រាជធានីភ្នំពេញ ៖ ក្រុមបុគ្គលិក មេការ កម្មករសំណង់ប្រុស-ស្រីភាគច្រើនជាជនជាតិចិន និងមួយចំនួនតូចជាជនជាតិខ្មែរមានគ្នាប្រមាណជាជាង៤០នាក់ បាននាំគ្នាមកកាន់ស្ថានទូតចិន ក្នុងគោលបំណងសុំរកអន្តរាគមន៍ ខណៈក្រុមហ៊ុន ការដ្ឋានសំណង់អគារខុនដូរយីហោ…
រាជធានីភ្នំពេញ ៖ ក្រុមបុគ្គលិក មេការ កម្មករសំណង់ប្រុស-ស្រីភាគច្រើនជាជនជាតិចិន និងមួយចំនួនតូចជាជនជាតិខ្មែរមានគ្នាប្រមាណជាជាង៤០នាក់ បាននាំគ្នាមកកាន់ស្ថានទូតចិន ក្នុងគោលបំណងសុំរកអន្តរាគមន៍ ខណៈក្រុមហ៊ុន ការដ្ឋានសំណង់អគារខុនដូរយីហោ PHNOM PENH STAR ដែលមានទីតាំងនៅផ្លូវលេខ ៥០៨ ក្នុងសង្កាត់ផ្សាដើមថ្កូវ ខណ្ឌចំការមន មិនបានបើកប្រាក់ខែឱ្យបុគ្គលិក កម្មករគ្រប់ផ្នែក ដោយអ្នកខ្លះ៣ខែ និងអ្នកខ្លះទៀត៤ខែ សរុបមានគ្នាជាង១០០នាក់ ដែលគិតជាទឹកប្រាក់សរុបរហូតទៅដល់ជាង១លានដុល្លារឯណោះ ហើយក្រុមហ៊ុននៅមិនទាន់មានដំណោះស្រាយនោះ។
ការលើកគ្នាមកសុំការអន្តរាគមន៍ខាងលើនេះដែរ បានធ្វើឡើងកាលពីវេលាម៉ោង៩និង ៣០នាទីព្រឹកថ្ងៃទី២០ ខែវិច្ឆិកា ឆ្នាំ២០២០ នៅចំណុចស្ថានទូតចិន ដែលមានទីតាំស្ថិតនៅផ្លូវម៉ៅ សេទុង ក្នុងសង្កាត់ទួលទំពូងទី២ ខណ្ឌចំការមន រាជធានីភ្នំពេញ ។
តាមប្រភពពីស្ត្រីជាអ្នកបកប្រែម្នាក់បានប្រាប់ឱ្យដឹងថា ក្នុងពេលនេះដែរ មានក្រុមបុគ្គលិក មេការ កម្មករសំណង់ ប្រុសស្រី ភាគច្រើនជាជនជាតិចិន និងមួយចំនួនតូចជាជនជាតិខ្មែរ មានគ្នាជាង៤០នាក់ ដែលធ្វើការនៅការដ្ឋានសំណង់អគារខុនដូរមានកំពស់ ២២ជាន់ របស់ក្រុមហ៊ុន «ភ្នំពេញស្តា» បាននាំគ្នាមកកាន់ស្ថានទូតចិននេះ ក្នុងគោលបំណង ដើម្បីសុំអោយស្ថានទូត ជួយអន្តរាគមន៍ទៅដល់ក្រុមហ៊ុនខាងលើអោយជួយបើកប្រាក់ខែដល់ពួកគាត់ទាំងអស់គ្នាដែលធ្វើការនៅទីនោះ ខណៈក្រុមហ៊ុនខាងលើនេះមិនបានបើកប្រាក់ខែអោយ ដោយអ្នកខ្លះ៣ខែ និងអ្នកខ្លះទៀត ៤ខែមកហើយនៅមិនទាន់មានដំណោះស្រាយឱ្យនោះ។
តាមប្រភពដដែលក៏បានប្រាប់បន្តថា ក្រុមបុគ្គលិក មេការ និង កម្មករ ដែលធ្វើការនៅក្នុងនៅក្នុងការដ្ឋានសំណង់អគារខុនដូររបស់ក្រុមហ៊ុនខាងលើនេះមានគ្នាសរុបជាង ១០០នាក់ ដែលគិតជាប្រាក់ខែរួមទាំងអស់គ្នាមានសរុបរហូតទៅដល់ជាង១លានដុល្លារសហរដ្ឋអាមេរិកឯណោះ ដែលក្រុមហ៊ុនមិនបានបើកអោយ ហើយពួកគាត់ក៏បាននាំគ្នាធ្វើការឈប់ធ្វើការ និងតវ៉ាទាមទារដោះស្រាយគ្នាតាំងពីខែមិថុនា រហូតដល់ខែកញ្ញាមកម្លេះ ជាច្រើនលើកច្រើនសារជាបន្តបន្ទាប់កន្លងមកហើយ ដោយខាងក្រុមហ៊ុនបានបើកលុយអោយចំនួន២លើក ដោយលើកទី១ ចំនួន២ម៉ឺនដុល្លារ និងលើកទី២ បានចំនួន១០ម៉ឺនដុល្លារម្តងទៀតក៏បាត់ស្ងាត់ឈឹងរហូតមក។
តាមប្រភពដដែលបានបន្តទៀតថា ការដោះស្រាយជាមួយនឹងក្រុមហ៊ុននាពេលកន្លងមក ហាក់បីដូចជាមិនមានដំណោះស្រាយពិតប្រាកដ ក៏នាំគ្នាទៅតែអង្គុយនិយាយគ្នាលេងទៅវិញ ដោយមើលឃើញថា ខាងក្រុមហ៊ុនមិនមានបំណងដោះស្រាយប្រាក់ខែដល់ពួកគាត់ឱ្យបានច្បាស់លាស់នោះ ទើបនាពេលនេះពួកគាត់លើកគ្នាមកសុំការអន្តរាគមន៍ពីស្ថានទូតចិន អោយជួយធ្វើអន្តរាគមន៍ដល់ក្រុមហ៊ុន «ភ្នំពេញស្តា» ឱ្យបើកប្រាក់ខែដល់ពួកគាត់ជាបន្តទៀត ហើយក៏មិនទាន់បានដឹងថាមានដំណោះស្រាយយ៉ាងណានៅឡើយដែរ ។
ក្រោយពីក្រុមបុគ្គលិក មេការ និងកម្មករសំណង់ ដែលធ្វើការនៅការដ្ឋានសំណង់អគារខុនដូរខាងលើ មានជនជាតិចិន និងខ្មែរជាង៤០នាក់ ក្នុងចំណោមជាង១០០នាក់នាំគ្នាមកឈរកាន់បដា ដើម្បីសុំការជួយអន្តរាគមន៍ពីស្ថានទូតចិនពាក់ព័ន្ធនឹងបញ្ហាខាងលើ បន្ទាប់មកខាងស្ថានទូតចិនក៏អនុញ្ញាតឱ្យបុរសជនជាតិចិនចំនួន២នាក់ដែលជាតំណាងក្រុមកម្មករ ចូលទៅខាងក្នុងផងដែរ ហើយក៏ចេញមកខាងក្រៅវិញ រួចនាំគ្នាធ្វើការរំសាយទៅវិញ ហើយក៏មិនទាន់បានដឹងថាមានដំណោះស្រាយគ្នាបែបណានោះទេ ៕ (កែសម្រួលដោយ ៖ ធីតា)
ចែករំលែកព័តមាននេះ