រាជធានីភ្នំពេញ ៖ កាលពីវេលាព្រឹកថ្ងៃទី២០ ខែវិច្ឆិកា ឆ្នាំ២០២០ មានអ្នកភូមិថ្មគោល១ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ បានចាប់បានពស់ថ្លាន់១ក្បាល មានទំហំដងខ្លួនប៉ុនភ្លៅមនុស្សចាស់ និងមានទម្ងន់ប្រហែល៣០គីឡូក្រាម បន្ទាប់ពីពួកគាត់បាន ប្រទះឃើញពស់១ក្បាលនេះលូនឆ្លងកាត់តាមផ្លូវក្នុងភូមិរបស់ពួកគាត់ ហើយពួកគាត់បាននាំយកពស់១ក្បាលនេះទៅកាន់ផ្ទះលោកមេភូមិថ្មគោល១ ដើម្បីចាត់ចែងប្រគល់ទៅឲ្យក្រុមអភិរក្សសត្វព្រៃយកទៅលែងនៅទីកន្លែងសុវត្ថិភាព ។
អ្នកភូមិបាននិយាយថានាវេលាព្រឹកថ្ងៃទី២០ វិច្ឆិកា នេះ ខណៈដែលពួកគាត់ធ្វើដំណើរតាមផ្លូវ ស្រាប់តែប្រទះឃើពស់ថ្លាន់១ក្បាលនេះលូនយឺតៗកាត់ផ្លូវ ដោយសង្ស័យថា វាលូនចេញពីក្នុងព្រៃរបោះ ឬក៏ថ្លុកនៅតំបន់ជិតភូមិពួកគាត់ និងទំនងជាវាស្វែងរកទីជម្រកថ្មី ។ ពេលនោះគាត់បានស្រែកប្រាប់អ្នកជិតខាងបង្កឲ្យមានការភ្ញាក់ផ្អើល ហើយដើម្បីសុវត្ថិភាព អ្នកភូមិទាំងអស់ខ្លាចពស់នេះរុំ ឬស៊ីកូនចៅជាអាហារ ព្រមទាំងសុវត្ថិភាពពស់នេះផង ទើបពួកគាត់បាននាំគ្នាចាប់វាយកទៅប្រគល់ជូនលោកមេភូមិ ដើម្បីប្រគល់បន្តទៅឲ្យក្រុមអភិរក្សនាំយកទៅលែងនៅទីសុវត្ថិភាព ឬសួនសត្វណាមួយកុំឲ្យជនខិលខូចសម្លាប់វាបាន។
តាមប្រភពដដែលបានបន្តថា នេះពុំមែនជាលើកទី១ទេ ដែលពួកគាត់បានប្រទះឃើញពស់ថ្លាន់លូនកាត់ផ្លូវក្នុងភូមិបែបនេះ ដែលកន្លងមកបានឃើញនិងចាប់បានជាបន្តបន្ទាប់ ដោយសារតែនៅតំបន់ជុំវិញភូមិឋានរបស់ពួកគាត់គឺជាវាលទំនាបជាជម្រកសត្វពស់ និងមច្ឆារស់នៅ ប៉ុន្តែបច្ចុប្បន្ននេះមានការចាក់ដីសង់លំនៅដ្ឋានច្រើនស្អេកស្កះ ហើយទំនងបាត់បង់ទីជម្រកសម្រាប់ពួកវាទើបវាលូនចេញរកទីជម្រកថ្មីទៀត៕ (កែសម្រួលដោយ ៖ ធីតា)
ចែករំលែកព័តមាននេះ