រាជធានីភ្នំពេញ ៖ គណៈកម្មការរៀបចំការប្រកួតប្រចាំសង្វៀនទូរទស្សន៍ស៊ីអិនស៊ី នៅថ្ងៃសៅរ៍ទី២១ វិច្ឆិកា បានដាក់អ្នកប្រដាល់ជើងខ្លាំង៦រូបឱ្យប្រកួតគ្នានៅក្នុងកម្មវិធីកម្ពុជាសង្វៀនគុនខ្មែរធ្វើឱ្យមានការចាប់អារម្មណ៍យ៉ាងខ្លាំង។
ក្នុងចំណោមអ្នកប្រដាល់ជើងខ្លាំងទាំង៣គូនេះ ជំនួបរវាងកីឡាករ ធន់ ចាន់តាក់ មកពីសមាគមកីឡាប្រដាល់កងយោធពលខេមរភូមិន្ទនិងកីឡាករឡុង សំណាង មកពីក្លិបសាលវ័ន្តកីឡាទទួលការចាប់ខ្លាំងជាងគេដោយសារនេះជាលើកទី១ដែលពួកគេទាំងពីរបានប៉ះគ្នា ។
បើនិយាយពីបទពិសោធន៍ប្រកួតនៅលើសង្វៀនគឺប្រហាក់ប្រហែលគ្នា ។ ធន់ ចាន់តាក់ ស្នៀតកណ្ដាប់ដៃរបស់គេល្អខ្លាំងណាស់អាចវាយចេញបានត្រង់រហ័ស ហើយធ្ងន់ទៀតផង ។ ប៉ុន្តែចរិតឆាប់ឆេវឆាវបន្តិច ឱ្យតែគេវាយត្រូវរាងឈឺបន្តិចច្រឡោតភ្លាម ។ ទោះជាយ៉ាងណាធន់ ចាន់តាក់ ធ្លាប់ធ្វើឱ្យគូប្រកួតមិនតិចនាក់ទេត្រូវចាញ់ក្រោមកណ្ដាប់ដៃរបស់គេ ។ ឯឡុង សំណាង ក៏មិនអាចមើលស្រាលបានដែរ។
អ្នកប្រដាល់រូបនេះមានស្នៀតប្រយុទ្ធល្អបំផុត ទាំងស្នៀតកែងនិងជង្គង់គឺអាចប្រើការបានយ៉ាងមានប្រសិទ្ធភាព ។ ម្យ៉ាងវិញទៀតគេក៏ជាអ្នកប្រដាល់ដែលមានការប្រយ័ត្នបំផុត មិនចេះមើលស្រាលលើគូប្រកួតទេ ។ លើកនេះ ធន់ ចាន់តាក់ បើសិនជាចង់បំបាក់ឡុង សំណាងមែនប្រហែលជាមិនងាយស្រួលនោះឡើយ។មិនតែប៉ុណ្ណោះទោះបីជាគេទាំងពីរទើបតែប៉ះគ្នាដំបូងមែន ប៉ុន្តែគេសង្ឃឹមថានឹងល្អមើលមិនខាន ។
ចំណែកជើងខ្លាំងចំនួន២គូទៀតតម្រូវទៅលើ កីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក ប៉ះជាមួយកីឡាករ យុគ យក្សផ្លែ មកពីក្លិបបូរីរាជសីហ៍មានរិទ្ធ ។ បឺត សង្ឃឹម ជាអ្នកប្រដាល់ជើងចាស់មួយរូបមានបទពិសោធន៍ប្រកួតជាច្រើនឆ្នាំមកហើយៗការមកប៉ះជាមួយយុគ យក្សផ្លែ ដែលគេឱ្យរហស្សនាមថាអ្នកលេងកណ្ដាប់ដៃពិឃាដនោះ ពិតជាមិនធ្វើឱ្យអ្នកតាមដានការប្រកួតខកបំណងឡើយ។
រីឯវ៉ាន់ វឿន មកពីក្លិបឃ្លាំងមឿងកីឡាវិញនោះត្រូវបានគេរៀបចំឱ្យជួបប្រកួតជាមួយសេន កុសល មកពីសមាគមកីឡាប្រដាល់កងយោធពលខេមរភូមិន្ទ ។ កីឡាករ វ៉ាន់ វឿន ធ្លាប់បង្ហាញមុខនៅស៊ីហ្គេមឆ្នាំ២០១៩នៅប្រទេសហ្វីលីពីន ។ ដូច្នេះថ្វីដៃប្រកួតរបស់គេមិនអាចមើលស្រាលបានឡើយ ។ ការមកប៉ះសេន កុសល ដែលជាអ្នកប្រដាល់មានបទពិសោធន៍ប្រកួតនៅលើសង្វៀនយូរឆ្នាំមកហើយនោះនឹងធ្វើឱ្យកក្រើកសង្វៀនមិនខានឡើយ៕
ចែករំលែកព័តមាននេះ