ខេត្តកណ្ដាល ៖ មានករណីម្ចាស់ស្រែរាយខ្សែលួសតាមភ្លឺស្រែដើម្បីឆក់កណ្តុរ កុំឱ្យស៊ីស្រូវ ជារៀងរាល់យប់ ស្រាប់តែមានបុរសម្នាក់ដើរចាប់គីង្គគ់មកដល់ម្តុំស្រែនោះ ក៏ត្រូវចរន្តអគ្គីសនីខ្សែលួសឆក់ បណ្តាលឱ្យបាត់បង់ជីវិតនៅនឹងកន្លែង លុះព្រឹកឡើងទើបប្រទះឃើញសពបុរសរូបនោះ និងបង្កការភ្ញាក់ផ្អើលតែម្តង ។
ហេតុការណ៍ខាងលើនេះបានបង្កឱ្យការភ្ញាក់ផ្អើលកើតឡើងកាលពីវេលាម៉ោង៦និង៣០នាទីព្រឹកថ្ងៃទី១៦ ខែ វិច្ជិកា ឆ្នាំ២០២០ នៅចំណុចដីវាលស្រែពង្រោះបឹងជ្រោយឬស្សី ស្ថិតក្នុងភូមិពាមរាំងក្រោម ឃុំពាមរាំង ស្រុកលើកដែក ខេត្តកណ្តាល ។
ជនរងគ្រោះខាងលើឈ្មោះសាលី ប្រាក់ ហៅ (ប៊ុង ប្រាក់) ភេទប្រុស អាយុ២៤ឆ្នាំ មានទីលំនៅភូមិបឹងលើ ឃុំខ្ពបអាទាវ ស្រុកលើកដែក ខេត្តកណ្តាល ។ ចំណែកវត្ថុតាងចាប់យករួមមាន ខ្សែលួសប្រវែង៣៤០ម៉ែត្រ, ដុំឆក់កណ្តុរមួយគ្រឿង និងអាគុយមួយគ្រឿង។
យោងតាមការបំភ្លឺរបស់ឈ្មោះ គ្រន ស៊ីថា ភេទស្រី អាយុ៥០ឆ្នាំ មុខរបរកសិករ បានបំភ្លឺឲ្យដឹងថា កាលវេលាម៉ោងប្រហែល៦និង៣០នាទីយប់ថ្ងៃទី១៥ ខែវិច្ឆិកា ឆ្នាំ២០២០ មានបុរសម្នាក់ឈ្មោះស្រុឹម ស្រូយ ហៅ(ក្រូច) ភេទប្រុស អាយុ៣៥ឆ្នាំ មុខរបរកសិករ មានទីលំនៅភូមិពាមរាំងក្រោមឃុំពាមរាំង ស្រុកលើកដែក ខេត្តកណ្ដាល បានរាយខ្សែលួសតាមភ្លឺស្រែ ដើម្បីឆក់កណ្តុរ កុំឱ្យស៊ីស្រូវ ជារៀងរាល់យប់ ស្រាប់តែជនរងគ្រោះបានដើរចាប់គីង្គគ់ មកដល់ម្តុំស្រែនោះ ក៏ត្រូវចរន្តអគ្គីសនីខ្សែលួសឆក់ បណ្តាលឲ្យបាត់បង់ជិវិតនៅនឹងកន្លែងភ្លាមៗតែម្តង ។
តាមប្រភពដដែលបានបន្តថា លុះដល់វេលាម៉ោង៦និង៣០នាទីព្រឹកថ្ងៃទី១៦ ខែវិច្ឆិកា ឆ្នាំ២០២០ ទើបម្ចាស់ដីស្រែដែលឆក់កណ្តុរ មកដើរមើលខ្សែលួសរាយឆក់កណ្តុរ ក៏បានប្រទះឃើញសពបុរសរងគ្រោះដេកជាប់នឹងខ្សែរលួសឆក់កណ្តុលជាយភ្លឺដីស្រូវ ហើយក៏បានហៅប្រជាពលរដ្ឋដែលនៅជិតនោះមកជួយមើលនិងរាយការណ៍មកប៉ូលីសប៉ុស្តិ៍នគរបាលរដ្ឋបាលពាមរាំង ។ ក្រោយទទួលបានព័ត៌មាននេះភ្លាម ប៉ុស្តិ៍នគរបាលរដ្ឋបាលពាមរាំងបានរាយការណ៍ជូនផ្នែកជំនាញដើម្បីចុះពិនិត្យសពជនរងគ្រោះ ។
តាមការពិនិត្យរកឃើញថា សពមានស្នាមឆេះខ្លោចដាច់សាច់ក្រោមចង្ការលើគ្រាប់ពោន និងរបួសឆេះខ្លោចម្រាមដៃទាំងសងខាង (ដៃក្តាប់ជាប់ខ្សែរលួស)។
តាមការពិនិត្យរបស់ជំនាញខេត្ត ស្រុក ក្រុមគ្រូពេទ្យ ក្រុមប្រឹក្សាឃុំនិងប៉ុស្តិ៍រដ្ឋបាល ពិនិត្យឃើញថា ជនរងគ្រោះពិតជាបាត់បង់ជីវិតដោយសារឆក់ចរន្តអគ្គីសនី(ខ្សែភ្លើងឆក់កណ្តុរ) និងបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ