ខេត្តបាត់ដំបង ៖ អតីតទណ្ឌិតម្នាក់ដែលទើបចេញពីគុក ឥឡូវត្រូវកម្លាំងការិយាល័យព្រហ្មទណ្ឌកំរិតធ្ងន់ធ្វើការស្រាវជ្រាវឃាត់ខ្លួនបានជាថ្មី កាលពីវេលាម៉ោងជាង១១ថ្ងៃត្រង់ ថ្ងៃទី២១ វិច្ឆិកា នេះក្រោយពីប្រព្រឹត្តបទល្មើសដដែលៗ (គាស់ផ្ទះ)មិនរាងចាលនៅក្នុងភូមិទូលតាឯក សង្កាត់ទូលតាឯក ក្រុងបាត់ដំបង ។
អនុប្រធានការិយាល័យព្រហ្មទណ្ឌកំរិតធ្ងន់នៃស្នងការខេត្តដែលដឹកនាំកិច្ចប្រតិបត្តិការនេះ លោក វ៉ាន់ តារ៉ា បានឱ្យដឹងថា ជនសង្ស័យឈ្មោះ រស់ ផស់ អាយុ៣០ឆ្នាំ នៅភូមិទូលតាឯក សង្កាត់ទូលតាឯក ។
លោកបាននិយាយថា ជននេះធ្លាប់ជាប់គុក ដោយសារធ្វើសកម្មភាពគាស់ផ្ទះគេ ចូលលួចទ្រព្យសម្បត្តិ ហើយទើបចេញពីគុកបានប៉ុន្មានខែមុននេះ ស្រាប់តែជននេះប្រព្រឹត្តបទល្មើសដដែលនេះទៀត ហើយពេលនេះត្រូវឃាត់ខ្លួនបញ្ជូលគុកវិញ ។ សេចក្ដីរាយការណ៍ដំបូងបានឱ្យដឹងថា ជននេះបានធ្វើសកម្មភាពចូលលួចគ្រឿងអលង្ការស្ត្រីម្នាក់ឈ្មោះ អ៊ុច សាលូន អាយុ៥១ឆ្នាំ នៅភូមិទូលតាឯក សង្កាត់ទូលតាឯក ក្រុងបាត់ដំបង កាលពីថ្ងៃទី២០ វិច្ឆិកា ពេលជនរងគ្រោះជាប់រវល់ទៅកាត់ដេរនៅផ្សារបឹងឈូក ។
បើតាមស្ត្រីរងគ្រោះ បានប្រាប់កោះសន្តិភាព នៅព្រឹកថ្ងៃទី២១ វិច្ឆិកាថា នៅថ្ងៃកើតហេតុគាត់មិនដឹងថា ចោរចូលលួចទ្រព្យសម្បត្តិគាត់នៅម៉ោងប៉ុន្មានទេ តែគាត់បានដឹងនៅពេលល្ងាច ពេលគាត់ត្រឡប់មកពីកាត់ដេរនៅផ្សារវិញ ។ គាត់បានប្រាប់ដោយសង្ខេបនូវសម្ភារ:បាត់បងថា ទ្រព្យសម្បត្តិដែលត្រូវចោរលួចមានគ្រឿងអលង្ការមួយចំនួន តែលោហ:ធាតុទាំងនោះខ្លះគ្មានតំលៃទេ ជាគ្រឿងកាឡៃ និង ស្ពិចឃ័រស្ដាប់ភ្លេងចំនួន០១ផង។
ស្ត្រីរងគ្រោះបានបញ្ជាក់បន្ថែមថា ជារឿយៗគាត់មិនបានបិទទ្វារផ្ទះ រួចទៅដេរនៅផ្សារ ដោយចេញពីព្រឹករហូតដល់ពេលល្ងាចទើបមកផ្ទះវិញ ។ ដូច្នេះហើយទើបចោរអាចចូលលួចទ្រព្យសម្បត្តិនៅក្នុងផ្ទះស្រួលៗបែបនេះ ។ ដោយឡែកមកស្ដាប់ចម្លើយលោកចោរវិញ បន្ទាប់ពីត្រូវឃាត់ខ្លួនជាថ្មី អតីតទណ្ឌិតឈ្មោះ រស់ ផស់ នេះបានសារភាពថា ខ្លួនពិតជាបានចូលផ្ទះខាងលើលួចទ្រព្យសម្បត្តិគាត់មែន គឺចូលលួចនៅម៉ោងប្រហែល១០ព្រឹក ពេលមិនឃើញម្ចាស់ផ្ទះមិននៅ ។ ជននេះបានប្រាប់សមត្ថកិច្ចថា ខ្លួនឃើញទ្វារខាងក្រោយមិនបានចាក់សោរទេ ហើយខ្លួនក៏ចូលទៅលួចកាបូបតូច១ ដែលមានគ្រឿងអលង្ការទុកនៅលើគ្រែ ។ ប៉ុន្តែមិនទាន់យកទៅលក់ផងក៍ត្រូវសមត្ថកិច្ចមកក្របួចកល្មម ។
លោក វ៉ាន់ តារ៉ា មិនបាននិយាយលំអិតអំពីវត្ថុតាងដែលដកហូតបាននោះទេ តែលោកបានប្រាប់ថា វត្ថុតាងទាំងនោះ គឺជាលោហ:ធាតុដែលជនដៃដល់លួចពីផ្ទះជនរងគ្រោះ ។ លោកបានផ្ដល់ព័ត៌មាននេះជាបឋមថា ពេលនេះយើងកំពុងឲ្យជនរងគ្រោះមកផ្ទៀងផ្ទាត់វត្ថុតាងនានាដែលបានរកឃើញជាមួយនឹងការឃាត់ខ្លួនជនដៃដល់ ។ ហើយមន្ត្រីការិយាល័យជំនាញរបស់លោកក៏កំពុងសួរនាំជនដៃដល់នេះ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ