រាជធានីភ្នំពេញ ៖ អតីតតារាចម្រៀងលោកឆោម ប៊ុនយ៉ុង កំពុងតែស្ថិតក្នុងសភាពជាព្រះសង្ឃនៅឡើយ បន្ទាប់ពីបានចាកចេញពីអាជីពសិល្បៈអស់រយៈពេលប្រមាណជាង១០ឆ្នាំមកនេះ ។
បច្ចុប្បន្នភិក្ខុឆោម ប៊ុនយ៉ុង ហាក់នៅមិនទាន់បានបង្ហាញព្រះទ័យលាចាកសិក្ខាបទទេ ខណៈពេលទស្សនិកជនស្ទើរតែភ្លេចមុខព្រះអង្គទៅហើយ ។ តាមរយៈបទសម្ភាសន៍មួយដែលគេផ្សព្វផ្សាយតាមហ្វេសប៊ុកកាលពីពេល ថ្មីៗនេះ ភិក្ខុឆោម ប៊ុនយ៉ុង បានលើកឡើងថា ក្នុងរយៈពេលប៉ុន្មានឆ្នាំនេះ ព្រះអង្គមិនបានទៅណាឆ្ងាយឡើយ ពោលគឺស្ថិតក្នុងភាពជាព្រះសង្ឃ ត្រាប់តាមផ្លូវព្រះពុទ្ធ ដែលនេះគឺជាឧបនិស្ស័យរបស់ព្រះអង្គ ។ អស់ពេលប្រមាណជាង១០ឆ្នាំមកហើយ ព្រះអង្គស្ថិតក្នុងសភាពបែបនេះ ។
ភិក្ខុឆោម ប៊ុនយ៉ុង មានថិរដីកាថា «អាត្មាបានលះបង់អ្វីគ្រប់បែបយ៉ាងដើម្បីបានសាងផ្នួសជាព្រះសង្ឃ ដោយសារការពញ្ញាក់អារម្មណ៍តាមផ្លូវងងឹតដែលអាត្មាក៏មិនបានដឹងច្បាស់ ដោយនោះគឺជាអ្នកអាចនាំផ្លូវឲ្យមកសាងផ្នួសជាព្រះសង្ឃរហូតដល់សព្វថ្ងៃ ។
ពីដំបូងព្រះអង្គមានជំងឺភ្លឹករយៈពេលប្រមាណ៣ខែ ហើយក្រុមគ្រួសាររបស់អាត្មាគិតស្មានថា ស្លាប់បាត់បង់ជីវិត ប៉ុន្តែស្រាប់តែមានគ្រាមួយមានគេមកពញ្ញាក់អារម្មណ៍ដូចជាដាស់ឲ្យដឹងខ្លួនឡើងវិញ និងនាំផ្លូវអាត្មាឲ្យមកចាប់យកផ្លូវព្រះធម៌ »។
ចាប់ពីពេលនោះមក អតីតតារាចម្រៀងឆោម ប៊ុនយ៉ុង បានសម្រេចសាងផ្នួសជាព្រះសង្ឃ ដោយដំបូងឡើយបួសរៀនធម៌ក្នុងវត្តមួយនៅស្រុកបាធាយ ខេត្តកំពង់ចាម ។ បច្ចុបុ្បន្នព្រះអង្គកំពុងគង់នៅកុដិកម្សត់មួយនៅវត្តកោះមេត្តាពោធិវង្ស រាជធានីភ្នំពេញ ។
ភិក្ខុឆោម ប៊ុនយ៉ុង បានលើកឡើងបន្ថែមទៀតថា ក្នុងអំឡុងពេលបួសជាព្រះសង្ឃហើយនោះ មានម្ចាស់ស្ពុនស៊័រនៅប្រទេសបារាំងទាក់ទងឲ្យទៅច្រៀងនៅទីនោះ ដោយសារតែពួកគេមិនដឹង និងមិនជឿថាបួសជាព្រះសង្ឃពិតមែន ។ លុះពេលពួកគេមកស្រុកខ្មែរ ហើយបានជួបដោយផ្ទាល់ ទើបជឿ ។ ដូច្នេះហើយបាននិមន្តព្រះអង្គទៅប្រទេសបារាំង ក្នុងនាមជាព្រះសង្ឃ ពោលមិនមែនជាតារាចម្រៀងដូចមុនឡើយ ។
បើតាមភិក្ខុឆោម ប៊ុនយ៉ុង ការបួសជាព្រះសង្ឃរហូតមកទល់ពេលនេះមិនមែនជាការងាយស្រួលនោះឡើយ ពោលគឺបានឆ្លងកាត់ព្យុះភ្លៀង និងបញ្ហាលំបាកច្រើនជំពូកជាបន្តបន្ទាប់ ប៉ុន្តែនៅតែតស៊ូអត់ធ្មត់ ដើម្បីបានដើរលើផ្លូវព្រះធម៌ដ៏ជ្រះថ្លារហូតពេលនេះ ។ ជាក់ស្ដែងពេលបួសក្នុងវត្តនៅស្រុកស្រែនោះ មិនសូវមានចង្ហាន់ច្រើនឡើយ ហើយពេលខ្លះព្រះអង្គ និងលោកនេនមួយចំនួនទៀតឆាន់បាយជាមួយឆៃប៉ូវ ។
នៅពេលដែលព្រះអង្គចេញបិណ្ឌបាត្របានចង្ហាន់ ម្តងៗ គឺតែងតែហៅគ្នាទាំងអស់មកឆាន់គ្មាននៅសេសសល់ឡើយ ។ អនុស្សាវរីយ៍នេះពេលខ្លះព្រះអង្គស្ទើរតែទប់ទឹកភ្នែកមិនបាន តែទោះជាយ៉ាងណាក្ដីព្រះអង្គហាក់មិនរាថយពីជីវិតជាព្រះសង្ឃឡើយ ។
បច្ចុប្បន្នភិក្ខុឆោម ប៊ុនយ៉ុង នៅមិនទាន់បានបង្ហាញជំហរជាថ្មីថា នឹងសឹកមកជាគ្រហស្ថ និងចាប់អាជីពសិល្បៈវិញទេ គឺនៅបន្តជីវិតជាព្រះសង្ឃទៀត ។
ក្នុងនាមជាព្រះសង្ឃ រហូតមកទល់ពេលនេះ ភិក្ខុឆោម ប៊ុនយ៉ុង នៅតែនឹករឭកដល់មិត្តសិល្បករទាំងអស់ដែលរួមជំនាន់ជាមួយគ្នា ហើយព្រះអង្គស្វាគមន៍ចំពោះមិត្តភក្តិដែលមានបំណងទៅសួរសុខទុក្ខគ្រប់ពេល ។
ការសាងផ្នួសរបស់ភិក្ខុឆោម ប៊ុនយ៉ុង តាំងពីអំឡុងចុងឆ្នាំ២០១២ បន្ទាប់ពីបានជួបរឿងស្នេហាមិនសមប្រកប និងរឿងរ៉ាវអាប់អួនៅក្នុងជីវិតមួយចំនួនទៀត ៕
ចែករំលែកព័តមាននេះ