៖ មានករណីគ្រោះថ្នាក់ចរាចរណ៍ចំនួន២លើកផ្សេងគ្នាកើតឡើងក្នុងថ្ងៃតែមួយ បណ្តាលឱ្យបាត់បង់ជីវិតម្នាក់ និងរបួសធ្ងន់ម្នាក់ ។
ករណីទី១-កាលពីវេលាម៉ោងជាង១រំលងអាធ្រាត្រឈានចូលថ្ងៃទី២១ ខែវិច្ឆិកា ឆ្នាំ២០២០ មានរថយន្តមួយគ្រឿងជ្រុលចង្កូតទៅបុករនាំងពុះចែកទ្រូងផ្លូវ លើផ្លូវជាតិលេខ៣ ភូមិវាលមាស ឃុំវាលរេញ ស្រុកព្រៃនប់ ខេត្តព្រះសីហនុ បណ្តាលឱ្យអ្នកបើកបររថយន្តរងរបួសធ្ងន់ ។
តាមសមត្ថកិច្ចបញ្ជាក់ថា រថយន្ត១គ្រឿងខាងលើម៉ាកស៊ើប ពណ៌ទឹកប៊ិចចាស់ ពាក់ស្លាកលេខ ភ្នំពេញ 2C-9562 អ្នកបើកបរមិនស្គាល់អត្តសញ្ញាណ បានធ្វើដំណើរក្នុងទិសដៅពីខេត្តកំពតទៅវាលរេញ ជ្រុលចង្កូតទៅបុករនាំងពុះចែកទ្រូងផ្លូវ បណ្តាលឱ្យអ្នកបើកបររងរបួសធ្ងន់បាក់ជើង ត្រូវបានបញ្ជូនទៅសង្គ្រោះនៅមន្ទីរពេទ្យ រីឯរថយន្តរងការខូចខាតធ្ងន់ធ្ងរ។
ករណីទី២-បុរសម្នាក់បានបាត់បង់ជីវិតក្នុងគ្រោះថ្នាក់ចរាចរណ៍រវាងរថយន្តបុកជាមួយនឹងម៉ូតូកាលពីវេលាម៉ោងជិត១០យប់ថ្ងៃទី២១ ខែវិច្ឆិកា ឆ្នាំ២០២០ លើផ្លូវជាតិលេខ៤ ចន្លោះគីឡូម៉ែត្រលេខ 112-113 ស្ថិតក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សីលា ខេត្តព្រះសីហនុ ។
សមត្ថកិច្ចឲ្យដឹងថា ជនរងគ្រោះឈ្មោះ សៀន ស៊ឹម ភេទប្រុស អាយុ២៥ឆ្នាំ មានទីលំនៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ ជាអ្នកបើកបរម៉ូតូមួយគ្រឿងម៉ាកហុងដាឌ្រីម ពាក់ផ្លាកលេខ ភ្នំពេញ 1DP-0932 ។ ចំណែករថយន្តមួយគ្រឿងម៉ាកសាំយ៉ុង ពាក់ស្លាកលេខ ព្រះសីហនុ 2A-4750 អ្នកបើកបរមិនស្គាល់អត្តសញ្ញាណ បានរត់គេចខ្លួនបាត់។
សមត្ថកិច្ចឲ្យដឹងថា មុនពេលកើតហេតុ ជនរងគ្រោះជិះម៉ូតូធ្វើដំណើរតាមផ្លូវ លុះមកដល់ចំណុចកើតហេតុខាងលើ ស្រាប់តែមានរថយន្តមួយគ្រឿងបើកបរក្នុងទិសដៅពីភ្នំពេញឆ្ពោះទៅខេត្តព្រះសីហនុ បានបុកគ្នាយ៉ាងពេញទំហឹងក្នុងទិសដៅផ្ទុយគ្នាបណ្តាលឱ្យបុរសជាអ្នកបើកបរម៉ូតូបានបាត់បង់ជីវិត ។ ចំណែកអ្នកបើកបររថយន្តក្រោយពេលកើតហេតុរត់គេចខ្លួនបាត់៕ (កែសម្រួលដោយ ៖ ធីតា)
ចែករំលែកព័តមាននេះ