ខេត្តព្រះសីហនុ ៖ រថយន្តធុនធំមួយដឹកអេតចាយមួយគ្រឿងបើកបរមិនប្រយ័ត្ន បណ្តាលអោយក្រឡាប់ផ្ងារជើង និងបង្កជាអគ្គិសភ័យឆេះរថយន្តយ៉ាងសន្ធោសន្ធៅ តែសំណាងល្អមិនមានមនុស្សរងរបួស ដែលហេតុការណ៍នេះកើតនៅវេលាម៉ោង០៦និង៣០នាទីយប់ ថ្ងៃទី១៨ ខែវិច្ឆិកានេះ នៅចំណុចរង្វង់មូលមហាវិថីជំទាវម៉ៅ ស្រុកព្រៃនប់ ខេត្តព្រះសីហនុ ។
តាមប្រភពព័ត៌មានពីកន្លែងកើតហេតុបានប្រាប់បណ្តាញសារព័ត៌មានថា នៅមុនពេលកើតហេតុគេឃើញរថយន្តធុនធំមួយគ្រឿង ពណ៌ខៀវ ពាក់ស្លាកលេខ ព្រះសីហនុ 3A-1593 បើកបរក្នុងល្បឿនលឿន ចុះពីចំណោតខ្មែរធ្វើបានមហាវិថីជំទាវម៉ៅមកកាន់មហាវិថីរាម លុះមកដល់ចំណុចរង្វង់មូលមហាវិថីជំទាវម៉ៅក៏ក្រឡាប់ផ្ងារជើង និងបង្កជាករណីអគ្គិភ័យឆាបឆេះក្បាលរថយន្តបែបនេះតែម្តង ។
ភ្លាមៗនោះ តៃកុងរថយន្តក៏លោតចេញពីកាប៊ិនទាន់ពេលវេលា មិនបណ្តាលអោយរងរបួស ឬបង្កគ្រោះថ្នាក់ដល់ពលរដ្ឋអ្នកធ្វើដំណើរក្បែរនោះទេ ។
សមត្ថកិច្ចបានបញ្ជាក់ប្រាប់បណ្តាញសារព័ត៌មានបន្ថែមផងដែរថា ក្រោយពីទទួលបានដំណឹងនេះភ្លាម សមត្ថកិច្ចមូលដ្ឋានស្រុកព្រៃនប់ក៏បានចេញរថយន្តពន្លត់អគ្គិសភ័យចំនួន០៣គ្រឿង ចុះអន្តរាគមន៍បាញ់ទឹកពន្លត់ករណីខាងលើអោយរលត់ទៅវិញទាំងស្រុង និងបណ្តាលអោយមានការឆេះរាលដាលដល់រថយន្ត និងអេតចាយទាំងស្រុងនោះទេ ។
ហើយសមត្ថកិច្ចក៏បានដាក់កំលាំងជួយសម្រួលចរាចរណ៍ការពារទីតាំងកន្លែងកើតហេតុ និងត្រៀមស្ទួចយករថយន្តខាងលើយកទៅរក្សាទុករងចាំការដោះស្រាយតាមនីតិវិធី ៕
ចែករំលែកព័តមាននេះ