រាជធានីភ្នំពេញ ៖ នៅទីបំផុតទៅតារាចម្រៀងនិយមលេងស្ទាយប្លែកៗ យូរី បានសម្រេចគោលបំណងឈានជើងចូលផលិតកម្មរស្មីហង្សមាសជាផ្លូវការហើយ ខណៈពេលដែលតារាចម្រៀងដែលគេកំពុងចាប់អារម្មណ៍បំផុត មាស សុខសោភា នៅតែមានភាពស្រពិចស្រពិលនៅឡើយ។
មុននេះ មានការចាប់អារម្មណ៍ និងមានការដាមដានយ៉ាងខ្លាំងទៅលើកំពូលតារាចម្រៀង មាស សុខសោភា ចំពោះអនាគតរបស់នាងជាមួយនឹងផលិតកម្មហង្សមាស ក្រោយពេលដែលតារារូបនេះបានបញ្ចប់កុងត្រាទាំងស្រុងពីផលិតកម្មថោន។ ក្នុងពេលដែលអ្នកនិយមតាមដានសិល្បៈខ្មែរហាក់ផ្តោតអារម្មណ៍ខ្លាំងតែទៅលើ មាស សុខសោភា នោះ គេស្ទើរមិនដឹងស្មានដល់ថា យូរី ដែលគ្មានអ្នកណាគិតថា នឹងចូលផលិតកម្មហង្សមាសនោះ បែរជាលេចវត្តមានទៅវិញ។
បទចម្រៀងដំបូងរបស់ យូរី បានចេញរួមហើយតាមរយៈផេកផ្លូវការរបស់ផលិតកម្មរស្មីហង្សមាសកាលពីពេលថ្មីៗនេះ ក្នុងពេលផលិតកម្មបានសម្តែងការស្វាគមន៍ចំពោះវត្តមានរបស់តារារូបនេះមកកាន់ផលិតកម្មរបស់ខ្លួនផងដែរ។ ខុសពី យូរី តារាចម្រៀងសម្លេងស្រទន់ មាស សុខសោភា ដែលគេកំពុងផ្តោតអារម្មណ៍ខ្លាំង និងការចង់ឃើញពីប្រិយមិត្តគាំទ្រក្នុងការឲ្យតារាចម្រៀងរូបនេះចូលមកផលិតកម្មហង្សមាសដូចគ្នា ព្រោះផលិតកម្មនេះអាចនឹងផ្តល់ឱកាសថ្មីៗសម្រាប់នាងចាប់ឈោងភាពល្បីល្បាញកាន់តែខ្លាំង។
ចំពោះរឿងនេះ មាស សុខសោភា ខ្លួនឯងមិនបានបដិសេធឡើយ ដោយកន្លងមកនាងបានសារភាពថា មានមិត្តភក្តិរបស់នាងមួយចំនួនបានស្នើសុំឲ្យនាងចូលក្នុងផលិតកម្មហង្សមាសនេះ ហើយនាងក៏កំពុងតេពិចារណា។
ចំណែកបងប្រុសរបស់នាងលោក មាស សុខរតនះ វិញ ក៏បានទទួលស្គាល់ថា ផលិតកម្មហង្សមាស ពិតជាធ្លាប់បានមកទាក់ទង មាស សុខសោភា ប្រាកដមែន ប៉ុន្តែការសម្រេចចិត្តយ៉ាងណានោះ គឺជាសិទ្ធិរបស់នាង លោកមិនលូកលាន់ឡើយ។
ជាការកត់សម្គាល់ មានទិសដៅ២ដែលមហាជន ក៏ដូចជាតាមដានសិល្បៈបានសន្មត់ថា មាស សុខសោភា អាចនឹងទៅជ្រកក្នុងផលិតកម្មហង្សមាស ឬផលិតកម្ម ហ្គាឡាក់ស៊ី ប៉ុន្តែចំពោះរឿងនេះ មាស សុខរតនះ ធ្លាប់បានអះអាងប្រាប់កោះសន្តិភាពតាមសារអេឡិចត្រូនិចថា លោកទទួលស្គាល់មានផលិតកម្មជាច្រើន នៅក្នុងនោះមានផលិតកម្មហង្សមាសផងដែរ បានមកទាក់ទង មាស សុខ សោភា ប៉ុន្តែសម្រាប់ផលិតកម្មហ្គាឡាក់ស៊ីនោះ គឺមិនមានទាក់ទងមកឡើយ។
យ៉ាងណា ដំណឹងចុងក្រោយដែលត្រូវបានចុះផ្សាយតាមបណ្តាញសារព័ត៌មានក្នុងស្រុកមួយបានបញ្ជាក់ថា មាស សុខសោភា បានធីបចោលហង្សមាស និង Galaxy ហើយរត់ចូលផលិតកម្មថ្មី Ream ដោយសារការចរចាគ្នាមិនត្រូវ។
ជាការកត់សម្គាល់ អនាគតរបស់ មាស សុខសោភា នៅផលិតកម្មណាមួយនោះ វាហាក់មិនមានអ្វីសំខាន់សម្រាប់តារារូបនេះឡើយ ខណៈពេលដែលនាងក៏មានផលិតកម្មមួយផ្ទាល់ខ្លួន ហើយបានសាងកេរ្តិ៍ឈ្មោះល្បីល្បាញក្នុងចំណោមតារាចម្រៀងជួរមុខរហូតមកទល់ពេលនេះទៅហើយនោះ៕
ចែករំលែកព័តមាននេះ