រាជធានីភ្នំពេញ៖ ថ្នាក់ដឹកនាំក្រសួងសាធារណការ និងដឹកជញ្ជួនបានឲ្យដឹងថា ការសាងសង់អគារទីស្តីការក្រសួងសាធារណការ និងដឹកជញ្ជូនថ្មី នៅទឹកដីខណ្ឌប្ញស្សីកែវ សម្រេចបានស្ទើរតែទាំងស្រុងហើយគ្រោងសម្ពោធដាក់ឱ្យប្រើប្រាស់ជាផ្លូវការក្នុងពេលឆាប់ៗខាងមុខនេះ ។
ជុំវិញបញ្ហានៃការផ្លាស់ប្តូរទីតាំងទីស្តីការក្រសួងសាធារណការនិងដឹកជញ្ជួនទៅទីតាំងថ្មីនេះផងដែរ មហាជនបានចោទជាសំណួរទៅកាន់ថ្នាក់ដឹកនាំក្រសួងផងដែរថាតើទីតាំងបច្ចុប្បន្ន ស្ថិតនៅជិតវត្តភ្នំ ក្នុងទឹកដីខណ្ឌដូនពេញ ដែលជាទីតាំងថ្លៃដីមានតម្លៃខ្ពស់នេះផងដែរ នឹងត្រូវប្រើប្រាស់ជាអ្វី ។
សូមបញ្ជាក់ថានៅព្រឹកថ្ងៃទី ១៩ ខែវិច្ឆិកា ឆ្នាំ២០២០ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួងអញ្ជើញពិនិត្យមើលវឌ្ឍនភាពនៃការសាងសង់អគារទីស្តីការក្រសួងថ្មី ដែលមានទីតាំងឋិតនៅផ្លូវលេខ៥៩៨ សង្កាត់ច្រាំងចំរេះ២ ខណ្ឌប្ញស្សីកែវ រាជធានីភ្នំពេញ (ផ្លូវឯកឧត្តមជា សុផារ៉ា) ។
ឯកឧត្ដមទេសរដ្ឋមន្ត្រីបានឱ្យដឹងថា មកដល់ពេលនេះ ការសាងសង់សម្រេចបានស្ទើរតែទាំងស្រុង ពោលគឺ ៩៥%ហើយ នៅតែការងារសេសសល់មួយចំនួនប៉ុណ្ណោះ ដូចជា៖ ការសម្អាតបរិវេណអគារ ការតុបតែងខាងក្នុងអគារ ការដាំស្មៅក្នុងសួនបង្កើនសោភ័ណភាព ការដាំដើមឈើ និងការក្រាលកៅស៊ូបេតុងផ្លូវចេញ-ចូលជាដើម។
ជាមួយគ្នានេះផងដែរ ឯកឧត្តមទេសរដ្ឋមន្ត្រី បានណែនាំឱ្យគណៈកម្មការទទួលបន្ទុកការងារសាងសង់ ធ្វើការកែសម្រួលចំណុចខ្វះខាតមួយចំនួននៅខាងក្រៅ ក៏ដូចជាផ្ទៃខាងក្នុងអគារ ដើម្បីបង្កើនគុណភាព និងលើកកម្ពស់សោភ័ណភាពអគារឱ្យកាន់តែល្អប្រសើរ សំដៅធ្វើយ៉ាងណាសម្រួលដល់ការបំពេញការងាររបស់មន្ត្រីរាជការប្រកបដោយផាសុកភាព ហើយអគារនេះគ្រោងសម្ពោធដាក់ឱ្យប្រើប្រាស់ជាផ្លូវការក្នុងពេលឆាប់ៗ ក្រោយគោរពស្នើសុំគោលការណ៍ដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ឆ្លើយតបនឹងសំណួររបស់អ្នកសារព័ត៌មានថា តើទីតាំងទីស្តីការក្រសួងនៅចំកណ្តាលរាជធានីភ្នំពេញនឹងត្រូវប្រើប្រាស់ជាអ្វីនោះ ឬប្រគល់ជូនទៅស្ថាប័នណានោះ លោក វ៉ា ស៊ឹម សុរិយ៉ា មន្ត្រីអ្នកនាំពាក្យក្រសួងសាធារណ និងដឹកជញ្ជូន បានឲ្យដឹងថា ទីស្តីការក្រសួងចាស់នឹងប្រគល់ជូនសម្ដេចតេជោ ហ៊ុន សែន នាយករដ្ឋមន្ត្រីកម្ពុជាចាត់ចែងថានឹងធ្វើអ្វីនាពេលបន្ទាប់។
ទន្ទឹមនឹងទីស្ដីការក្រសួងថ្មី ស្ថិតក្នុងដំណើរការរៀបចំសម្រាប់ទីស្តីការក្រសួងចាស់ ឬទីស្តីការបច្ចុប្បន្ននេះបើតាមមន្ត្រីអ្នកពាក្យខាងលើអាចនិងទុកជូនក្រសួងរ៉ែនិងថាមពល។ តែទោះបែបនេះក្ដីសម្រាប់ព័ត៌មានជាក់លាក់ទាល់តែមានការប្រកាសជាផ្លូវការពីសម្ដេចតេជោហ៊ុនសែន តែប៉ុណ្ណោះ ៕
ចែករំលែកព័តមាននេះ